№139 مەكتەپتىڭ ەسەبى
الماتىدا باستاۋ العان مەكتەپ ديرەكتورلارىنىڭ ەسەپتى كەزدەسۋى كۇن ۇياسىنا باتىپ، قاس قارايعاندا باستالدى. كۇندىز جۇمىستان قولى بوسامايتىن اتا-انالارعا ىڭعايلى بولۋى ءۇشىن كەزدەسۋدى ءبىلىم وشاقتارى كەشكى مەزگىلدە ۇيىمداستىرىپتى. و باستا كەش باتىپ، قاراڭعىلىق قويۋلانا تۇسكەندە مۇنداي جينالىسقا اتا-انالار از كەلەتىن شىعار دەپ ويلاعان ەدىك. دەگەنمەن اۋەزوۆ اۋدانىنداعى ا.بايتۇرسىنوۆ اتىنداعى №139 مەكتەپ گيمنازيانىڭ ءماجىلىس زالىنا كەلىپ كىرگەنىمىزدە 300-گە تارتا ادام ەركىن سياتىن زالدا ينە شانشار ورىن بولماعاندا ويىمىزدىڭ قاتە ەكەنىنە كوز جەتكىزگەندەي بولدىق. قالىڭ كوپشىلىكتىڭ اراسىندا جاس اتا-انالار مەن نەمەرەسىنىڭ سوڭىنان ەرىپ كەلگەن ەگدە تارتقان كىسىلەردىڭ بار ەكەنىن بايقادىق. ءبارى مەكتەپ ديرەكتورىنىڭ ەسەبىن تىڭداۋعا قۇمارتىپ كەلگەنى بايقالىپ تۇر. ەل اياعى تولىق جينالعان №139 مەكتەپ گيمنازياسىنىڭ ديرەكتورى ەرىك قۋاتبەكوۆ ءسوز باستادى:
– قۇرمەتتى اتا-انالار، الماتى قالاسىنىڭ اكىمى باۋىرجان بايبەك مىرزانىڭ نۇسقاۋى بويىنشا بۇدان بىلاي قالامىزداعى مەكتەپ ديرەكتورلارى ءار توقسان سايىن مەملەكەت تاراپىنان مەكتەپكە بولىنگەن قاراجاتتاردىڭ قايدا جۇمسالىپ جاتقانى جايىندا ەسەپ بەرىپ تۇراتىنىن وزدەرىڭىز دە بىلەسىزدەر. ءوز باسىم بۇل ءىس-شارا مەكتەپ پەن اتا-انالار اراسىن جاقىنداتىپ، ءبىلىم بەرۋ مەكەمەلەرىنىڭ اشىقتىعىن قامتاماسىز ەتەدى دەپ ەسەپتەيمىن. سوندىقتان ءبىزدىڭ مەكتەپ ۇجىمى اكىمنىڭ بۇل باستاماسىنا جىلى قابىلداپ، قولداۋ ءبىلدىردى، – دەپ مەكتەپ باسشىسى كوكەيگە تۇيگەن ويىن ورتاعا سالدى. اڭگىمە باسىندا مەكتەپتىڭ تاريحى مەن جەتكەن جەتىستىگىنە قىسقاشا توقتالىپ، جينالعان قاۋىمعا قىسقاشا مالىمەت بەرىپ ءوتتى.
– ءاربىر اتا-انا بالاسى ءبىلىم الاتىن ءبىلىم وشاعىنا مەملەكەت تاراپىنان قانشالىقتى قارجى بولىنەتىنىن ءبىلىپ وتىرۋى ماڭىزدى. جۇزدەگەن مىڭ سالىق تولەۋشىلەردىڭ ەسەبىنەن قۇرالاتىن بۇل قارجىنىڭ ءتيىمدى باعىتتا جۇمسالۋى ءبارىمىز ءۇشىن ماڭىزدى ماسەلە. ەندى قارجىلىق ەسەبىمىزگە كوشسەك. 2015 جىلى ا.بايتۇرسىنوۆ اتىنداعى №139 مەكتەپ گيمنازياسىنا 187 676 000 تەڭگە ءبولىندى. سونىڭ ىشىندە جەرگىلىكتى بيۋدجەت ەسەبىنەن بولىنگەن قارجى – 170 097 000 تەڭگەنى قۇراسا، رەسپۋبليكالىق بيۋدجەتتەن 17 579 000 تەڭگە ءبولىندى. ەندى وسى قاراجاتتاردىڭ قالاي جۇمسالىنىپ جاتقانىن ايتىپ بەرسەم. وسى رەتتە مىنا ءبىر ماسەلەنى ايتا كەتسەم. ءقازىر قالاداعى ءبىرلى-جارىم مەكتەپتە ارنايى شوتتارى بار. بۇل ەسەپ شوتقا اۋقاتتى اتا-انالار قارجى اۋدارىپ، دەمەۋشىلىك جاساپ تۇرادى. ال ءبىزدىڭ مەكتەپتە مۇنداي ەسەپ شوتتار جوق. اتا-انالار تاراپىنان اقشا جينالمايتىنىن وزدەرىڭىز دە جاقسى بىلەسىزدەر. ۇستىمىزدەگى جىلدىڭ 9 ايىندا مەكتەبىمىزدىڭ كىرىسى 151 381 000 تەڭگەنى قۇراسا، ءدال وسى كەزەڭدەگى شىعىس تا 151 381 000 تەڭگەنى قۇراعان. ەندى مەملەكەت تاراپىنان بولىنگەن قارجىنىڭ قالاي جۇمسالعانىنا توقتالسام. قىزمەتكەرلەر مەن جۇمىسشىلاردىڭ ەڭبەكاقىسىنا 120 498 000 تەڭگە قاراستىرىلعان. قوسىمشا اقشالاي تولەمدەر – 1 