2 mamyrda Almatydaǵy Bostandyq aýdany №2 soty Qańtar oqiǵasynda qaza tapqan bes marqum Serik Kerimov, Qanat Áýbákirov, Nurbolat Qasymjanov, Aslan Ýaliev, Shyńǵys Tastanbekovti aiypty dep tanydy. Bul týraly Qazaq Times saity habarlady.
Sot Kerimov, Áýbákirov, Qasymjanov jáne Ýálievti "jappai tártipsizdikke qatysty", "sóz bailanysyp memlekettik ǵimaratqa shabýyldady" dep aiyptasa, Tastanbekovke "jappai tártipsizdikke qatysty" degen aiyp taǵyldy.
Prokýror sotta bes marqum Almatydaǵy ákimdikke jáne prezident rezidentsiiasyna shabýyl jasady jáne kinálary tolyq dáleldendi dedi. Bes aiyptalýshy da Almatyda Qańtar oqiǵasy kezinde qaza tapqan.
Aiypty dep tanylǵan marqumdardyń jaqyndary sot úkimimen kelispeitinin málimdep, apelliatsiialyq shaǵym túsiretinin aitqan.
Máselen, Shyńǵys Tastanbekovtiń ápkesi Shynar Tastanbekova sottan keiin Qazaq Times saityna "bul – arýaqtardy qorlaý, joǵarǵy instantsiiaǵa shaǵymdanamyz" dedi.
Qazaqstanda byltyr bolǵan Qańtar oqiǵasynda qaza tapqan birneshe adam buǵan deiin de aiypty dep tanylǵan. Biyl aqpanda Tarazda Qańtar qyrǵyny kezinde mert bolǵan alty adam "jappai tártipsizdikke qatysty", "qarý alyp júrdi" dep aiyptalǵan. Olardyń arasynda oqqa ushqan 17 jastaǵy Andrei Opýshiev te bar. Bul sottar qoǵamda "arýaqtar soty" atalyp ketken edi.
Budan bólek elde tergeý men sot Qańtarda oqqa ushyp qaza tapqan adamdardyń keibiriniń súiegin qazyp alyp, qaita teksergen. Marqumdardyń jaqyndary da buǵan qarsy bolǵan.
238 adamnyń ómirin qiǵan Qańtar qyrǵyny boiynsha sot protsesteri aiaqtalyp keledi. Bas prokýratýranyń málimetinshe, elde 1600-den astam adamǵa Qańtar boiynsha úkim shyqqan. Almaty, Taraz, Shymkent, Aqtóbe, Semei, Qyzylorda, Atyraý jáne Taldyqorǵan qalalarynda júzdegen adamnyń soty ótken.
Olarǵa "jappai tártipsizdik", "qarý-jaraq urlaý", "ǵimarattardy basyp alý" jáne ózge de baptar boiynsha aiyp taǵylǵan. Elde Qańtar oqiǵasyna bailanysty aiyptalǵan biraz adam raqymshylyq zańymen bosap shyqqan.
