12 شىلدەدەن 17 قىركۇيەككە دەيىن الماتى قالاسىندا الماتى قالاسى تۋريزم باسقارماسىنىڭ ۇيىمداستىرۋىمەن، حالىقارالىق جانە ۇلتتىق ترەنەرلەردىڭ قاتىسۋىمەن تۋريستىك گيدتەر اسسوسياسياسىنىڭ دۇنيەجۇزىلىك (WFTGA) كۋرستارى ءوتتى. باعدارلاما ەكسكۋرسيالىق قىزمەتتەردىڭ ساپاسىن ارتتىرۋعا، تۋريستەرگە قىزمەت كورسەتۋ سالاسىنداعى داعدىلاردى دامىتۋعا، سونداي-اق گيدتەردىڭ كاسىبي دەڭگەيىن ارتتىرۋعا باعىتتالعان.
وقىتۋ بىرنەشە تىلدە ءوتتى: قازاق، ورىس، اعىلشىن جانە جۇڭگو. وقىتۋ باعدارلاماسى تەوريالىق جانە پراكتيكالىق ساباقتاردى قامتىدى. بارلىعى 210 تىڭداۋشى كۋرسقا قاتىستى، ولار 12 توپقا ءبولىندى. ءار كۋرس 7 كۇنگە سوزىلدى، ونىڭ ىشىندە 5 كۇن تەوريالىق ساباقتار مەن 2 كۇن الماتى قالاسى بويىنشا پراكتيكالىق ەكسكۋرسيالار ءوتتى.
كۋرس كەلەسى باعىتتاردا جۇرگىزىلدى:
- ەكسكۋرسيالىق قىزمەتتەردىڭ جوعارى دەڭگەيىن قامتاماسىز ەتۋ.
- مادەني جانە تاريحي نىساندار تۋرالى ءبىلىمدى تەرەڭدەتۋ.
- كوممۋنيكاسيالىق داعدىلاردى دامىتۋ.
- گيدتەردىڭ حالىقارالىق جۇمىس ستاندارتتارىمەن تانىسۋ.
- شەتەلدىك تۋريستەرمەن قارىم-قاتىناس داعدىلارىن يگەرۋ.
قىتايدان كەلەتىن تۋريستىك اعىننىڭ ارتۋىنا بايلانىستى جۇڭگو ءتىلدى توپتارعا ەرەكشە كوڭىل ءبولىندى.
ءار وقۋ كەزەڭىنىڭ سوڭىندا «HOT» (Hands on Tourist Guiding course) ادىستەمەسى بويىنشا ەمتيحاندار وتكىزىلدى. تىڭداۋشىلار كۋرس اياقتاپ، كاسىبي دەڭگەيلەرىن جوعارى كورسەتتى. ەمتيحاندار قاتىسۋشىلاردىڭ جاڭا ستاندارتتار بويىنشا جۇمىس ىستەۋگە جانە ازىرلەنگەن تۋريستىك مارشرۋتتاردى ەنگىزۋگە دايىن ەكەنىن راستادى.
الماتىدا وتكەن گيدتەر مەن ەكسكۋرسيا جەتەكشىلەرىنىڭ بىلىكتىلىگىن ارتتىرۋ باعدارلاماسى دامىپ كەلە جاتقان تۋريستىك سالا جاعدايىندا ماڭىزدىلىعىن جانە تيىمدىلىگىن كورسەتتى. وسى كۋرستىڭ ارقاسىندا ماماندار تۋريستەرگە جوعارى ساپالى ەكسكۋرسيالىق قىزمەتتەردى ۇسىنۋعا مۇمكىندىك بەرەتىن جاڭا ءبىلىم مەن تاجىريبەلىك داعدىلارعا يە بولدى. كۋرستار وڭىردەگى ءتۋريزمدى دامىتۋدا جانە قالا قوناقتارىنا قىزمەت كورسەتەتىن جوعارى بىلىكتى كادرلاردى دايارلاۋدا ماڭىزدى قادام بولدى.