950 000 تەڭگەنى (قالا اكىمىنىڭ سىيلىعى 3 جاس مامانعا 150 000 تەڭگەدەن بەرىلىپ، 5 ءمۇعالىم 300 000 تەڭگەدەن الدى) قۇرادى. وتەماقىلىق تولەمدەر 5 600 000 تەڭگە بولسا، الەۋمەتتىك سالىققا 5 062 000 تەڭگە تولەندى. ال الەۋمەتتىك اۋدارىمدارعا 4 455 000 تەڭگە ءبولىندى. كوممۋنالدىق تولەمدەرگە 4 314 000 تەڭگە ءبولىنىپ، ونىڭ 2 734 000 تەڭگەسى مەكتەپتە جىلىتۋ جۇيەسىنە جۇمسالسا، سۋىق سۋمەن قامتۋ مەن كارىز قۇبىرلارى قىزمەتىنە 530 000 تەڭگە تولەنگەن. سول سياقتى ەلەكتر قۋاتىنا 1 050 000 تەڭگە، بايلانىس قىزمەتىنە (تەلەفون، ينتەرنەت) 207 000 تەڭگە ءبولىنىپ وتىر. بارلىق نورمالارعا سايكەس، گيمنازياداعى سىنىپ ساندارىن ەسكەرە وتىرىپ جوسپارلانعان كەرەكتى شارۋاشىلىق زاتتار تومەندەگىدەي ءتىزىم بويىنشا 2 467 000 تەڭگەگە ساتىپ الدىق. كەڭسە تاۋارلارىنا – 200 000 تەڭگە، كورنەكىلىك قۇرالدار مەن سپورتتىق تاۋارلارعا – 200 000 تەڭگە، باسپاسوزگە 100 000 تەڭگە، اۋىز سۋى مەن پلاستيكالىق ستاكاندارعا جوسپار بويىنشاي 9 ايعا 415 000 تەڭگە جۇمسالدى. اعىمداعى جوندەۋ جۇمىستارىنا 3 255 000 تەڭگە ءبولىنىپ، مەملەكەتتىك ساتىپ الۋدىڭ باعا ۇسىنىستارى تاسىلىمەن 24.04.2015ج. № 766800 قورىتىندىسىنا سايكەس «كازەنەرگو سوmpany» سەرىكتەستىگى ۇتىپ الىپ، اعىمداعى جوندەۋ جۇمىستارىن كورسەتىلگەن تەحنيكالىق سىناپتاماعا سايكەس جۇرگىزدى. مەكەمەنىڭ كەشەندى كۇزەت قىزمەتىنە 2 032 560 تەڭگە جۇمسالدى. 1-4 سىنىپ وقۋشىلارىن تەگىن ىستىق تاماقپەن قامتاماسىز ەتۋ ماقساتىندا 14 175 000 تەڭگە جۇمسالدى. تاماقتاندىرۋ وقۋشىلاردىڭ سانىنا جانە كەلىسىلىپ بەكىتىلگەن «اس ءمازىرى» نەگىزىندە جۇزەگە اسىرىلدى. اي سايىن مەكەمەنىڭ كەشەندى كۇزەت، ورتكە قارسى دابىل، بەينەباقىلاۋ قاداعالاۋ قىزمەتتەرى ءۇشىن «بونا» جشس-نە 1 332 000 تەڭگە، قوقىس شىعارۋعا 108 000 تەڭگە، مەكتەپ عيماراتىن دەزينفەكسيالاۋعا 90 000 تەڭگە، مەكەمە قىزمەتكەرلەرىن كەزەكتى مەديسينالىق كورسەتۋدەن وتكىزۋگە 180 000 تەڭگە ءبولىندى. مەكەمەدەگى وفيستىك تەحنيكالاردى اعىمداعى جوندەۋ جۇمىستارىنا 180 000 تەڭگە ءبولىنىپ، جوسپار بويىنشا جوندەۋ جۇمىستارى جۇرگىزىلدى. سونىمەن قاتار، باسقا اۋدارۋلارعا بانكتىك قىزمەتتەر ءۇشىن 270 000 تەڭگە تولەنىپ تۇرادى. وقۋشىلاردى ۇبت-عا جەتكىزۋ، «جاس تۇلەك» مەكتەپ بىتىرۋشىلەر فەستيۆالىنە اپارىپ-الىپ كەلۋ ءۇشىن ترانسپورتتىق قىزمەتكە – 130 000 تەڭگە ءبولىنىپ، پايدالانۋ ۋاقىتىن ەسكەرە وتىرىپ تولەندى. گيمنازيادا ارنايى مەديسينالىق بولمە جۇمىس جاسايدى جانە بارلىق كەرەك-جابدىقتارمەن قامتاماسىز ەتىلگەن. بالالارعا العاشقى كومەك كورسەتۋ ماقساتىندا بيۋدجەت قاراجاتىنان 65 000 تەڭگەگە دارى-دارمەكتەر ساتىلىپ الىنعان. جالپىعا مىندەتتى ورتا ءبىلىم قورىنان قاراجاتتى قولدانۋ، جاعدايى تومەن وتباسىنان شىققان وقۋشىلارعا ماتەريالدىق كومەك كورسەتۋ نەگىزىندە اتا-انالاردىڭ ءوتىنىشى بويىنشا 33 از قامتىلعان بالاعا 1 200 000 تەڭگە كولەمىندە ماتەريالدىق كومەك رەتىندە بەرىلدى، – دەپ ەرىك نۇرعۇمار ۇلى مەملەكەت تاراپىنان بولىنگەن قارجىنىڭ قايدا جۇمسالعانىن جىپكە تىزگەندەي بايانداپ بەردى.
