الماتى اكىمى ەربولات دوسايەۆتىڭ تاپسىرماسى بويىنشا وتكەن جىلدان باستاپ ۇوس ارداگەرلەرى كەلەسى باعىتتار بويىنشا تەگىن مەديسينالىق كومەك الا باستاعان بولاتىن. بۇل رەتتە جالپى پراكتيكا دارىگەرلەرى مەن ناقتىلى مامانداردىڭ كەڭەيتىلگەن تەكسەرىپ، تالداۋدار الىپ سوعىس ارداگەرلەرىنىڭ دەنساۋلىعىن باقىلاپ كەلەدى. سونىمەن قاتار تالداۋ كورسەتكىشتەرى بويىنشا ارداگەرلەر ەكگ، ۋدز، كت جانە مرت-تان تەگىن وتە الادى. بۇدان باسقا الماتىدا سوعىس ارداگەرلەرى ءۇشىن ستاسيوناردا وڭالتۋ، ساناتوريي-كۋرورتتىق ەمدەۋ جانە ستوماتولوگيالىق كومەك كورسەتۋ دە قاراستىرىلعان.
2023 جىلدىڭ باسىنان بەرى 4 اي ىشىندە تمككك جانە ءمامس اياسىندا ۇوس-نىڭ 3243 قاتىسۋشىسى جانە ولارعا تەڭەستىرىلگەن ادامدار كەڭەيتىلگەن مەديسينالىق تەكسەرۋدەن ءوتتى. جىل سوڭىنا دەيىن وسى ساناتتاعى الماتىلىقتاردىڭ 100%-ى كەڭەيتىلگەن مەديسينالىق تەكسەرۋدەن وتەدى.
بارلىق جۇرە المايتىن ناۋقاستاردى اي سايىن ۋچاسكەلىك دارىگەرلەر نەمەسە مەدبيكەلەر تەكسەرەدى. دارى-دارمەكتەردى ۇيگە تەگىن جەتكىزۋ ۇيىمداستىرىلدى. جىل سوڭىنا دەيىن 3900-دەن استام وزدىگىنەن جۇرە المايتىن پاسيەنت ۇيىندە تولىق مەديسينالىق تەكسەرۋدەن وتەدى.
ستوماتولوگيالىق كومەك، ونىڭ ىشىندە ءتىس پروتەزدەۋ، اعىمداعى جىلدىڭ باسىنان باستاپ 673 پاسيەنتكە كورسەتىلگەن. وسى ماقساتتار ءۇشىن ۇوس ارداگەرلەرىنىڭ قالالىق ەمحاناسىنا 2023 جىلعا الماتى بيۋدجەتىنەن 27 ملن تەڭگە ءبولىندى.
بارلىق مەديسينالىق ۇيىمداردا ۇوس ارداگەرلەرىنە جانە ولارعا تەڭەستىرىلگەن ادامدارعا ۇنەمى ەستەلىك سىيلىقتار مەن ازىق-تۇلىك سەبەتتەرى تاپسىرىلادى.
الماتى اكىمىنىڭ تاپسىرماسى بويىنشا الەۋمەتتىك قىزمەتتىڭ ماماندارى ارداگەرلەردى تۇراقتى ارالايدى، سونىڭ ناتيجەسىندە ولارعا قانداي كومەكتەر قاجەت ەكەنىن انىقتايدى جانە ونى اتاۋلى تۇردە كورسەتەدى.
- جوندەۋ جانە مونتاجداۋ جۇمىستارى؛
- تۇرمىستىق قۇرىلعىلاردى الۋعا كومەك كورسەتىلەدى؛
- نۇكتەلى ماتەريالدىق كومەك؛
- زاڭگەرلىك جانە باسقا كومەك.
مىسالى، ناۋرىزباي اۋدانىنىڭ ارداگەرىنىڭ كىرەبەرىسىنىڭ اعاش تەرەزەلەرى جاڭاسىنا اۋىستىرىلىپ، ەسىگىنىڭ الدىنا جاڭادان اسفالتت توسەلدى. الاتاۋ اۋدانىنىڭ ارداگەرىنە 1،5 ملن تەڭگەگە سۋ قۇبىرى مەن كارىز جەلىسىن تارتۋ جۇمىستارى جۇرگىزىلدى. وتىنىشتەر ءارتۇرلى جانە ەشقايسىسى نازاردان تىس قالمايدى.
اعا بۋىن الماتىلىقتاردىڭ ءومىر ءسۇرۋ ساپاسى جاقسارتۋ ءۇشىن مەگاپوليستە 50 مىڭنان استام ادامعا تەگىن الەۋمەتتىك قىزمەت كورسەتەتىن بەلسەندى ۇزاق ءومىر ءسۇرۋدىڭ 9 ورتالىعى جۇمىس ىستەيدى. 2023 جىلى تاعى ءبىر وسىنداي ورتالىق اشۋ جوسپارلانۋدا.
بيىلعى جىلى الماتى قالالىق ءماسليحات دەپۋتاتتارىنىڭ شەشىمىمەن ۇوس ارداگەرلەرى مەن ولارعا تەڭەستىرىلگەن ادامدارعا ءبىرجولعى كومەك سوماسىن ۇلعايتۋ ماقۇلداندى.
– وكىنىشكە وراي، سوعىس ارداگەرلەرى ازايىپ بارادى. الماتىدا 56 ارداگەر تۇرادى. مەن ولاردىڭ بارلىعى ءوز مەرەكەلەرىن امان-ەسەن قارسى العانىن قالايمىن جانە ءبىز ولاردى قۇتتىقتاۋعا مۇمكىندىك الدىق. كومەك تۋرالى: قاراجات قاراستىرىلعان، ءبىز ءاربىر ۇوس ارداگەرىنە ميلليون تەڭگەدەن تولەۋدى جوسپارلادىق، دەپۋتاتتاردان ولارعا 1،5 ملن تەڭگەدەن تولەۋ ءۇشىن تاعى بەس ءجۇز مىڭ تەڭگە قوسۋدى سۇرادىم، – دەدى قالا اكىمى اتاۋلى كۇنگە تولەم سوماسىن ۇلعايتۋ باستاماسىنا تۇسىنىكتەمە بەرگەندە.
ءبىرجولعى الەۋمەتتىك كومەكتىڭ جالپى سوماسى 85،5 ملن تەڭگەنى قۇرايدى
ۇوس ارداگەرلەرىنە تەڭەستىرىلگەن ادامدارعا دا 100 مىڭ تەڭگەدەن ءبىرجولعى تولەمدەر قاراستىرىلعان. ەڭبەك مايدانىنىڭ قاتىسۋشىلارى، ۇوس قاتىسقان ءبىراق قايتىس بولعان ارداگەرلەر مەن مۇگەدەكتەردىڭ ايەلدەرى 50 مىڭ تەڭگەدەن الادى.
جەڭىس كۇنىنە وراي جالپى سوماسى 975،4 ملن تەڭگەنىڭ الەۋمەتتىك تولەمدەرىن 13 290 الماتىلىق الاتىن بولادى.
