29 قازاننان باستاپ ChatGPT پايدالانۋشىلارمەن ءوزارا ارەكەتتەسۋ ءتاسىلىن رەسمي تۇردە وزگەرتتى: ەندى سەرۆيس مەديسينا، قۇقىق جانە قارجى سالالارىندا ناقتى ۇسىنىستار مەن جەكە كەڭەستەر بەرمەيدى، دەپ حابارلايدى Dalanews.kz.
بۇل جاڭارتۋ پايدالانۋشىلاردىڭ قاۋىپسىزدىگىن كۇشەيتۋ جانە جاساندى ينتەللەكتتىڭ كاسىبي مامانداردى الماستىرۋىنىڭ الدىن الۋ ماقساتىندا ەنگىزىلگەن.
مەديسينا: تۇسىندىرەدى، ءبىراق تاعايىندامايدى
ەندى ChatGPT ءدارى اتاۋلارىن نەمەسە ناقتى دوزالاردى اتامايدى - تەك ەمدەۋ مەحانيزمدەرىن جانە تەراپيانىڭ جالپى قاعيدالارىن تۇسىندىرۋمەن شەكتەلەدى.
«ەندى مەن ەمدەۋ ءتاسىلىنىڭ مەحانيزمىن جانە ءتۇرىن تۇسىندىرەمىن، ءبىراق دارىلەر مەن دوزالاردى اتامايمىن»، - دەپ ءتۇسىندىردى سەرۆيس ءتيىستى سۇراۋعا جاۋاپ بەرە وتىرىپ.
مودەل كەز كەلگەن مەديسينالىق ماسەلەنىڭ دارىگەرگە جۇگىنۋدى تالاپ ەتەتىنىن ەرەكشە اتاپ وتەدى. ونىڭ مىندەتى - قولدانۋشىعا اعزانىڭ جۇمىس ىستەۋ قاعيدالارىن جانە مەديسينالىق پروسەدۋرالاردىڭ ءمانىن جاقسىراق تۇسىنۋگە كومەكتەسۋ.
قۇقىق: ناقتى ستراتەگياسىز جانە قۇجاتتارسىز
بۇعان دەيىن ChatGPT زاڭ باپتارىنىڭ قولدانىلۋىن ءتۇسىندىرىپ، ارىزدار، تالاپ-ارىزدار مەن شارتتاردى قۇراستىرۋعا جانە سوت ىستەرىنىڭ پەرسپەكتيۆاسىن باعالاۋعا كومەكتەسەتىن.
ەندى مۇنداي ارەكەتتەرگە رۇقسات جوق. جاساندى ينتەللەكت زاڭ كەڭەسشىسىنىڭ ءرولىن اتقارمايدى، تەك قۇقىقتىق جۇيەنىڭ قۇرىلىمىن، قۇجاتتاردىڭ تيپتىك ەلەمەنتتەرىن جانە نازار اۋدارۋعا تۇرارلىق تەرميندەردى تۇسىندىرەدى.
جاڭا ساياساتتىڭ ماقساتى - پايدالانۋشىلاردىڭ ChatGPTء-نىڭ جاۋاپتارىن كاسىبي زاڭ كومەگى رەتىندە قابىلداۋىنا جول بەرمەۋ.
قارجى: ينۆەستيسيالىق ۇسىنىستارسىز
وزگەرىستەر قارجى سالاسىن دا قامتىدى. بۇرىن ChatGPT تاۋەكەلدەردى باعالاپ، ينۆەستيسيالىق ستراتەگيالار ۇسىنىپ، ءتىپتى قايدا اقشا سالۋ ءتيىمدى ەكەنىن دە تالقىلايتىن.
ەندى بۇل فۋنكسيالار تولىقتاي الىنىپ تاستالدى. مودەل ناقتى مامىلەلەردى تالدامايدى جانە ينۆەستيسيالىق ونىمدەردى ۇسىنبايدى. ول تەك ەكونوميكانىڭ نەگىزگى قاعيدالارىن جانە قارجى نارىقتارىنىڭ جۇمىس ىستەۋ مەحانيزمدەرىن تۇسىندىرەدى.
وسىلايشا، اكسيا، كريپتوۆاليۋتا نەمەسە جىلجىمايتىن مۇلىك ساتىپ الۋ جونىندەگى كەز كەلگەن كەڭەس ەندى جاڭارتىلعان ەرەجەلەردى بۇزۋ بولىپ سانالادى.
ChatGPTء-نىڭ جاڭا ءرولى - ءبىلىم بەرۋ قۇرالى
جاڭا ساياساتتىڭ ماقساتى - ChatGPTء-تى كۇردەلى سالالاردا باعدار بەرەتىن وقۋ جانە ءتۇسىندىرۋ قۇرالىنا اينالدىرۋ، ال مامانداردىڭ ورنىن الماستىرماۋ.
«وسىلايشا، 2025 جىلدىڭ سوڭىنان باستاپ ChatGPT رەسمي تۇردە كەڭەسشى ەمەس، ءبىلىم بەرۋ قۇرالى رەتىندە پوزيسيالانادى»، - دەلىنگەن سەرۆيس حابارلاماسىندا.
ەندى مودەل پايدالانۋشىلاردى ءتيىستى سالا ماماندارىنا باعىتتايدى جانە تەك مەديسينالىق، قۇقىقتىق جانە قارجىلىق جۇيەلەردىڭ تەرمينولوگياسى مەن لوگيكاسىن تۇسىنۋگە كومەكتەسەدى.