مەكتەپ ديرەكتورىنىڭ بايانداماسىنا قۇلاق تۇرگەنىمىزدە ا.بايتۇرسىنوۆ اتىنداعى №139 مەكتەپ گيمنازياسىندا ءقازىر ۇزىن سانى 120 ادام ەڭبەك ەتەتىنىن بىلدىك. ولاردىڭ 85ء-ى پەداگوگ ماماندار بولسا، قالعانى 35ء-ى كىشى قىزمەتكەرلەر ەكەن. ءوز كەزەگىندە اتا-انالار مەكتەپ ديرەكتورىنىڭ بايانداماسىنا ريزاشىلىقتارىن ءبىلدىرىپ، العاستارىن ايتتى. ەسەپتى كەزدەسۋدە اتا-انالار قۇرىلعانىنا 25 جىل تولىپ وتىرعان مەكتەپكە كۇردەلى جوندەۋ جۇمىستارى قاشان جۇرگىزىلەتىنىن سۇرادى. ءوز كەزەگىندە مەكتەپ ديرەكتورى ەرىك قۋاتبەكوۆ بۇل ماسەلەنى ءوزى دە كوتەرىپ جۇرگەنىن العا تارتتى. ول الماتى ءبىلىم باسقارماسىنىڭ مەكتەپكە كۇردەلى جوندەۋ جۇمىسىن جۇرگىزۋدى قاجەت دەپ تاۋىپ، كەزەككە قويعانىن ءمالىم ەتتى. وسىلايشا اتا-انالار مەن مەكتەپ باسشىلىعى العاشقى كەزدەسۋدە جىلى جۇزبەن تارقاستى.
№86 مەكتەپتىڭ ەسەبى
اراعا ءبىر كۇن سالىپ اۋەزوۆ اۋدانىندا ورنالاسقان ع.مۇسىرەپوۆ اتىنداعى №139 مەكتەپ گيمنازياسىنىڭ تابالدىرىعىن اتتادىق. ءبىزدى مەكتەپ ديرەكتورى قالدىقىز مۇسايەۆا جىلى جۇزبەن قارسى الدى. مەجەلى ۋاقىتتان ءسال ەرتەرەك بارعانىمىزدىڭ ارقاسىندا مەكتەپتىڭ وتكەن-كەتكەن تاريحىمەن ازداپ تانىسۋعا مۇمكىندىك الدىق. تاياۋدا عانا كۇردەلى جوندەۋ جۇمىسىنان وتكەن مەكتەپتىڭ ءىشى كوزدىڭ جاۋىن الادى. ارنايى زالدارعا قويىلعان كورنەكىلىك قۇرالدار دا ادامدى تارتىپ، مەكتەپ جايىندا مول ماعلۇمات بەرىپ تۇر. وزات وقۋشىلاردىڭ تاقتاسىنا كوز سالعانىمىزدا ءبىلىم وشاعىندا بىلىمگە قۇشتار جاس جەتكىنشەكتەردىڭ كوپ ەكەنىن بايقاعانداي بولدىق. مەكتەپ ديرەكتورى تاياۋدا عانا اۋەزوۆ اۋدانى ءبىلىم ءبولىمىنىڭ باسشىسى قىزمەتىنە تاعايىندالعان تاجىريبەلى پەداگوگ، بىلىكتى ۇيىمداستىرۋشى گۇلنار حودجابەرگەنوۆانى مەكتەپ ىشىندە ۇيىمداستىرىلعان سىرباز جازۋشى عابيت مۇسىرەپوۆتىڭ مۇراجاي كەشەنىنە باستادى. مۇرايجاعا باس سۇققانىمىزدا جازۋشىنىڭ ءار جىلدارى جارىق كورگەن كىتاپتار مەن قولجابالارى كوزىمىزگە شالىندى. ءبىر بۇرىشتا عابەڭنىڭ قىرى سىنباعان كاستيۋم شالبارى كوزىمىزگە وتتاي باسىلدى. ءوز كەزەگىندە قالدىقىز ايتجان قىزى مۇراجايدىڭ جادىگەرلەرىن جيناقتاۋ بارىسىندا ع.مۇسىرەپوۆتىڭ ۇرپاقتارى كوپ كومەك كورسەتكەنىن العا تارتتى. بۇدان كەيىن مەكتەپتىڭ اسحاناسىن، ارنايى سىنىپتارىن ارالاپ تاماشالادىق. كۇردەلى جوندەۋ جۇمىسىنىڭ ارقاسىندا ءبىلىم ورداسى اجارلانىپ، جاس جەتكىنشەكتەردىڭ الاڭسىز ءبىلىم الۋىنا مۇمكىندىك تۋىپ تۇرعانىن العا تارتتى.
