كاسىبي مەرەكە — مەديسينا قىزمەتكەرلەرى كۇنى قارساڭىندا الماتىدا سالتاناتتى شارا ءوتتى. وندا دەنساۋلىق ساقتاۋ جۇيەسىنىڭ ۇزدىك وكىلدەرى ماراپاتتالدى،- دەپ حابارلايدى Dalanews.kz
سالتاناتتى راسىمگە قالا اكىمى دارحان ساتىبالدى قاتىسىپ، مەديسينا قىزمەتكەرلەرىنە ماماندىعىنا ادالدى مەن جوعارى كاسىبيلىگى جانە جوعارى جاۋاپكەرشىلىگى ءۇشىن العىسىن ءبىلدىردى. ول مەگاپوليس تۇرعىندارىنىڭ دەنساۋلىعى دارىگەرلەردىڭ ەڭبەگىنە، ءبىلىمى مەن ىسكە ادالدىعىنا تىكەلەي بايلانىستى ەكەنىن اتاپ ءوتتى
«الماتى قازاقستاننىڭ مەديسينا سالاسىنداعى فلاگمانى ەكەنى ءسوزسىز. مۇندا جەتەكشى كلينيكالار مەن عىلىمي ورتالىقتار شوعىرلانعان، ءارى بولاشاق دارىگەرلەر دايارلانادى. جالپى، انا مەن بالا ءولىمى كورسەتكىشتەرىن تومەندەتۋ، الەۋمەتتىك ماڭىزى بار اۋرۋلارعا ەرتە دياگنوستيكا جاساۋ بويىنشا مەگاپوليس رەسپۋبليكالىق دەڭگەيدەن وزىق كەلەدى»، – دەدى الماتى اكىمى.
ول جانە قالانىڭ دەنساۋلىق ساقتاۋ جۇيەسىنىڭ الدىندا ءبىرقاتار ماڭىزدى مىندەتتەر تۇرعانىنا توقتالدى. ايتالىق، ەمحانالارداعى كەزەكتى ازايتۋ، مەديسينالىق قىزمەتتەردىڭ قولجەتىمدىلىگى مەن ساپاسىن بارلىق اۋدانداردا ارتتىرۋ، شۇعىل كومەكتى دامىتۋ، ونكولوگيالىق قىزمەتتى جانە انا مەن بالانى قورعاۋ جۇيەسىن جەتىلدىرۋ قاجەت.
2030 جىلعا دەيىن الماتىدا 32 جاڭا دەنساۋلىق ساقتاۋ نىسانىن سالۋ جانە 14 قولدانىستاعى نىساندى جاڭعىرتۋ جوسپارلانعان. ءقازىردىڭ وزىندە ءۇش وتباسىلىق دارىگەرلىك امبۋلاتوريا مەن ءبىر ەمحانا پايدالانۋعا بەرىلدى.
2024 جىلى حالىقارالىق ستاندارتتارعا ساي جاڭا وپەراسيالىق بلوگى بار بالالار شۇعىل جاردەم ورتالىعى قابىلداۋ ءبولىمىنىڭ جاڭا كورپۋسى ىسكە قوسىلدى. ونىڭ اشىلۋىنا قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ قاتىستى. بۇل ورتالىقتا بۇگىندە 61 مىڭنان استام بالا مەديسينالىق كومەك الدى.
بۇعان قوسا، امبۋلاتوريالىق دەڭگەيدە سيفرلىق شەشىمدەر ەنگىزىلۋدە. ايتالىق، Face ID، الەۋمەتتىك ءاميان، دارىگەرگە جازىلۋ جانە تالداۋلار ناتيجەسىن الۋ بويىنشا ەلەكتروندى سەرۆيستەر جۇمىس ىستەيدى.
الماتى — ەلىمىزدە العاشقى بولىپ «فەتالدى حيرۋرگيا» پيلوتتىق جوباسىن جۇزەگە اسىرعان قالا. بۇل جوبا ۇرىققا تۋىلماي تۇرىپ از ءينۆازيۆتى ادىستەرمەن وتا جاساۋعا مۇمكىندىك بەرەدى. سونىمەن قاتار، «ءبىر كۇندىك كلينيكا» جوباسى پرەناتالدىق دياگنوستيكا ادىستەرىنىڭ قولجەتىمدىلىگىن قامتاماسىز ەتىپ، ءقاۋىپتى فاكتورلاردى ەرتە انىقتاۋعا جول اشادى.
ماڭىزدى جەتىستىكتەردىڭ ءبىرى — قالالىق كارديولوگيالىق ورتالىقتا اورتالىق قاقپاقتى ترانسكاتەتەرلىك يمپلانتاسيالاۋ بويىنشا TAVI-ورتالىقتىڭ اشىلۋى، ورتالىق قالالىق كلينيكالىق اۋرۋحانادا قازاقستاندا العاش رەت دونورلىق قاساڭ قابىقتى ترانسپلانتاسيالاۋ وتاسى جاسالدى. بالالار شۇعىل جاردەم ورتالىعىندا شالا تۋعان نارەستەلەرگە ەرتە ۆيترەكتوميا جاساۋ مەن نەسەپ شىعارۋداعى اقاۋلار كەزىندە ساكرالدى نەيرومودۋلياسيا ءادىسى ەنگىزىلدى.
