الماتىداعى № 1 وبلىستىق بالالار ۇيىنە قاتىستى تاعى دا داۋ شىقتى. وبلىستىق ءبىلىم باسقارماسى جاعدايعا پىكىر ءبىلدىردى،- دەپ حابارلايدى Dalanews.kz
ءبىلىم باسقارماسىنىڭ مالىمەتىنشە، الماتى قالاسىنداعى "ارناۋلى الەۋمەتتىك قىزمەتتەردى قاجەت ەتەتىن بالالاردى قولداۋ وڭىرلىك ورتالىعى" كمم عيماراتى اپات جاعدايىندا تۇرۋىنا بايلانىستى تاربيەلەنۋشىلەردى قونايەۆ قالاسىنداعى جاڭا، زاماناۋي بالالار ۇيىنە كوشىرۋ تۋرالى شەشىم قابىلدانعان.
"1963 جىلى سالىنعان عيمارات ءارى قاراي پايدالانۋعا جارامسىز دەپ تانىلعان. 2024 جىلى "استاناقۇرىلىسسەرۆيس" ج ش س جۇرگىزگەن تەحنيكالىق زەرتتەۋ ناتيجەسىندە عيماراتتىڭ تىرەك قۇرىلىمدارىندا جارىقتار انىقتالىپ، جىلۋ جانە سۋمەن جابدىقتاۋ جۇيەلەرى تولىق توزعانى جانە قايتا قالپىنا كەلتىرۋگە كەلمەيتىنى انىقتالعان. نىسان سانيتارلىق، ءورت قاۋىپسىزدىگى جانە قۇرىلىس تالاپتارىنا سايكەس كەلمەيدى"، - دەپ جازىلعان حابارلامادا.
2025 جىلعى 9 شىلدەدە شىققان الماتى وبلىسى اكىمىنىڭ جانە 2025 جىلعى 10 شىلدەدەگى ءبىلىم باسقارماسىنىڭ بۇيرىعى نەگىزىندە تاربيەلەنۋشىلەردى كەزەڭ-كەزەڭىمەن 180 ورىندىق جاڭا بالالار ۇيىنە كوشىرۋ جۇمىستارى باستالعان. بۇل نىسان جەكە ينۆەستورلاردىڭ قاراجاتىنا سالىنعان جانە مەملەكەت مەنشىگىنە سىيعا بەرىلگەن.
"جاڭا عيمارات بالالارعا ارنالعان مەكەمەلەرگە قويىلاتىن زاماناۋي ستاندارتتار مەن تالاپتارعا تولىق سايكەس كەلەدى. الدىمەن 1–4-سىنىپتاردا وقيتىن 44 بالا كوشىرىلەدى. ەرەسەك تاربيەلەنۋشىلەردىڭ كوشىرىلۋى ءبىلىم بەرۋ ۇدەرىسىنىڭ تۇراقتىلىعى مەن الەۋمەتتىك بەيىمدەلۋىن ەسكەرە وتىرىپ، كەزەڭ-كەزەڭىمەن جۇرگىزىلەدى. ءقازىر مەكەمەدە 171 بالا تاربيەلەنىپ جاتىر، ولاردىڭ 125ء-ى - جەتىم بالالار، 46-سى - ومىرلىك قيىن جاعدايعا تاپ بولعان بالالار. مەكەمەدە 85 قىزمەتكەر، ونىڭ ىشىندە 42 پەداگوگ جۇمىس ىستەيدى"، - دەپ جازىلعان حابارلامادا.
الەۋمەتتىك جەلىلەردە تاراپ جاتقان اقپاراتتارعا بايلانىستى ءبىلىم باسقارماسى مىناداي پىكىر ءبىلدىردى:
"بارلىق تاربيەلەنۋشى تۇراتىن جەرىنە قاراماستان، تەگىن مەديسينالىق قىزمەتپەن قامتاماسىز ەتىلەدى جانە زاڭناماعا سايكەس تۇرعىن ءۇي كەزەگىنە تۇرۋعا قۇقىلى. مەكەمە ورنالاسقان اۋماقتا باتپاقتى جەر بار دەگەن اقپارات شىندىققا سايكەس كەلمەيدى. بۇل جاعداي بالالاردىڭ قۇقىعىن شەكتەمەيدى. قونايەۆ قالاسىنداعى جاڭا مەكەمەگە كوشىرۋ بالالاردىڭ قاۋىپسىزدىگىن، ساپالى ءبىلىم مەن مەديسينالىق قىزمەت الۋ قۇقىعىن جانە جايلى ءومىر ءسۇرۋ جاعدايلارىن قامتاماسىز ەتۋگە باعىتتالعان"، - دەپ جازىلعان حابارلامادا.