كەڭ زالعا كەلىپ كىرگەنىمىزدە №86 مەكتەپ-گيمنازيانىڭ اتا-انالارى مەكتەپ ديرەكتورىنىڭ قارجىلىق ەسەبىن تىڭداۋعا قىزىعۋشىلىق تانىتقانىن بايقاعانداي بولدىق. ءۇش جۇزدەي ادام ەركىن سياتىن زالدىڭ ءىشى لىق تولى. ءبارى مەكتەپ ديرەكتورىنىڭ ەسەبىن تىڭداۋعا اسىق. مىنبەگە كوتەرىلىپ، جيىن تىزگىنىن قولعا العان قالدىقىز مۇسايەۆا جينالعان قاۋىمعا مەكتەپتىڭ تاريحى مەن جەتكەن جەتىستىگى جايىندا دايىندالعان بەينەفيلمىن اتا-انالاردىڭ نازارىنا ۇسىندى.
– تاياۋدا عانا الماتى قالاسى اكىمى بولىپ تاعايىندالعان باۋىرجان بايبەك مىرزا جەمقورلىق دەرتىنىڭ تۇبىرىنە بالتا شابۋ ماقساتىندا ءبىلىم بەرۋ مەكەمەلەرى باسشىلارىنىڭ مەملەكەت تاراپىنان بولىنگەن قارجىسىن قالاي جۇمساپ جاتقانى جايىندا ەسەپ بەرۋ تۋراسىندا ارنايى بۇيرىعى شىقتى. اكىمنىڭ تىڭ باستاماسىنا ءبىزدىڭ №86 مەكتەپ-گيمنازياسى دا قولداۋ ءبىلدىرىپ، وزدەرىڭىزبەن كەزدەسىپ وتىرعان جايىمىز بار. الداعى ۋاقىتتا ءار توقسان سايىن مەملەكەت تاراپىنان بولىنەتىن قارجىنىڭ قالاي جۇمسالىپ جاتقانىن ەسەپتى كەزدەسۋلەردەن ءبىلىپ وتىراسىزدار، – دەپ مەكتەپ ديرەكتورى ق.مۇسايەۆا ءسوزىن ارى قاراي جالعادى.
– ەندى نەگىزگى ماسەلەمىزگە كوشسەك. 2015 جىلدىڭ 9 ايىندا مەكتەبىمىزگە مەملەكەت تاراپىنان 142 ملن. تەڭگە ءبولىندى. سونىڭ 130 ملن. تەڭگەسى جەرگىلىكتى بيۋدجەت ەسەبىنەن بولىنسە، قالعان 11،6 ملن. تەڭگەسى رەسپۋبليكالىق بيۋدجەت ەسەبىنەن ءبولىنىپ وتىر. وسى رەتتە مىنا ءبىر ماسەلەنى ايتا كەتۋ كەرەك دەپ ەسەپتەيمىن. ءبىزدىڭ مەكتەبىمىزدە ەشقانداي قايىرىمدىلىق ەسەپشوتى جۇمىس ىستەمەيدى. اتا-انالار تاراپىنان مەكتەپ قاجەتتىلىگى ءۇشىن ەشقانداي قارجى جينالمايتىنىن وسىدان بايقاۋعا بولادى. ەندى جوعارىدا اتاپ وتكەن قارجىنىڭ قالاي جۇمسالعانىنا توقتالساق. جالپى، بولىنگەن قارجىنىڭ باسىم بولىگى ۇستازداردىڭ جالاقىسىنا جۇمسالىپ، بۇل ماقساتقا 96،7 ملن. تەڭگە قاراستىرىلدى. ال الەۋمەتتىك تولەمدەر 4،7 ملن. تەڭگەنى قۇراعان. سول سياقتى بيىل ۇزدىك ۇستاز بەن 9 جاس مامانعا سىياقى قارجى بەرىپ، 2،5 ملن. تەڭگە جۇمسادىق. وسى رەتتە ۇزدىك ۇستازدارعا 300 مىڭ تەڭگەدەن سىياقى بەرىلسە، جاس ماماندارعا تولەنگەن سىياقىنىڭ مولشەرى 150 مىڭ تەڭگەنى قۇرادى. بۇل – ۇستازدار قاۋىمىن سۇيىكتى ىسىنە ىنتالاندىرىپ وتىرۋ ءۇشىن قاجەت باستاما. مەكتەپ قابىرعاسىندا العاشقى مەديسينالىق كومەك كورسەتۋ ءۇشىن بيىل 77 مىڭ تەڭگەگە قاجەتتى دارى-دارمەكتى ساتىپ الدىق. ال كوممۋنالدىق قىزمەتتىك تولەمدەرگە بولىنەتىن قارجى 5،1 ملن. تەڭگەنى قۇرادى. وقۋشىلار مەن ۇستازدار قاۋىمى تۇتىناتىن اۋىز سۋعا 200700 تەڭگە جۇمسالدى، – دەپ قالدىقىز مۇسايەۆا جۇرتشىلىق الدىندا مەملەكەت قارجىسىنىڭ قايدا جۇمسالعانىنىڭ ەسەبىن شىعارىپ بەردى. جيىن سوڭىندا مەكتەپ جايىندا قىسقاشا مالىمەت بەرگەن قالدىقىز حانىم ۇجىمدا ءارتۇرلى اۋداندىق، قالالىق، رەسپۋبليكالىق ماراپاتتارعا يە بولعان ۇستازدار قىزمەت ەتەتىنىن العا تارتتى.
– مەكتەبىمىزدەگى ۇستازدار قاۋىمى تاربيە ءىسىنىڭ ماڭىزدىلىعىنا، ەرتەڭگى اتقارىلاتىن ءىستىڭ باعىت-باعدارىنا ۇلكەن ءمان بەرەدى. بۇل بارشا ۇستازداردىڭ مىندەتى. وسىنداي ۇجىمنىڭ ارقاسىندا مەكتەبىمىزدىڭ ابىرويى جىل وتكەن سايىن اسقاقتاپ كەلەدى، – دەپ مەكتەپ ديرەكتورى ەسەبىن قورىتىندىلادى.
№123 مەكتەپتىڭ ەسەبى
باعيلا اشىمبايەۆا، الماتى قالاسى اۋەزوۆ اۋدانى قوجا احمەت ياسساۋي اتىنداعى №123 مەكتەپ-گيمنازياسىنىڭ ديرەكتورى، قازاقستان رەسپۋبليكاسى ءبىلىم بەرۋ ءىسىنىڭ قۇرمەتتى قىزمەتكەرى:
– قۇرمەتتى اتا-انالار، الماتى اكىمىنىڭ قىزمەتىنە باۋىرجان بايبەك تاعايىندالعالى بەرى قالالىق ءبىلىم سالاسىنىڭ جۇمىسىنا كوپتەگەن وزگەرىستەر ەنگىزىلىپ جاتىر. وسى ورايدا باۋىرجان قىدىرعالي ۇلىنىڭ تىكەلەي تاپسىرماسىمەن سىزدەردىڭ الدارىڭىزدا 2015 جىلدىڭ 9 ايىنداعى بيۋدجەت بويىنشا ءبىزدىڭ مەكتەبىمىزگە بولىنگەن قارجىنىڭ كىرىسى جانە شىعىسى ەسەبىن بەرگەلى وتىرمىن. سايىپ كەلگەندە بۇگىنگى جينالىسىمىزدا ءبىر عانا ماسەلە – قارجىنىڭ ورنىمەن يگەرىلۋى ءسوز بولادى.
الدىمەن ايتارىم...
الايدا الدىمەن مەكتەپتىڭ تاريحى مەن جەتىستىكتەرىنە از-مۇز توقتالا كەتەيىن. الماتى قالاسى اۋەزوۆ اۋدانى قوجا احمەت ياسساۋي اتىنداعى №123 مەكتەپ-گيمنازياسى 1989 جىلى قۇرىلدى. مەكتەپ 1266 ورىنعا ارنالعان. قازىرگى تاڭدا جالپى 67 سىنىپ بار، ال وقۋشىلاردىڭ سانى 1800-دەن اسادى. باستاۋىش سىنىپتا بارلىعى – 42 ءمۇعالىم قىزمەت ەتەدى. ۇستازدار شىعارماشىلىق توپتارمەن جۇمىس جاسايدى. بىزدە تاريحتى، ءتىلدى، ماتەماتيكانى تەرەڭدەتىپ وقىتاتىن شىعارماشىلىق توپتار قۇرىلعان.
قازىرگى كۇنى ۇبت-عا دايىندىق جۇمىستارى باستالىپ كەتتى. بۇل تاراپتا قوسىمشا ساباقتاردى ىسكە قوسىپ جاتىرمىز. جالپى اتا-انالارمەن بۇگىنگىدەي كەزدەسۋلەر ءجيى وتكىزىلىپ تۇرادى. وعان وزدەرىڭىز دە كۋاسىزدەر.
