وسكەمەن قالاسى، اياگوز، زىريان، گلۋبوكوە، كاتونقاراعاي، ۇلان، ءۇرجار، كوكپەكتى، شەمونايحا جانە تارباعاتاي اۋداندارىنىڭ ونىمدەرى قويىلعان ساۋدا قالاشىعى ەكى كۇن بويى شيەۆچەنكو كوشەسىنىڭ بويىنداعى عىلىم اكادەمياسىنىڭ الدىنداعى الاڭدا جۇمىس ىستەيتىن بولادى.
الماتىلىقتار ءۇشىن 40 توننادان استام ءتۇرلى بال جانە بال ونىمدەرى، پانتى ءونىمىنىڭ 27 ءتۇرى اكەلىنەدى. سونىمەن قاتار قالا تۇرعىندارى قولونەر بۇيىمدارىن ساتىپ الۋ مۇمكىندىگىنە يە بولادى.
جينالعان جۇرتشىلىققا بال جارمەڭكەسى بارىسىندا شىعىس قازاقستان وبلىسىنىڭ شىعارماشىلىق ۇجىمدارىنىڭ كونسەرتى ۇسىنىلادى.
سونداي-اق، الماتى قالاسىنىڭ تۇرعىندارى 2016 جىلى شىعىس قازاقستاننىڭ 5 كونە ەسكەرتكىشىندە جۇرگىزىلگەن ارحەولوگيالىق قازبالاردىڭ جادىگەرلەرىمەن تانىسا الادى. كورمەدە بەرەل قورعانى، شىلىكتى جازىعى، ابلايكيت قامال-موناستىرىندە، قىرىقۇڭگىر مەن ەلەكە سازىندا تابىلعان ارتەفاكتىلەر كورمەگە قويىلماق.
