الماتىدا مۇحتار شاحانوۆتى اقتىق ساپارعا شىعارىپ سالۋ ءراسىمى ءوتتى، دەپ حابارلايدى Dalanews.kz.
الماتىداعى اباي اتىنداعى قازاق ۇلتتىق وپەرا جانە بالەت تەاترىندا وتكەن قارالى جيىندا زيالى قاۋىم وكىلدەرى، اقىننىڭ جاقىندارى مەن وقىرماندارى جينالدى.
جيىندى قازاقستان جازۋشىلار وداعى باسقارماسىنىڭ ءتوراعاسى مەرەكە قۇلكەنوۆ جۇرگىزدى.
پرەزيدەنت قاسىم-جومارت توقايەۆتىڭ كوڭىل ايتۋ جەدەلحاتىن سەنات ءتوراعاسى ماۋلەن اشىمبايەۆ جەتكىزدى. حاتتا مۇحتار شاحانوۆتىڭ قازاق پوەزياسى مەن ۇلتتىق رۋحانياتقا قوسقان زور ۇلەسى اتاپ ءوتىلدى.
ماۋلەن اشىمبايەۆ اقىننىڭ ەل مۇددەسىن قورعاعان قايراتكەرلىگىنە، ازاماتتىق ۇستانىمى مەن ۇلتتىق قۇندىلىقتاردى دارىپتەۋدەگى ەڭبەگىنە توقتالىپ، ونىڭ جارقىن بەينەسى حالىق جادىندا ماڭگى ساقتالاتىنىن جەتكىزدى.
ءماجىلىس ءتوراعاسى شەتەلدىك ءىسساپاردا بولۋىنا بايلانىستى، ونىڭ كوڭىل ايتۋ حاتىن ءبىر توپ دەپۋتات استانادان ارنايى كەلىپ جەتكىزدى.
سونىمەن قاتار، مۇحتار شاحانوۆتى اقتىق ساپارعا شىعارىپ سالۋ راسىمىنە پرەمەر-مينيستردىڭ ورىنباسارى - قازاقستان رەسپۋبليكاسىنىڭ مادەنيەت جانە اقپارات ءمينيسترى، الماتى اكىمى دارحان ساتىبالدى قاتىستى.
ودان بولەك، كورشىلەس ەلدەردىڭ ارنايى وكىلدەرى دە كەلىپ، اقىندى جوقتادى. شاراعا قىرعىزستاننىڭ پرەزيدەنتى سادىر جاپاروۆتىڭ كەڭەسشىسى شولپانبەك ابىقايەۆ قاتىسىپ، قۇرمەت كورسەتتى.
مۇحتار شاحانوۆتىڭ ءومىر جولى تەك ادەبيەتپەن شەكتەلگەن جوق.
ول جۋرناليستيكادان باستاپ، ساياساتقا دەيىنگى كەڭ اۋقىمدا قىزمەت ەتتى. كەزىندە كسرو جوعارعى كەڭەسى مەن قازاقستان پارلامەنتىندە دەپۋتات بولدى، ۇلتتىق مۇددە ماسەلەلەرىندە باتىل پوزيسياسىمەن تانىلدى.
1986 جىلعى جەلتوقسان وقيعاسىنا قاتىستى كرەمل مىنبەرىنەن ءسوز سويلەگەن ساناۋلى تۇلعالاردىڭ ءبىرى ەدى.