№2 قالالىق بالالار كلينيكالىق اۋرۋحاناسىندا نەيروناۆيگاسيامەن نەيروەندوسكوپيالىق وپەراسيالار جاسالۋدا، ال №4 قالالىق كلينيكالىق اۋرۋحانادا ورتا ازيادا العاش رەت ءىرى بۋىنداردى ەندوپروتەزدەۋگە ارنالعان روبوت-اسسيستيرلەنگەن وپەراسيالار ورىندالدى.
جاڭا تەحنولوگيالار نەيروحيرۋرگيا، حيرۋرگيا، تراۆماتولوگيا، رەپرودۋكتيۆتى مەديسينا، ونىڭ ىشىندە ەكۇ جانە باسقا دا باعىتتاردا كەڭىنەن قولدانىلۋدا. ەمحانالاردا ۇزدىك تاجىريبەلەر ورتالىقتارى ءساتتى جۇمىس ىستەپ كەلەدى.
قالا اكىمى سالانىڭ كادرلىق الەۋەتىن دامىتۋعا ەرەكشە نازار اۋداردى باسا بەلگىلەپ ءوتتى. ول الماتى مەديسيناسىنىڭ نەگىزىن قالاعان، ءوز تاجىريبەسىن جاس بۋىنعا تابىستاپ جۇرگەن دەنساۋلىق ساقتاۋ سالاسىنىڭ ارداگەرلەرىنە ريزاشىلىعىن ءبىلدىردى.
«دەنساۋلىق ساقتاۋ جۇيەسىنىڭ باستى كۇشى – ادامدار، ياعني سالاداعى دارىگەرلەر، مەدبيكەلەر، فەلدشەرلەر، سانيتارلىق قىزمەتكەرلەر»، – دەپ اتاپ ءوتتى دارحان ساتىبالدى.
بۇگىندە جەرگىلىكتى بيۋدجەت ەسەبىنەن 315 بولاشاق دارىگەر رەزيدەنتۋرادا ءبىلىم الۋدا. تەك وتكەن جىلى الماتىنىڭ دەنساۋلىق ساقتاۋ جۇيەسىنە 110 جاس مامان قوسىلدى.
ماراپاتتاۋ ءراسىمىنىڭ سوڭىندا مەملەكەتتىك جانە ۆەدومستۆولىق ناگرادالار تابىس ەتىلدى. ولاردى ءوز ءومىرىن الماتى مەن قازاقستان مەديسيناسىنىڭ دامۋىنا ارناعان دارىگەرلەر، مەدبيكەلەر، بولىمشە جانە قىزمەت باسشىلارى يەلەندى.
سولاردىڭ ءبىرى – 36 جىلدىق ەڭبەك ءوتىلى بار كگپ نا پحۆ «№17 قالالىق ەمحانا» دارىگەرى كۇلجاحان نۇرييەۆا. ول «باستاپقى مەديسينالىق-سانيتارلىق كومەك كورسەتۋدىڭ ۇزدىك دارىگەرى» رەتىندە ماراپاتتالدى.
«وسى جىلدار ىشىندە بىرنەشە بۋىن اۋىستى، ماعان ءبىر كەزدەرى ءوزىم ەمدەگەن جانداردىڭ بالالارى كەلە باستادى. مەن ءۇشىن باستاپقى كومەك، بۇل – جىلدار بويى جينالعان سەنىم. بۇل ماراپات مەنىڭ ەڭبەگىمە، ماعان سەنىپ وتباسىلارىنىڭ دارىگەرى رەتىندە تاڭداعان جانداردىڭ العاسىنىڭ بەلگىسى»، – دەدى كۇلجاحان نۇرييەۆا.
ايتا كەتەيىك، بۇگىن اكوردادا وتكەن سالتاناتتى شارادا مەملەكەت باسشىسى الماتىدان شىققان دارىگەرلەر اۋلەتى – 13 دارىگەردەن تۇراتىن، جالپى ەڭبەك ءوتىلى 375 جىلدان اساتىن دجۋۆاشيەۆتەر وتباسىن كاسىبىنە ادالدىقتىڭ، جاۋاپكەرشىلىكتىڭ ايقىن ۇلگىسى رەتىندە اتاپ ءوتتى.
سالتاناتتى جيىن سوڭعى مەرەكەنىڭ ءسانىن كىرگىزىپ، قاتىسۋشىلارعا ەرەكشە كوڭىل-كۇي سىيلاعان مازمۇندى كونسەرتتىك باعدارلاماعا ۇلاستى.
