الماتى پوليسياسى جەر سىلكىنىسى تۋرالى جالعان اقپارات تاراتقان ادامنىڭ ۇستالعانى تۋرالى مالىمدەدى، - دەپ حابارلايدى Dalanews.kz.
پوليسيا دەپارتامەنتىنىڭ باسپا ءسوز قىزمەتىنىڭ حابارلاۋىنشا، ءبىر كۇن بۇرىن ءتارتىپ ساقشىلارى جالعان اقپارات تاراتتى دەگەن كۇدىكتىنى قولعا تۇسىرگەن. ونىڭ 1985 جىلى تۋعان ايەل ەكەنى انىقتالدى. كۇدىكتىنىڭ ارەكەتىنە الداعى ۋاقىتتا قۇقىقتىق باعا بەرىلەدى.
سونىمەن قاتار پوليسيا اقپاراتتىق-كوممۋنيكاسيالىق جۇيەلەر ارقىلى جالعان اقپارات تاراتۋ قىلمىستىق جاۋاپكەرشىلىككە اكەپ سوعاتىنىن ەسكە سالدى.
“وسىنداي كەلەڭسىز جايتتارعا بايلانىستى ازاماتتاردى بەيمالىم ءارى كۇمان تۋدىرۋى مۇمكىن جالعان اقپاراتتىڭ تارالۋىنا جول بەرمەۋگە، سونىمەن قاتار تەك رەسمي دەرەككوزدەردەن الىنعان دەرەكتەردى باسشىلىققا الۋعا شاقىرامىز” - دەپ تولىقتىردى ۆەدومستۆو.
ەستەرىڭىزگە سالايىق، 23 قاڭتار كۇنى جەر سىلكىنىسىنەن كەيىن الماتىلىقتاردىڭ چاتتارىندا تاڭعى بەستە ەكىنشى رەت جەر سىلكىنىسى بولادى دەگەن اقپارات تاراي باستادى. ال ەندى ءبىرى قازۇۋ جاتاقحانالارى مەن باسقا دا عيماراتتاردىڭ قيراعانى تۋرالى حابارلاعان بولاتىن.
وسىعان بايلانىستى پوليسيا جالعان حابارلاما تاراتقان اۆتورلاردى انىقتاي باستادى. الماتىدا سەيسميكالىق قاۋىپسىزدىك ماسەلەلەرىنە ارنالعان كەڭەستە پرەزيدەنت قاسىم-جومارت توقايەۆ تا جەر سىلكىنىسى تۋرالى جالعان اقپارات تاراتقانداردى جاۋاپكەرشىلىككە تارتۋدى تاپسىردى.
ايتا كەتەيىك، ۇستالعان ايەل قىلمىستىق كودەكسكە سايكەس “بۇقارالىق اقپارات قۇرالدارىن پايدالانا وتىرىپ، قوعامدىق ءتارتىپتى بۇزۋ جانە جالعان اقپارات تاراتۋ ارقىلى ازاماتتاردىڭ قۇقىقتارى مەن زاڭدى مۇددەلەرىنە ايتارلىقتاي زيان كەلتىردى” دەگەن ايىپ ارقالاۋى مۇمكىن.
ناتيجەسىندە، جالعان اقپارات اۆتورىنا 3 مىڭ ايلىق ەسەپتىك كورسەتكىش مولشەرىندە ايىپپۇل سالىنۋى مۇمكىن. نە سول مولشەردە تۇزەۋ جۇمىستارىنا، نە 800 ساعاتقا دەيىن قوعامدىق جۇمىستارعا، نە ءۇش جىلعا دەيىن ەركىندىگىن شەكتەۋگە، نە ءۇش جىلعا دەيىن باس بوستاندىعىنان ايىرىلۋى مۇمكىن.
