الەۋمەتتىك جەلىلەردە الماتىدا «جاپپاي تازارتۋ ءجۇرىپ جاتىر» دەگەن اقپارات تارادى، دەپ حابارلايدى Dala News.
الايدا پوليسيا بۇل مالىمەتتى جوققا شىعارىپ، قالادا تەك جوسپارلى پروفيلاكتيكالىق رەيدتەر جۇرگىزىلىپ جاتقانىن مالىمدەدى.
قۇقىق قورعاۋ ورگاندارىنىڭ تۇسىندىرۋىنشە، مۇنداي تەكسەرۋلەر بەلگىلى ءبىر جاعدايلارعا بايلانىستى جۇيەلى تۇردە وتكىزىلىپ تۇرادى جانە تەك الماتىعا عانا ءتان ەمەس. وسىنداي رەيدتەر استانا مەن وزگە دە وڭىرلەردە جۇرگىزىلەدى.
پوليسيا وكىلدەرى قوعامدا تاراعان قاۋەسەتتەرگە بايلانىستى ناقتى ۇستانىم ءبىلدىردى.
«قانداي دا ءبىر “تازارتۋ” تۋرالى اڭگىمە جوق. بۇل – جوسپارلى جۇمىس. ەشقانداي “اڭ اۋلاۋ” بولمايدى. ءبىراق جول ەرەجەسىن ورەسكەل بۇزعاندارعا قاتىستى قاتاڭ شارالار قابىلدانادى»، – دەدى ولار.
سونىمەن قاتار جۋىردا بولعان اۋىر جول-كولىك وقيعاسىنا قاتىستى دا سۇراقتار كوتەرىلدى. اسىرەسە، جول اپاتىنا سەبەپ بولعان جۇرگىزۋشىنىڭ پوليسيادا تانىستارى بار دەگەن اقپارات قوعامدا قىزۋ تالقىلانۋدا.
بۇل ماسەلەگە قاتىستى ىشكى ىستەر مينيسترلىگى ارنايى كوميسسيا قۇرعان. ءقازىر اتالعان دەرەك جان-جاقتى تەكسەرىلىپ جاتىر. بەلگىلى بولعانداي، ءىس بويىنشا قىلمىستىق ءىس قوزعالىپ، ءبىرقاتار جاۋاپتى تۇلعالار قىزمەتىنەن بوساتىلعان. تەرگەۋ ناتيجەلەرى كەيىن جاريا ەتىلەدى.
پوليسيا وكىلدەرى جول قوزعالىسى ەرەجەلەرىنىڭ ماڭىزىن تاعى دا ەسكە سالدى. ولاردىڭ ايتۋىنشا، بۇل ەرەجەلەر جاي عانا تالاپ ەمەس، ادام ءومىرىن قورعاۋعا باعىتتالعان نورمالار. سوندىقتان قىزىل شامعا ءوتۋ، قارسى جولاققا شىعۋ سەكىلدى ورەسكەل بۇزۋشىلىقتارعا ەشقانداي كەشىرىم بولمايدى.
جول قاۋىپسىزدىگى ماسەلەسى قايتا كوتەرىلدى
وسى وقيعالار اياسىندا ەلدە جول قاۋىپسىزدىگىن كۇشەيتۋ ماسەلەسى تاعى دا كۇن تارتىبىنە شىقتى. سەناتور مارات قوجايەۆ ءبىرقاتار ناقتى ۇسىنىستارىن جاريالادى.
ونىڭ ايتۋىنشا، قازاقستاندا جول اپاتتارىنىڭ شامامەن 90%-ى جۇرگىزۋشىلەردىڭ كىناسىنەن بولادى. سوندىقتان باقىلاۋدى كۇشەيتۋ قاجەت.
سەناتور قالالاردا ورتاشا جىلدامدىقتى ولشەيتىن كامەرالار ورناتۋدى ۇسىندى. بۇل جۇيە جۇرگىزۋشىنىڭ بەلگىلى ءبىر ارالىقتاعى ورتاشا جىلدامدىعىن ەسەپتەپ، تۇراقتى تۇردە باقىلاۋعا مۇمكىندىك بەرەدى.
سونىمەن قاتار قوجايەۆ ورەسكەل جانە جۇيەلى تۇردە جول ەرەجەسىن بۇزاتىندارعا قاتىستى جازانى قاتاڭداتۋ قاجەت ەكەنىن ايتتى. اتاپ ايتقاندا، ايىپپۇلدى 50% جەڭىلدىكپەن تولەۋ مۇمكىندىگىن الىپ تاستاۋ ۇسىنىلعان ەدى.
«ءبىر جىل ىشىندە 10 رەتتەن ارتىق قۇقىقبۇزۋشىلىق جاسايتىن جۇرگىزۋشىلەر بار. وسىنداي ادامدار 11، 12 نەمەسە 13-رەت بۇزسا، ايىپپۇلدى تولىق تولەۋى ءتيىس»، – دەدى سەناتور.
بۇدان بولەك، ول جۇرگىزۋشى كۋالىگىن ۋاقىتشا شەكتەۋ، قايتا ەمتيحان تاپسىرۋ مىندەتى، ۇزاق مەرزىمگە قۇقىقتان ايىرۋ جانە اكىمشىلىك قاماۋ سياقتى شارالاردى دا قاراستىرۋدى ۇسىندى.
ساراپشىلاردىڭ پىكىرىنشە، مۇنداي وزگەرىستەر جولداعى ءتارتىپتى كۇشەيتىپ، ادام ولىمىنە اكەلەتىن اپاتتاردىڭ سانىن ازايتۋعا باعىتتالعان.
