الماتى قالاسىنىڭ "باقشاساراي" قابىلداۋ ۇيىندە “BUSINESS COLLABORATION FORUM 2023” بيزنەس-فورۋمى ءوتىپ جاتىر. فورۋمعا رەسپۋبليكانىڭ 51 وقۋ ورنىنىڭ مەكتەپ وقۋشىلارى مەن ستۋدەنتتەرى، كاسىپكەرلەر جانە ENACTUS باعدارلاماسىنىڭ قوناقتارى قاتىستى.
بيزنەس-فورۋم بارىسىندا قازاقستاننىڭ تۇكپىر-تۇكپىرىنەن جينالعان جاستار وزدەرىنىڭ بيزنەس-جوبالارىن ۇسىندى.
ءىس-شارانىڭ العىسوزىندە الماتى قالاسى اكىمىنىڭ ورىنباسارى الىشەر ءابدىقادىروۆ فورۋمعا قاتىسىپ جاتقان جاستارعا ساتتىلىك تىلەدى.
- 1995 جىلدان باستاپ قازاقستاندا ENACTUS جوباسى دارىندى جاستارعا جاڭا مۇمكىندىكتەر اشىپ، ولاردىڭ وزىندىك يدەيالارىن ەنگىزىپ، بيزنەس-جوبالاردى جۇزەگە اسىرۋدا. الماتى - ستۋدەنتتەر قالاسى. شاھاردا 35 جوو ورنالاسقان. وندا 200 مىڭعا جۋىق ستۋدەنت ءبىلىم الىپ كەلەدى.
وتكەن جىلى الماتى قالاسىنىڭ اكىمدىگىمەن 2025 جىلعا دەيىنگى قالانىڭ دامۋ باعدارلاماسى بەكىتىلدى. ونىڭ ىشىندە قالا جاستارىنا ءبىلىم بەرۋ، جۇمىسپەن قامتۋ، قاجەتتى ينفراقۇرىلىممەن قامتاماسىز ەتۋ ماسەلەلەرىنە اسا ءمان بەرىلدى.
قىسقا مەرزىمدى كۋرس وقىپ، جۇمىس تابۋعا مۇمكىندىك بەرەتىن JasAlmaty.kz پورتالى ىسكە قوسىلدى. ءساۋىر ايىندا جاس كاسىپكەرلەر كلۋبى قۇرىلدى. قورىتىندىلاي كەلە، ءارقايسىسىڭىزعا بيزنەستە تابىسقا جەتۋدى تىلەيمىن، - دەدى الماتى قالاسى اكىمىنىڭ ورىنباسارى الىشەر ءابدىقادىروۆ.
ENACTUS Kazakhstan ۇيىمىنىڭ پرەزيدەنتى البينا ەرجانوۆا ەلىمىزدىڭ “ENACTUS WORLD CUP 2024” ستۋدەنتتىك كاسىپكەرلىكتىڭ الەمدىك كۋبوگىن وتكىزۋ قۇقىعىن جەڭىپ العانىن اتاپ ءوتتى.
- وقۋ جىلىنىڭ سوڭىندا ۇزدىك بيزنەس-جوبالار ENACTUS Kazakhstan كۋبوگىنا قاتىسادى. وندا جەڭىسكە جەتكەن جوبا الەمدىك جارىسقا جولداما الادى.
جاقىندا عانا ءبىز ENACTUS-تىڭ الەمدىك كۋبوگىنان كەلدىك. وندا قازاقستان كەلەسى جىلى وتەتىن ستۋدەنتتىك كاسىپكەرلىكتىڭ الەمدىك كۋبوگىن وتكىزۋ قۇقىعىنا العاش رەت يە بولدى. الەمنىڭ ۇزدىك ۋنيۆەرسيتەتتەرى مەن ۇزدىك كوماندالارى استانا قالاسىندا 2024 جىلى جينالادى، - دەدى ENACTUS Kazakhstan ۇيىمىنىڭ پرەزيدەنتى البينا ەرجانوۆا.
سونداي-اق، فورۋم اياسىندا ENACTUS Kazakhstan EXPO - يننوۆاسيالىق، ەكولوگيالىق، الەۋمەتتىك، digital جانە بيزنەس جوبالار كورمەسى ۇيىمداستىرىلدى.
- ءبىزدىڭ جوبامىزدىڭ اتى - “Silk Route”. بۇل جوبامەن 2022 جىلدان بەرى اينالىسىپ كەلەمىز. قازاقستان بويىنشا شۋنگيت ونىمدەرىن تەك تالدىقورعان اۋماعىندا كوكسۋ اۋىلىندا تابۋعا بولادى. ءبىز وسى شيكىزاتتى پايدالا وتىرىپ 4 ءونىم شىعارامىز: ۇنتاق، سابىن، اكسسەسۋار جانە سۋسىن. ولار تەرى اۋرۋلارىنىڭ قابىنۋىن ەمدەۋگە كومەكتەسەدى. ونىڭ بارلىعىن ءبىز قولمەن جاساپ وتىرمىز.
ءبىراق 2024 جىلدان باستاپ تالدىقورعان قالاسىندا كاسىپكەرلەرمەن كەلىسىپ زاۋىتتا شىعارۋدى جوسپارلاپ وتىرمىز. ءقازىر جوبامىزدىڭ تابىسى 700 مىڭنان استى، - دەدى ENACTUS جانسۇگىروۆ كوللەدج كومانداسىنىڭ وكىلى مەيرامبەك ومارحان.
