الماتىدا جول اپاتىنا ۇشىراعان اۆتوبۋس جۇرگىزۋشىسى ەرمەك شوكەبايەۆا قازا تاپقانداردىڭ وتباسىنا كوڭىل ايتتى. 22 جەلتوقساندا الماتىداعى «قالقامان» ايالداماسىندا اۆتوبۋس جاياۋ جۇرگىنشىلەردى باسىپ كەتىپ، 3 ادام قايتىس بولدى. قوعامدىق كولىك جۇرگىزۋشىسىن ۇرعان ەر ادام ۇستالدى. اتالعان دەرەك نەگىزىندە ق ر قك-نىڭ 345-بابى 3-بولىگى بويىنشا سوتقا دەيىنگى تەرگەۋ باستالدى.
جولاۋشىنىڭ شابۋىلىنان ەسىنەن تانىپ قالعان جۇرگىزۋشى ءوزىنىڭ ۇستىنەن قىلمىستىق ءىس قوزعالعانىن حابارلادى. Qaz365.kz ءتىلشىسىنىڭ ساۋالىنا پوليسيا ايەلدەن جاۋاپ الىنعانىن راستادى.
«مەن وسى قايعىلى جاعدايعا بايلانىستى قازا تاپقان مارقۇمداردىڭ تۋىستارىنا كوڭىل ايتامىن. مەنىڭ تاراپىمنان ەشقانداي ادەيى وسىلاي ىستەيىن دەگەن نيەت بولعان جوق. مۇندايدى جاۋىما دا تىلەمەسپىن. ءوزىمدى كىنالى سانامايمىن. جولاۋشى ەسىمنەن تانىپ قالعانشا ۇردى.
اۋرۋحانادا جاتقانىمدا تەرگەۋشى كەلدى. بىرەۋى ەر، ەكىنشىسى ايەل. ءسىز زارداپ شەگۋشىسىز. كىناڭىز جوق دەپ ايتقان. ەندى جازىلىپ شىققاندا اۋىر باپ بويىنشا ايىپتاپ جاتقانىن ءبىلدىم. ءوزىم ارەنداعا ءۇي جالداپ تۇرامىن. ەكى بالام بار. سولار ءۇشىن ەڭبەك ەتىپ كەلەمىن. مەنىڭ جۇمىسىما ەشكىم شاعىمدانباعان. ماعان وسىنداي قىلمىستىق كودەكس بويىنشا نە ءۇشىن اۋىر ايىپ تاعىپ جاتقانىن تۇسىنبەيمىن. ەگەر سوققى الماعانىمدا، مۇنداي جول اپاتىنا جول بەرمەس ەدىم. ادىلدىك بولادى دەپ ۇمىتتەنەمىن»، – دەيدى ەرمەك شوكەبايەۆا.
