16 ناۋرىز كۇنى الماتى بەلسەندىلەرىنىڭ ۇيىمداستىرۋىمەن “جاڭا قازاقستان” تاقىرىبىندا جاستار قوزعالىسىن ۇيىمداستىرۋ تۋرالى وتىرىس ءوتتى.
ءىس-شاراعا قوعام بەلسەندىسى، مەسەنات سىرىمبەك تاۋ، شىعارماشىل جاستار وكىلى وڭداسىن كۇلىمبەت، G-38 ستۋدەنتتىك قوزعالىسىنىڭ نەگىزىن قالاۋشى ايسۇلۋ ەرنيازوۆا، سپورت شەبەرى جانقوش تۇراروۆ، ءال-فارابي اتىنداعى قازۇۋ پرورەكتورى ءاليا ماساليموۆا، اباي اتىنداعى قازۇپۋ پرورەكتورى شىڭعىس نۇرلانوۆ، قبتۋ پرورەكتورى ەكاتەرينا سمولياكوۆا، حبك پرورەكتورى قايىرجان مەڭدىعالييەۆ جانە وزگە دە جوو-داردىڭ وكىلدەرى قاتىستى.
شارا بارىسىندا سپيكەرلەر جاستار مەن ستۋدەنتتەردىڭ بەلسەندىلىگىن ارتتىرۋ ماقساتىندا قوعام بەلسەندىلەرى تاراپىنان قانداي جۇمىس اتقارىلۋ كەرەكتىگىن ايتتى. 18 ناۋرىز كۇنى ساعات 14:00-دە الماتى جاستارىنا جاقسى سەرپىلىس بەرۋ ءۇشىن «الماتى ارەنادا» جەكە كاسىپكەرلەردىڭ قولداۋىمەن كونسەرت وتەتىنىن حابارلادى. بۇل كونسەرتكە تانىمال ونەر جۇلدىزدارى مەن اتاۋلى ازاماتتار قاتىسادى، ولار مەرەكەلىك باعدارلامامەن قوسا، ونەگەلى اڭگىمە ايتىپ، ءوز تاجىربيەسىمەن بولىسەدى.
«سوڭعى ۋاقىتتا اينالامىز نەگاتيۆكە تولىپ كەتتى. ستۋدەنتتەرىمىز ونلاين وقۋ فورماتىنا كوشكەلى بەرى، قوعامدىق ىستەرگە بەلسەندى ات سالىسا الماي ءجۇر. سوندىقتان ءبىز جاستارعا جاقسى كوڭىل-كۇي سىيلاپ، ولارعا ءوز تاجىربيەمىزبەن بولىسسەك دەگەن نيەتتەمىز. ماقساتىمىز پارتيا قۇرىپ، ساياسي مانساپ باستاۋ ەمەس. ازاماتتىق ءارى اعالىق جاۋاپكەرشىلىگىمىزدى سەزىنىپ، جاستاردى جاقسى ىستەردىڭ باسىندا بىرىكتىرمەكپىز – دەدى وسى وتىرىستىڭ ۇيىمداستىرۋشىسى سىرىمبەك تاۋ.
جوو-داردىڭ پرورەكتورلارى جەكە كاسىپكەرلەردىڭ مۇنداي نيەت ءبىلدىرىپ، قوعامعا پايدالى ءىس ۇيىمداستىرۋىن ستۋدەنتتەردىڭ قۋانا قارسى القانىن حابارلادى:
«جاستاردى قولداۋعا باعىتتالعان بۇل شارانى ءبىزدىڭ ستۋدەنتتەر جاقسى قابىلدادى. ءقازىردىڭ وزىندە 10-نان استام جوو باسشىلىعى ايتىلعان جۇمىستارعا ۇلەس قوسۋعا ءوز نيەتتىلىكتەرىن ءبىلدىردى. وسى وتىرىستى ۇيىمداستىرۋدىڭ ماقسات-مۇددەسى بۇگىنگى پرەزيدەنت جولداۋىنا ايتىلعان ماسەلەلەرمەن تۇسپا-تۇس كەلەدى. مەملەكەت باسشىسى ق.توقايەۆ «قازاقستان بىزدەن باسقا ەشكىمگە كەرەك جوق» دەدى. ۇكىمەت تاپسىرماسىنان بولەك قوعام بەلسەندىلەرىنىڭ بىرىگىپ ەل دامۋىنا قادام جاساۋى، پرەزيدەنت سوزدەرىن دۇرىس ءتۇسىنۋىمىزدىڭ بەلگىسى – دەدى حبك پرورەكتورى قايىرجان مەڭدىعالييەۆ.
شارا ۇيىمداستىرۋشىلارى بۇدان كەيىن دە جاستاردى قولداۋعا ارنالعان وزگە دە جۇمىس اتقارۋ جوسپاردا بار ەكەنىن حابارلادى.