اتا-انالار تاراپىنان سۇراق: «مەكتەپتەردە اقشا جيناۋ ماسەلەسىنە قاتاڭ تىيىم سالىنىپتى دەپ ەستىدىك. جالپى وسى تۋرالى ايتا وتىرساڭىز؟».
باعيلا اشىمبايەۆا: مەن سىزدەرمەن كەزدەسۋدە ەڭ ءبىرىنشى اقشا جيناۋ ماسەلەسىن ايتامىن. الماتى مەكتەپتەرىندە اتا-انالاردان اقشا جيناۋعا قاتاڭ تىيىم سالىنعان. مۇنداعى ماقساتتى وزدەرىڭىز دە بىلەسىزدەر. اتا-انالاردان اقشا جيناپ، ولارعا ارتىق سالماق سالماۋ. باۋىرجان قىدىرعالي ۇلى كەلە سالا وسى ماسەلەنى كوتەرگەن بولاتىن.
ءيا، 90-شى جىلدارمەن سالىستىرعاندا قازىرگى كۇنىمىز جاقسى. ۇكىمەتتەن مەكتەپتەرگە قارجى ءبولىنىپ جاتىر. ەندىگى ماسەلە ولاردى ورنىمەن يگەرۋ، قاجەتتى جەرلەرىنە جەتكىزۋ – مىنا ءبىزدىڭ مىندەتىمىز.
2015 جىلى مەكتەپ گيمنازياسىنا قانشا قارجى ءبولىندى؟
الماتى قالاسى اۋەزوۆ اۋدانى قوجا احمەت ياسساۋي اتىنداعى №123 مەكتەپ-گيمنازياسىنا 2015 جىلعا بولىنگەن جالپى قارجى 274 ملن 616 مىڭ تەڭگەنى قۇراپ وتىر. 2015 جىلدىڭ 9 ايىنا ارنالعان كىرىس جانە شىعىس ەسەبىنە كەلەتىن بولساق بۇل 214 ملن 551 مىڭ تەڭگە. ونىڭ ىشىندە جەرگىلىكتى بيۋدجەت بويىنشا بولىنگەن قارجى 196 ملن 56 مىڭ تەڭگە. رەسپۋبليكالىق بيۋدجەتتەن بولىنگەن قارجى 18 ملن 495 مىڭ تەڭگە.
جوعارىدا ايتىپ كەتتىك، سىنىپتارىمىزدىڭ سانى – 67، ونىڭ ىشىندە باستاۋىش سىنىپتاردىڭ سانى – 31 (992 وقۋشى)، جوعارى سىنىپتاردىڭ سانى – 36 (929 وقۋشى). وقۋشىلارىمىزدىڭ سانى 1921 بالانى قۇرايدى.
ال مەكتەپ قىزمەتكەرلەرىنىڭ سانى – 180. ونىڭ ىشىندە 42 ادام اكىمشىلىك-شارۋاشىلىق سالاسىنىڭ ماماندارى جانە كىشى قىزمەتكەرلەر. پەداگوگيكالىق قىزمەتكەرلەردىڭ، ياعني مۇعالىمدەردىڭ سانى 130 ادامدى قۇراپ وتىر.
مۇعالىمدەرىمىزدىڭ 63ء-ى جوعارى ساناتتى، 22 ۇستاز ءبىرىنشى ساناتتى، ەكىنشى ساناتتى مۇعالىمدەردىڭ سانى 25 جانە ساناتى جوق ۇستازداردىڭ سانى – 28. 8 ۇستازىمىز نازاربايەۆ زياتكەرلىك مەكتەبىنىڭ كۋرسىنان ءوتىپ كەلدى.
مۇعالىمدەر جالاقىسى جانە جالپى شىعىن تۋرالى
2015 جىلدىڭ 9 ايىنداعى بارلىق شىعىس 214 ملن 551 تەڭگەنى قۇرادى. ونىڭ ىشىندە قىزمەتكەرلەر مەن جۇمىسشىلاردىڭ ەڭبەكاقىسىنا 166 ملن. 198 مىڭ تەڭگە ءبولىندى. قىزمەتكەرلەر ەڭبەكاقىسىنا – 141 ملن 345 مىڭ تەڭگە، قوسىمشا اقشالاي تولەمدەرگە 2 ملن 550 مىڭ تەڭگە جۇمسالدى. وتەماقىلىق تولەمدەرگە 7 ملن 9 مىڭ تەڭگە باعىتتالدى. ال الەۋمەتتىك سالىققا 8 ملن 659 مىڭ تەڭگە ءبولىندى. الەۋمەتتىك اۋدارىمعا 5 ملن 779 مىڭ تەڭگە جۇمسالدى.
بۇدان سوڭ كوممۋنالدىق تولەمدەرگە 5 ملن 872 مىڭ تەڭگە ءبولىندى. جىلىتۋ ورتالىعى جۇيەسى جانە ىستىق سۋ ءۇشىن 3 ملن 512 مىڭ تەڭگە ءبولىندى. سۋىق سۋمەن قامتۋ جانە كارىز جۇيەسىنە 1 ملن 349 مىڭ تەڭگە جۇمسالدى. ەلەكتر قۋاتىنا 819 مىڭ تەڭگە، بايلانىس قىزمەتىنە 192 مىڭ تەڭگە جۇمسالدى.
