بۇگىن تاڭعى ۋاقىتتا الماتى قالاسى، جەتىسۋ اۋدانى، توباياقوۆ كوشەسىندە ورنالاسقان قويمالاردىڭ بىرىنەن ءورت شىقتى،- دەپ حابارلايدى Dalanews.kz

قالالىق توتەنشە جاعدايلار دەپارتامەنتىنىڭ مالىمەتىنشە، ساعات 09:52-دە قويمادان شىققان ءورت تۋرالى حابارلاما تۇسكەن. وقيعا ورنىنا ءورت سوندىرۋشىلەر جوعارى دارەجەلى دابىلمەن جونەلتىلدى.

تجم قىزمەتكەرلەرى كەلگەن ساتتە قويما تولىعىمەن وتقا ورانعانى انىقتالعان. ءورتتى ءسوندىرۋ جۇمىستارى بىردەن ۇيىمداستىرىلىپ، جەدەل شتاب قۇرىلدى. قالانىڭ بارلىق جەدەل ارەكەت ەتۋ قىزمەتتەرى جۇمىلدىرىلدى. ءورتتىڭ وتتەگىمەن قارقىندى جانۋى جانە جىلۋ ساۋلەسىنىڭ جوعارى بولۋى جاعدايدى قيىنداتقان.

"قالالىق تجد باستىعىنىڭ باسشىلىعىمەن ءۇش جەدەل ءورت ءسوندىرۋ ۋچاسكەسى قۇرىلىپ، بىرنەشە سۋ وقپاندارى ىسكە قوسىلدى. سۋ ۇزدىكسىز بەرىلىپ، وتتىڭ تارالۋىنا جول بەرىلمەۋ ءۇشىن بارلىق شارالار قولدانىلدى"، - دەلىنگەن حابارلامادا.

الدىن الا مالىمەت بويىنشا، ءورت شامامەن 500 شارشى مەتر اۋماقتى شارپىعان. وقيعا سالدارىنان زارداپ شەككەندەر جوق. ءورت ءسوندىرۋ بولىمشەلەرىنىڭ جەدەل ارەكەتىنىڭ ارقاسىندا كاسىپكەرلەردىڭ كورشىلەس قويمالارىنداعى تاۋارلىق-ماتەريالدىق قۇندىلىقتار تولىق ساقتالىپ قالدى.

ءورتتىڭ ناقتى شىعۋ سەبەبى انىقتالۋدا.