الماتىدا وتاندىق تەحنولوگيالار نەگىزىندە ءوندىرىس قالدىقتارىنان قۇرعاق قۇرىلىس قوسپالارىن شىعاراتىن جاڭا زاۋىت ىسكە قوسىلدى، دەپ حابارلايدى Dala News.
جوبا Satbayev University عالىمدارىنىڭ قاتىسۋىمەن جانە ءبىرقاتار قازاقستاندىق جوعارى وقۋ ورىندارى مەن عىلىمي ۇيىمداردىڭ بىرلەسۋى ارقىلى جۇزەگە اسىرىلعان. عىلىمي توپ زەرتتەۋ جۇمىستارىن تولىق سيكل بويىنشا جۇرگىزگەن – رەسەپتۋرا ازىرلەۋدەن باستاپ، شيكىزاتتى ىرىكتەۋ، تەحنولوگيالىق پروسەستەردى باپتاۋ جانە ءوندىرىستى ىسكە قوسۋعا دەيىن.
جوبانىڭ باستى ەرەكشەلىگى – جەرگىلىكتى مينەرالدى شيكىزات پەن قايتا وڭدەلگەن وندىرىستىك قالدىقتاردى پايدالانۋ. بۇل ءتاسىل ەكولوگيالىق جۇكتەمەنى ازايتىپ قانا قويماي، ءوندىرىستىڭ ەكونوميكالىق تيىمدىلىگىن ارتتىرۋعا مۇمكىندىك بەرەدى.
Satbayev University پروفەسسورى رۋسلان نۇرلىبايەۆتىڭ ايتۋىنشا، عالىمدار تەك جاڭا ماتەريالدار تەحنولوگياسىن جاساپ قانا قويماي، ونى ونەركاسىپتىك دەڭگەيگە دەيىن جەتكىزگەن.
زاۋىتتا وندىرىلەتىن قۇرىلىس قوسپالارى جوعارى بەرىكتىككە يە، ۇلتتىق ستاندارتتارعا سايكەس كەلەدى جانە سەرتيفيكاتتاۋدان وتكەن. قازىرگى تاڭدا بۇل ونىمدەر وتاندىق قۇرىلىس كومپانيالارى تاراپىنان قولدانىلىپ جاتىر.
جوبا اياسىندا ىسكە قوسىلعان DIATOMITE زاۋىتى Satbayev University بازاسىندا قۇرىلىپ جاتقان TECHNOPARK STROYTECH يننوۆاسيالىق كەشەنىنىڭ ءبىر بولىگى بولىپ تابىلادى. بۇل باستاما مەملەكەت باسشىسى قاسىم-جومارت توقايەۆ تاپسىرماسىنا سايكەس ۋنيۆەرسيتەتتەر نەگىزىندە تەحنولوگيالىق پاركتەر قۇرۋ جانە عىلىمدى ءوندىرىس سالاسىنا ەنگىزۋ ماقساتىندا جۇزەگە اسىرىلۋدا.
اۋقىمدى جوباعا سونداي-اق د. سەرىكبايەۆ اتىنداعى شىعىس قازاقستان تەحنيكالىق ۋنيۆەرسيتەتى، م. اۋەزوۆ اتىنداعى وڭتۇستىك قازاقستان ۋنيۆەرسيتەتى، مەتاللۋرگيا جانە بايىتۋ ينستيتۋتى جانە يندۋستريالىق سەرىكتەس «SAVENERGY» كومپانياسى قاتىسۋدا.
عىلىم جانە جوعارى ءبىلىم ءمينيسترى ساياسات نۇربەك بۇل جوبانىڭ باستى ەرەكشەلىگى – عىلىم مەن بيزنەستىڭ ءتيىمدى بايلانىسىندا ەكەنىن اتاپ ءوتتى. ونىڭ ايتۋىنشا، مۇنداي تاجىريبەنى ەل كولەمىندە كەڭىنەن ەنگىزۋ جوسپارلانىپ وتىر.
زاۋىت بازاسىندا وقۋ-زەرتحانالىق كەشەن دە جۇمىس ىستەيدى. مۇندا ماگيسترانتتار مەن دوكتورانتتار عىلىمي زەرتتەۋلەرگە قاتىسىپ، جاڭا قۇرىلىس ماتەريالدارىن سىناقتان وتكىزەدى.
الداعى ۋاقىتتا ءونىم تۇرلەرىن كوبەيتۋ، ءوندىرىس كولەمىن ارتتىرۋ جانە وسى تەحنولوگيالاردى قازاقستاننىڭ باسقا وڭىرلەرىندە دە ەنگىزۋ جوسپارلانىپ وتىر.
