16 قىركۇيەكتە الماتىدا ەكى بىردەي وقۋشى تۇرعىن ۇيلەردىڭ بىرىنەن قۇلاپ كەتكەن. ولاردىڭ ءبىرى "ەشكىمگە ماسىل بولعىم كەلمەيدى" دەپ الدەكىمگە حات جىبەرگەن، - دەپ حابارلايدى Dalanews.kz الماتى تەلەارناسىنا سىلتەمە جاساپ.  

جاعا ۇستاتارلىق جايت جامبىل كوشەسى مەن سەيفۋللين داڭعىلىنىڭ قيىلىسىنداعى 9 قاباتتى باسپانادا بولدى. ۇيىنە قايتىپ كەلە جاتقان الماتىلىق تۇرعىن گالينا ۆاسيليەۆا اۋلاسىنىڭ ماڭىنان پوليسيا قىزمەتكەرلەرىن كورىپ، جاقىنداي بەرگەندە جەردەن وقۋشى قىزداردىڭ ءمايىتىن كورىپ ەسەڭگىرەپ قالعان.

– مەن ەمحانادا بولعام. كەلسەم، پوليسەيلەر ءجۇر. ەكى قىزدىڭ دەنەسىن كوردىم. ولاردىڭ بيىكتەن قۇلاپ، وزدەرىنە قول جۇمساعانىن ەستىدىم. مەنىڭ بىلۋىمشە، ولار الدىمەن، تامىرىن كەسپەك بولعان. الايدا قولدارىنان كەلمەگەن سوڭ، سەكىرگەن سەكىلدى. سومكەلەرى تولعان قورقىنىشتى زاتتار، سۇمدىق-اي! مىنا شاتىرعا باراتىن باسپالداق ۇنەمى اشىق تۇرادى، – دەدى كۋاگەر گالينا ۆاسيليەۆا.

تۇرعىندار قايعىلى جاعدايدان كەيىن پوليسەيلەرمەن بىرگە ءجۇرىپ، ءۇي كىرەبەرىسىندە تەمەكى قالدىقتارىن بايقاعان. ودان سوڭ شاتىرعا شىعىپ، وقۋشى قىزداردىڭ سومكەلەرى مەن جەكە زاتتارىن كورىپ شوشىعان. سەبەبى دوربالاردىڭ ىشىندە قانعا ورانعان مايلىق، دارىلىك پرەپاراتتار مەن ءقاۋىپتى وتكىر زاتتار بولعان. سونداي-اق وقۋشىنىڭ ءبىرى ۇيالى تەلەفونىنان بەيتانىس ادامعا كۇماندى حابارلاما جىبەرگەن.

– قىزداردىڭ ءبىرىنىڭ سومكەسى جاتتى. ونىڭ ىشىندە اس ءۇي پىشاعى، كەسكىش زاتتار، قانعا بويالعان مايلىق، 7-سىنىپتىڭ وقۋلىقتارى بولدى. ءبىز جوعارى كوتەرىلدىك. وندا ەكى اياق كيىم، ەكى تەلەفون بولدى. سوسىن شىلىمنىڭ قالدىعىن كوردىك. تەلەفوندارىن كۋاگەر رەتىندە ءبىزدىڭ كوزىمىزشە اشىپ كورسەتتى، وندا الدەكىمگە «تامىرىمدى تاپپاي تۇرمىن، شارشادىم، ەشكىمگە كەدەرگى، ماسىل بولعىم كەلمەيدى» دەگەن حابارلاما جىبەرىلگەن، – دەدى كۋاگەر ناتاليا ناۋموۆا.

كۋاگەرلەردىڭ سوزىنشە، مارقۇم قىزدار جاقىن دوس بولعان كورىنەدى. ولار سول ماڭايداعى №25 مەكتەپتىڭ 7-سىنىبىندا وقىعان. ءبىرى كورشى اۋلادا، ەكىنشىسى سول اۋدانداعى باسقا كوپقاباتتى ۇيدە تۇرعان. وقيعاعا قاتىستى پوليسيا دەپارتامەنتى مالىمدەمە جاسادى.

– بۇل دەرەك بويىنشا المالى اۋداندىق پوليسيا باسقارماسى قىلمىستىق ءىس قوزعادى. وقيعانىڭ سەبەبى مەن ءمان-جايى انىقتالۋدا، – دەدى الماتى قالالىق پوليسيا دەپارتامەنتىنىڭ رەسمي وكىلى سالتانات ازىربەك.

جانتۇرشىگەرلىك جاعداي بۇل كوپقاباتتى ءۇيدىڭ تۇرعىندارىن ەسەڭگىرەتىپ تاستادى. ونىڭ ۇستىنە، جوعارىعا اپاراتىن ەسىكتىڭ ءاردايىم اشىق تۇراتىنىن ءبارى بىلەدى. «جاسوسپىرىمدەر ءتۇرلى ارەكەتكە بارۋى مۇمكىن» دەپ الاڭدايدى. بۇگىنگى قايعىلى وقيعا بۇعان دالەل بولعانداي. تۇرعىندار پاتەر يەلەرى كووپەراتيۆىنەن اۋلاداعى قاۋىپسىزدىكتى قاتاڭ باقىلاۋعا الۋدى تالاپ ەتىپ وتىر.