بۇگىندە مەگاپوليستە كوپبالالى جانە از قامتىلعان وتباسىلارعا ارنايى قۇرىلعان «باقىتتى وتباسىنىڭ» 9 ورتالىعى بار. ءوز كەزەگىندە نازيرا توعىزبايەۆا الماتىدا 24 426 كوپ بالالى وتباسى تۇراتىندىعىن ايتتى. ورتالىقتارعا 4 000 ادام تىركەلدى، 30 500 ادام اقپاراتتىق-كونسۋلتاسيالىق جانە رەسۋرستىق قولداۋ الدى، 3 200 ءوتىنىش بەرۋشىگە ادىستەمەلىك جانە قۇقىقتىق كومەك كورسەتىلدى، 3 000 تۇرعىن بازالىق ترەنينگتەردەن ءوتتى جانە 4 000 الماتىلىق وقۋ كۋرستارىن اياقتادى.
«باقىتتى وتباسى» ورتالىقتارىمەن قاتار الاتاۋ اۋدانىنىڭ از قامتىلعان وتباسىلارىنا ارنالعان ءداستۇرلى قولونەردى دامىتۋ ورتالىعى جۇمىس ىستەيدى، ونىڭ ماقساتى – اتادان بالاعا داستۇرلەردى، ادەت-عۇرىپتاردى، قولونەردى مۇرا ەتىپ قالدىرۋ.
– ورتالىقتا كوپ بالالى انالار ماماندىق الا الادى، ءقازىردىڭ وزىندە 575 ايەل كيىم ديزاينى، كىرپىك ۇزارتۋ، مانيكيۋر، قۇراق كورپە تىگۋ، تىگىن جانە ماسساج كۋرستارىنان ءوتىپ جاتىر، – دەدى نازيرا توعىزبايەۆا.
بۇل ءداستۇرلى قولونەر ورتالىعىنا 1 200 بالا كەلەدى. ولارعا دومبىرادا ويناۋدى، اكتەرلىكتى، ءبيدى، قولونەردى ۇيرەتەدى، بالالار ورىس جانە اعىلشىن، ۆوكال جانە حورەوگرافيا كۋرستارىنان وتەدى. كوپبالالى وتباسىلاردىڭ اتا-انالارى جەكە وسۋگە، كوشباسشىلىققا جانە تاربيەگە ارنالعان ترەنينگتەردە وقىتىلادى.
بۇل رەتتە قالادا «باستاۋ بيزنەس» باعدارلاماسى بويىنشا انالارعا كاسىپكەرلىك نەگىزدەرىن ۇيرەتۋگە باعىتتالعان «ىسكەر اnا» جوباسى، سونداي-اق «ەڭبەك» مەملەكەتتىك باعدارلاماسى بويىنشا قىسقا مەرزىمدى كۋرستار جۇزەگە اسىرىلۋدا.
– ماماندار كوپبالالى ايەلدەرگە جەكە كاسىپ اشۋعا جانە ونى جۇرگىزۋگە كومەكتەسەدى. ول ءۇشىن گرانتتار، وقۋ كۋرستارى جانە باسقا دا كومەك ۇسىنىلادى. بولاشاقتا كاسىپ اشقان سوڭ، كاسىپپەن اينالىساتىن انالارعا قولداۋ كورسەتىلەدى. بۇگىندە كوميسسيا 757 ايەلگە گرانتتى ماقۇلدادى، – دەدى نازيرا توعىزبايەۆا.
الەۋمەتتىك ءال-اۋقات باسقارماسىنىڭ باسشىسى قارتتاردى قولداۋ ءۇشىن الماتىدا بەلسەندى قارتايۋعا ارنالعان تاعى 9 ورتالىق بار ەكەنىن قوستى. ولارعا كۇنىنە 1000-نان استام ادام كەلەدى. مۇندا ولارعا بەلسەندى جانە سالاۋاتتى ءومىر سالتى تانىستىرىلادى. زەينەتكەرلەر يوگا تەراپيالىق ساباقتارىنا، سكانديناۆيالىق جاياۋ ءجۇرۋ جانە جاتتىعۋ تەراپياسىنا قاتىسادى.
