سوت كەرىموۆ، اۋباكىروۆ، قاسىمجانوۆ جانە ۋالييەۆتى "جاپپاي تارتىپسىزدىككە قاتىستى"، "ءسوز بايلانىسىپ مەملەكەتتىك عيماراتقا شابۋىلدادى" دەپ ايىپتاسا، تاستانبەكوۆكە "جاپپاي تارتىپسىزدىككە قاتىستى" دەگەن ايىپ تاعىلدى.
پروكۋرور سوتتا بەس مارقۇم الماتىداعى اكىمدىككە جانە پرەزيدەنت رەزيدەنسياسىنا شابۋىل جاسادى جانە كىنالارى تولىق دالەلدەندى دەدى. بەس ايىپتالۋشى دا الماتىدا قاڭتار وقيعاسى كەزىندە قازا تاپقان.
ايىپتى دەپ تانىلعان مارقۇمداردىڭ جاقىندارى سوت ۇكىمىمەن كەلىسپەيتىنىن مالىمدەپ، اپەللياسيالىق شاعىم تۇسىرەتىنىن ايتقان.
ماسەلەن، شىڭعىس تاستانبەكوۆتىڭ اپكەسى شىنار تاستانبەكوۆا سوتتان كەيىن Qazaq Times سايتىنا "بۇل – ارۋاقتاردى قورلاۋ، جوعارعى ينستانسياعا شاعىمدانامىز" دەدى.
قازاقستاندا بىلتىر بولعان قاڭتار وقيعاسىندا قازا تاپقان بىرنەشە ادام بۇعان دەيىن دە ايىپتى دەپ تانىلعان. بيىل اقپاندا تارازدا قاڭتار قىرعىنى كەزىندە مەرت بولعان التى ادام "جاپپاي تارتىپسىزدىككە قاتىستى"، "قارۋ الىپ ءجۇردى" دەپ ايىپتالعان. ولاردىڭ اراسىندا وققا ۇشقان 17 جاستاعى اندرەي وپۋشييەۆ تە بار. بۇل سوتتار قوعامدا "ارۋاقتار سوتى" اتالىپ كەتكەن ەدى.
بۇدان بولەك ەلدە تەرگەۋ مەن سوت قاڭتاردا وققا ۇشىپ قازا تاپقان ادامداردىڭ كەيبىرىنىڭ سۇيەگىن قازىپ الىپ، قايتا تەكسەرگەن. مارقۇمداردىڭ جاقىندارى دا بۇعان قارسى بولعان.
238 ادامنىڭ ءومىرىن قيعان قاڭتار قىرعىنى بويىنشا سوت پروسەستەرى اياقتالىپ كەلەدى. باس پروكۋراتۋرانىڭ مالىمەتىنشە، ەلدە 1600-دەن استام ادامعا قاڭتار بويىنشا ۇكىم شىققان. الماتى، تاراز، شىمكەنت، اقتوبە، سەمەي، قىزىلوردا، اتىراۋ جانە تالدىقورعان قالالارىندا جۇزدەگەن ادامنىڭ سوتى وتكەن.
ولارعا "جاپپاي تارتىپسىزدىك"، "قارۋ-جاراق ۇرلاۋ"، "عيماراتتاردى باسىپ الۋ" جانە وزگە دە باپتار بويىنشا ايىپ تاعىلعان. ەلدە قاڭتار وقيعاسىنا بايلانىستى ايىپتالعان ءبىراز ادام راقىمشىلىق زاڭىمەن بوساپ شىققان.