بۇدان سىرت مەكتەپكە قاجەتتى شارۋاشىلىق زاتتار بار. ولارعا جۇمسالعان قاراجات 3 ملن 84 مىڭ تەڭگە. ونىڭ ىشىندە شارۋاشىلىق تاۋارلار مەن تازالاۋعا ارنالعان زاتتارعا 1 ملن 603 مىڭ تەڭگە بولدىك. كەڭسە تاۋارلارى مەن جازۋ قاعازدارىنا 545 مىڭ تەڭگە باعىتتالدى. سپورتتىق تاۋارلارعا 351 مىڭ تەڭگە قاراجات ءبولىندى. سىنىپ جۋرنالدارى ءۇشىن 118 مىڭ تەڭگە جانە اۋىز سۋ مەن پلاستيكالىق ستاقاندارعا وسى 9 ايدا 1 ملن 216 مىڭ تەڭگە جۇمساعان ەكەنبىز.
اعىمداعى جوندەۋ جۇمىستارىنا 3 جارىم ملن تەڭگە ءبولىندى.
اتا-انالار تاراپىنان سۇراق: «بۇل قارجى قايدا كەتتى؟».
توبەنى، قابىرعانى اكتەۋگە 804 مىڭ تەڭگە قاراجات كەتتى. وزگە قاراجات ەدەن، پلينتۋس سىرلاۋعا، كىتاپحانا توبەسىنە گيپسوكارتون ۇستاتۋعا، سپورتزالدى اكتەۋگە، سىرلاۋعا، جەرتولەنى جوندەۋ جانە قۋات سىمدارىن اۋىستىرۋعا، ونىڭ بولمەلەرگە لينولەۋم توسەۋگە، ىستىق جانە سۋىق سۋ قۇبىرلارىن اۋىستىرۋعا باعىتتالدى.
كۇزەت قىزمەتىنە 1 ملن 332 مىڭ تەڭگە جۇمسادىق. قۇرال-جابدىقتار مەن عيماراتقا قىزمەت كورسەتۋ 1 ملن 875 مىڭ تەڭگەگە شىقتى. بۇدان سىرت مەكەمە قىزمەتكەرلەرىن كەزەكتى مەديسينالىق تەكسەرۋدەن وتكىزۋگە 240 مىڭ تەڭگە ءبولىنىپ، بارلىق قىزمەتكەرلەر ءتيىستى تەكسەرۋدەن ءوتتى. سونىمەن قاتار مەكتەپتەگى وفيستىك تەحنيكالاردى جوندەۋ جۇمىستارىنا 400 مىڭ تەڭگە باعىتتادىق.
بۇدان سىرت وقۋشىلاردى ۇبت-عا جەتكىزۋ، «جاس تۇلەك» فەستيۆالىنە الىپ بارىپ، الىپ كەلۋ ءۇشىن ترانسپورتتىق قىزمەتكە 204 مىڭ تەڭگە ءبولىندى. گيمنازيادا ارنايى مەديسينالىق بولمە جۇمىس جاسايدى: بالالارعا العاشقى كومەك كورسەتۋ ماقساتىندا 108 مىڭ تەڭگەگە دارى-دارمەكتەر ساتىپ الدىق. تۇرمىستىق جاعدايى تومەن وقۋشىلاردى ىستىق تاماقپەن قامتاماسىز ەتۋ ءۇشىن 382 مىڭ تەڭگە قاراستىردىق.
بۇدان سىرت اتا-انالار ءوتىنىشى بويىنشا 126 از قامتىلعان وتباسىلارعا ماتەريالدىق كومەك كورسەتۋ نەگىزىندە 3 ملن. 57 مىڭ تەڭگە اقشالاي بەرىلدى.
قۇرمەتتى اتا-انالار، مىنە، مەكتەپكە باعىتتالعان قاراجاتتىڭ قايدا جانە قالاي بولىنگەنىن اشىپ ايتىپ بەردىم. ءبىزدىڭ مەكتەپتە بالا كوپ. ۇستاز دا كوپ. سايىپ كەلگەندە بارلىق قاراجات مەكتەپتىڭ قاجەتىنە جۇمسالدى.
انىعىندا، مەكتەبىمىز كۇردەلى جوندەۋدى قاجەت ەتەدى. باۋىرجان قىدىرعالي ۇلى مۇنىڭ ءبارىن ءبىلىپ وتىر. وسى سەبەپتى مەكتەبىمىزدى كۇردەلى جوندەۋدەن وتكىزۋ تۋرالى كەزەككە قويىپتى. 2017 جىلى كەزەگىمىز كەلسە6 جارقىراعان، جايناعان مەكتەپتە وقيمىز دەپ سەنىممەن ايتا الامىن.
