16 qyrkúiekte Almatyda eki birdei oqýshy turǵyn úilerdiń birinen qulap ketken. Olardyń biri "eshkimge masyl bolǵym kelmeidi" dep áldekimge hat jibergen, - dep habarlaidy Dalanews.kz Almaty telearnasyna silteme jasap.
Jaǵa ustatarlyq jait Jambyl kóshesi men Seifýllin dańǵylynyń qiylysyndaǵy 9 qabatty baspanada boldy. Úiine qaityp kele jatqan almatylyq turǵyn Galina Vasileva aýlasynyń mańynan politsiia qyzmetkerlerin kórip, jaqyndai bergende jerden oqýshy qyzdardyń máiitin kórip eseńgirep qalǵan.
– Men emhanada bolǵam. Kelsem, politseiler júr. Eki qyzdyń denesin kórdim. Olardyń biikten qulap, ózderine qol jumsaǵanyn estidim. Meniń bilýimshe, olar aldymen, tamyryn kespek bolǵan. Alaida qoldarynan kelmegen soń, sekirgen sekildi. Sómkeleri tolǵan qorqynyshty zattar, sumdyq-ai! Myna shatyrǵa baratyn baspaldaq únemi ashyq turady, – dedi kýáger Galina Vasileva.
Turǵyndar qaiǵyly jaǵdaidan keiin politseilermen birge júrip, úi kireberisinde temeki qaldyqtaryn baiqaǵan. Odan soń shatyrǵa shyǵyp, oqýshy qyzdardyń sómkeleri men jeke zattaryn kórip shoshyǵan. Sebebi dorbalardyń ishinde qanǵa oranǵan mailyq, dárilik preparattar men qaýipti ótkir zattar bolǵan. Sondai-aq oqýshynyń biri uialy telefonynan beitanys adamǵa kúmándi habarlama jibergen.
– Qyzdardyń biriniń sómkesi jatty. Onyń ishinde as úi pyshaǵy, keskish zattar, qanǵa boialǵan mailyq, 7-synyptyń oqýlyqtary boldy. Biz joǵary kóterildik. Onda eki aiaq kiim, eki telefon boldy. Sosyn shylymnyń qaldyǵyn kórdik. Telefondaryn kýáger retinde bizdiń kózimizshe ashyp kórsetti, onda áldekimge «tamyrymdy tappai turmyn, sharshadym, eshkimge kedergi, masyl bolǵym kelmeidi» degen habarlama jiberilgen, – dedi kýáger Natalia Naýmova.
Kýágerlerdiń sózinshe, marqum qyzdar jaqyn dos bolǵan kórinedi. Olar sol mańaidaǵy №25 mekteptiń 7-synybynda oqyǵan. Biri kórshi aýlada, ekinshisi sol aýdandaǵy basqa kópqabatty úide turǵan. Oqiǵaǵa qatysty politsiia departamenti málimdeme jasady.
– Bul derek boiynsha Almaly aýdandyq politsiia Basqarmasy qylmystyq is qozǵady. Oqiǵanyń sebebi men mán-jaiy anyqtalýda, – dedi Almaty qalalyq Politsiia departamentiniń resmi ókili Saltanat Ázirbek.
Jantúrshigerlik jaǵdai bul kópqabatty úidiń turǵyndaryn eseńgiretip tastady. Onyń ústine, joǵaryǵa aparatyn esiktiń árdaiym ashyq turatynyn bári biledi. «Jasóspirimder túrli áreketke barýy múmkin» dep alańdaidy. Búgingi qaiǵyly oqiǵa buǵan dálel bolǵandai. Turǵyndar páter ieleri kooperativinen aýladaǵy qaýipsizdikti qatań baqylaýǵa alýdy talap etip otyr.
