الماتىدا ەسىرتكى جارناماسى بار پاراقشالاردى تاراتقاندار ۇستالدى، - دەپ حابارلايدى Dalanews.kz. 

قالا پروكۋراتۋراسىنىڭ ۇيلەستىرۋىمەن پوليسيا قىزمەتكەرلەرى قوعامدىق ورىنداردا ەسىرتكى زاتتارىن جارنامالاۋعا قارسى ءىس-قيمىلبويىنشا جەدەل-تەرگەۋ ءىس-شارالارىن جۇرگىزدى.

بىرلەسكەن جۇمىستىڭ بارىسىندا "50 000 رۋبلدەن باستاپ بارلىعىنا جۇمىس، ەركىن جۇمىس كەستەسى، جوعارى جالاقى" دەگەن ماتىندە حابارلاندىرۋى بار پاراقتاردى جابىستىرىپ جۇرگەن ەكى ادامنىڭ زاڭسىز ارەكەتتەرىنىڭ جولى كەسىلدى.

اتالعان ادامداردا QR-كود بەينەلەنگەن 300-دەن استام پاراق بولعان، وعان وتكەن كەزدە ەسىرتكى قۇرالدارىن وتكىزۋ جونىندەگى "تەلەگرام" - ارناعا سىلتەمە جاسالادى.

باستالعان سوتقا دەيىنگى تەرگەپ-تەكسەرۋ بويىنشا قازاقستان رەسپۋبليكاسى قىلمىستىق كودەكسىنىڭ 299-1-بابى بويىنشا التى جىلعا دەيىن باس بوستاندىعىنان ايىرۋ جازاسى كوزدەلگەن، ءتيىستى جەدەل ءىس-شارالار جۇرگىزىلۋدە.

قالا پروكۋراتۋراسى ازاماتتاردى بايۋدىڭ جەڭىل تاسىلدەرىن جانە جوعارى تابىس تابۋدى ۇسىناتىن كۇماندى جۇمىس بەرۋشىلەرگە بارماۋعا، كەرىسىنشە، مۇنداي فاكتىلەر انىقتالعان كەزدە قۇقىق قورعاۋ ورگاندارىنا دەرەۋ حابارلاۋعا شاقىرادى.