گۇلنار حودجابەرگەنوۆا، اۋەزوۆ اۋداندىق ءبىلىم ءبولىمىنىڭ باسشىسى:
– ءقازىر ەكىنىڭ ءبىرى «مەكتەپتەردە مۇعالىمدەردىڭ اتا-انالاردان ءار نارسەنى سىلتاۋراتىپ اقشا جينايدى» دەگەن اڭگىمە ءجيى ايتىلاتىنى جاسىرىن ەمەس. جەل سوقپاسا، ءشوپتىڭ باسى قيمىلدامايتىنى بەلگىلى. جاس ۇرپاققا ۇلگى-ونەگە بەرەدى دەگەن ءبىلىم وردالارىندا ۇستازداردىڭ اقشا جيناۋى دۇرىس ەمەس. قازىرگى جاعدايمىزدى توقسانىنشى جىلدارداعى توقىراۋ جىلدارىمەن سالىستىرۋعا كەلمەيدى. تاۋەلسىزدىك جىلدارى مەملەكەتىمىزدىڭ ءال-اۋقاتى ارتىپ، ءبىلىم بەرۋ مەكەمەلەرىن جىل سايىن ءتيىستى قارجىمەن قامتاماسىز ەتۋدە. مەملەكەت باسشىسى نۇرسۇلتان نازاربايەۆ قارجىلىق-ەكونوميكالىق داعدارىسقا قاراماستان، ءبىلىم مەن دەنساۋلىق ساقتاۋ سالاسىنا بولىنەتىن قارجىنىڭ ءبىر تيىنى دا قىسقارمايتىنىن قاداپ ايتتى. ءبىر سوزبەن ايتقاندا ءمۇعالىمنىڭ ايلىعى، ءبىلىم بەرۋ وشاقتارىنا قاجەتتى كەرەك-جاراقتاردى ساتىپ الۋعا مەملەكەت تاراپىنان قارجى قاراستىرىلعان.
وسى جايتتاردى ەسكەرگەن الماتى قالاسىنىڭ اكىمى باۋىرجان بايبەك مەكتەپتەگى جەمقورلىققا تۇبەگەيلى توسقاۋىل قويۋ ءۇشىن ءار توقسان سايىن مەكتەپ ديرەكتورلارىنىڭ اتا-انالار الدىندا ەسەپ بەرۋ تۋراسىندا تالاپ قويىپ وتىر. ءوز كەزەگىندە بۇل باستاما الماتى قالاسىنداعى ءبىلىم مەكەمەلەرى مەن اتا-انالار تاراپىنان ايرىقشا قولداۋعا يە بولىپ وتىر. الداعى ۋاقىتتا مەكتەپ ديرەكتورلارى ءار توقسان سايىن اتا-انالارمەن كەزدەسىپ، مەملەكەت قارجىسىنىڭ قايدا جۇمسالعانى جايىندا ەگجەي-تەگجەيلى
اقپارات بەرىپ تۇراتىن بولادى.
الماتى قالالىق قارجى باسقارماسىنىڭ رۇقساتىمەن مەكتەپتەر قايىرىمدىلىق ەسەپ شوتتارىن اشۋعا رۇقسات بەرىلگەن. ءبىراق مۇنداي ەسەپشوتى بار مەكتەپتەر ساۋساقپەن سانارلىق. الداعى ۋاقىتتا ارنايى ەسەپشوتى بار مەكتەپتىڭ ديرەكتورلارى مەملەكەت قارجىسى جانە ارنايى ەسەپشوتقا اتا-انالار تاراپىنان تۇسكەن قارجىنىڭ قالاي جۇمسالىپ جاتقانى جايىندا ەسەپ بەرىپ تۇراتىن بولادى. جالپى، قالا باسشىسىنىڭ بۇل باستاماسى حالىق اراسىنداعى «مەكتەپتە اقشا جينالادى» دەگەن جامان اتتان ارىلۋعا جانە مەملەكەت تاراپىنان بولىنەتىن قارجىنى ءتيىمدى باعىتتا جۇمساۋعا ىقپال ەتەتىنە سەنىمدىمىن.
ءوز باسىم اۋەزوۆ اۋدانىنداعى بىرنەشە مەكتەپتىڭ ەسەپتى كەزدەسۋىنە قاتىسقاندا بۇل باستاما حالىق تاراپىنان قىزۋ قولداۋ تاپقانىن بايقادىم. ارينە، بۇل مەكتەپ ديرەكتورلارىنىڭ العاشقى ەسەپتى كەزدەسۋى بولعاندىقتان از-كەم كەمشىلىكتەر كەتۋى مۇمكىن. ءبىراق وسى ءبىر كەزدەسۋگە اتا-انالار مەن مەكتەپ ۇجىمىنىڭ بويى ۇيرەنگەننەن كەيىن ءوزىنىڭ ناتيجەسىن بەرىپ، ءبىلىم سالاسىنىڭ اشىقتىعىن قامتاماسىز ەتەتىن ماڭىزدى شاراعا اينالاتىنىنا سەنىمدىمىن.
دۋمان تاناباسوۆ
