الماتىدا بىرەگەي نىسان – بيىك تاۋلى سپورت كەشەنى "مەدەۋدى" جاڭارتۋ جۇمىستارى باستالدى، دەپ حابارلايدى Dalanews.kz.
ءقازىر دايىندىق كەزەڭى ءجۇرىپ جاتىر، الداعى ۋاقىتتا قۇرىلىس ايماعى قورشالىپ، نەگىزگى جۇمىستار باستالادى. جوبا اياسىندا مۇز ايدىنىنا ارنالعان جاڭا توڭازىتقىش جۇيەسى ورناتىلادى، ينجەنەرلىك كوممۋنيكاسيالار تولىق جاڭارتىلىپ، كەشەن گازبەن قامتاماسىز ەتىلەدى.
"شىعىس قاناتتاعى قوناق ءۇي قازىرگى نومىرلەر قورىن ساقتاي وتىرىپ، "ءتورت جۇلدىز" ستاندارتىنا ساي قايتا جوبالانادى. سونىمەن بىرگە، سپورتشىلار مەن كەلۋشىلەرگە ارنالعان زاماناۋي وڭالتۋ ورتالىعى اشىلادى. وندا ساۋنا، ماسساج بولمەلەرى جانە شۇعىل ءارى پروفيلاكتيكالىق كومەك كورسەتۋگە ارنالعان مەديسينالىق ءبولىم جۇمىس ىستەيدى"، - دەپ جازىلعان اكىمدىك حابارلاماسىندا.
كەشەن اۋماعىندا "3D" تۇجىرىمداماسىنا نەگىزدەلگەن ينتەراكتيۆتى مۋزەي ەكسپوزيسياسى جاساقتالادى. ول زاماناۋي مۋلتيمەديالىق جانە كورمە جابدىقتارىمەن تولىق قامتىلادى. باتىس تريبۋنادا اۋماعى 900 شارشى مەتر بولاتىن كوفەحانالارى مەن دەمالىس ورىندارى بار كەڭ تەرراسا پايدا بولادى. ال كەشەن الدىنداعى كەڭىستىكتە، جەر استى اۆتوتۇراعىنىڭ ۇستىندە SUN-DECK اتتى دەمالىس ايماعى قۇرىلىپ، ول قالا تۇرعىندارى مەن قوناقتارى ءۇشىن كوپفۋنكسيونالدى قوعامدىق الاڭعا اينالادى.
"زاماناۋي سپورتتىق جانە ساۋىقتىرۋ كەشەنىن جاساۋعا ەرەكشە كوڭىل بولىنگەن. بۇرىنعى ماشينا زالىنىڭ ماڭىندا كولەمى 25×15 مەتر، جىلى سۋى بار اشىق باسسەين سالىنادى. كەلۋشىلەردىڭ ىڭعايى ءۇشىن تريبۋنا مەن قابىلداۋ بولمەسى، كيىم اۋىستىراتىن بولمەلەر جانە ت.ب. قىزمەت كورسەتۋ عيماراتى قاراستىرىلعان. بۇل جاڭا باسسەين جىل بويى جۇمىس ىستەپ، قالا تۇرعىندارى مەن تۋريستەرگە تاۋ باۋرايىندا تازا اۋادا ءجۇزۋ مۇمكىندىگىن ۇسىنادى.
كەشەننىڭ اينالاسىندا سەرۋەن جولدارى بار ەرەكشە ەكوپارك سالۋ جوسپارلانعان. ول جەردەن جاساندى سارقىراما، كىشى الماتى وزەنى مەن تاۋدىڭ اسەم كورىنىسىن تاماشالاۋعا بولادى. نەگىزگى نىسانداردى جانە جاڭا دەمالىس ايماقتارىن بايلانىستىراتىن شىعىس جانە باتىس باعىتتاردا جۇرگىنشىلەرگە ارنالعان ەكى كوپىر سالىنادى"، - دەدى اكىمدىك وكىلدەرى.
سونداي-اق، جەرگىلىكتى كليماتقا ءتوزىمدى جاڭا اعاشتار مەن بۇتالار ەگىلىپ، بۇكىل اۋماق زاماناۋي جارىقتاندىرۋ جانە ساۋلەتتىك شامدارمەن بەزەندىرىلەدى. مۇمكىندىگى شەكتەۋلى جاندارعا ىڭعايلى بولۋى ءۇشىن ەكى جولاۋشى جەدەل ساتى ورناتىلادى.
بۇل جۇمىستار 2027 جىلدىڭ 4ء-شى توقسانىنا تولىق بىتەدى دەپ جوسپارلانىپ وتىر.
