الماتى قالاسىنىڭ ريەۆيزيالىق كوميسسياسى ءبىلىم باسقارماسى مەن جۇمىسپەن قامتۋ جانە الەۋمەتتىك باعدارلامالار باسقارماسىنا جۇرگىزگەن تەكسەرىس ناتيجەسىندە 26،9 ملرد تەڭگە كولەمىندەگى قارجىنىڭ ارتىق جۇمسالۋى مەن ءتۇرلى قارجىلىق زاڭبۇزۋشىلىقتار انىقتالدى، دەپ حابارلايدى Dalanews.kz.
پيسما پرەزيدەنتۋ telegram ارناسى تاراتقان اقپاراتقا سايكەس، مۇنشا كولەمدەگى قارجىنىڭ تولىق قايتارىلۋى ەكىتالاي.
“ال بىرنەشە باسشىعا تەك سوگىس تۇرىندەگى جازا قولدانۋ ۇسىنىلعان”، - دەپ جازدى دەرەككوز.
قۇجاتقا سايكەس، اۋديت الماتى قالاسىنداعى بيۋدجەتتىك قاراجاتتىڭ ەڭبەكاقى تولەۋگە جانە مەكتەپكە دەيىنگى ۇيىمداردى تاماقتاندىرۋدى قامتاماسىز ەتۋگە جۇمسالۋ تيىمدىلىگىن باعالاۋعا باعىتتالعان. تەكسەرۋ 2021–2024 جىلدار ارالىعىن قامتىعان.
اۋديت بارىسىندا قالانىڭ ءبىلىم بەرۋ سالاسىنداعى 199 مەملەكەتتىك بالاباقشا، سونداي-اق، الەۋمەتتىك قىزمەت كورسەتۋ ورتالىقتارى قامتىلدى. مەملەكەتتىك اۋديتكە ونداعان بالاباقشا جانە تاعى باسقا 40-تان استام ۇيىم كىرگەن.
قورىتىندىدا الماتىدا مەكتەپكە دەيىنگى ءبىلىم بەرۋ جۇيەسىنە جۇكتەمەنىڭ ارتقانى، كادر تاپشىلىعى جانە بالاباقشا ورىندارىنا دەگەن سۇرانىستىڭ وسكەنى اتاپ وتىلەدى.
