"دۇيسەنبى كۇنى تاڭەرتەڭ الماتى قالاسى بوستاندىق اۋداندىق سوتىنىڭ ءتوراعاسى التىنبەك بايانوۆ پارا العانى ءۇشىن ۇستالدى"، دەپ حابارلايدى Dalanews.kz Nege.kz سايتىنا سىلتەمە جاساپ.
قولدا بار اقپاراتقا قاراعاندا، ا.بايانوۆتى سوت سالاسى قىزمەتكەرلەرىنىڭ بىرىنەن پارا الىپ جاتقاندا سىبايلاس جەمقورلىققا قارسى قىزمەت ۇستاعان.
التىنبەك بايانوۆ 1978 جىلى جامبىل وبلىسى مەركە اۋدانى مەركى اۋىلىندا دۇنيەگە كەلگەن. ۇيلەنگەن، وتباسىلى. 1999 جىلى ءال-فارابي اتىنداعى ءقازۇۋ-دىڭ زاڭ فاكۋلتەتىن بىتىرگەن. ەڭبەك ءوتىلىن جامبىل وبلىستىق سوتىندا (1999-2001 ج.ج.) باس مامان بوپ باستاپ، اكىمشىلىك سوت ماماندارى جانە ساراپتامالىق-ۇيىمداستىرۋ ءبولىمىنىڭ باسشىسى (2001)، الماتى قالالىق سوتىنىڭ باس مامانى (2001-2005)، الماتى قالاسى جەتىسۋ اۋداندىق سوتىنىڭ ءتوراعاسى (2005-2014)، الماتى قالاسى اۋەزوۆ اۋداندىق №2 سوتىنىڭ ءتوراعاسى (2014-2015) قىزمەتىن جانە 2015 جىلدان باستاپ، قازىرگى تاڭعا دەيىن الماتى قالاسى بوستاندىق اۋداندىق سوتىنىڭ ءتوراعاسى قىزمەتىن اتقارىپ كەلگەن.
اقپاراتتى انىقتاۋ بارىسىندا، الماتى قالالىق سوتىنىڭ باسپا ءسوز قىزمەتىنە حابارلاسقان ەدىك. قالالىق سوتتىڭ باسپا ءسوز حاتشىسى اقپاراتتى بىزدەن ەستىپ وتىرعانىن، ونداي ماعلۇمات وزدەرىندە جوق ەكەنىن، مالىمەت تۇسكەن كەزدە جۋرناليستەر قاۋىمىنا جەدەل حابارلايتىنىن ەسكەرتتى.
"ەستۋىمىزشە، التىنبەك بايانوۆ سوت سالاسىندا ۇزاق ۋاقىتتان بەرى ءتوراعالىقتان مىزعىماي وتىرعان ءبىر مىقتىنىڭ جاقىن تۋىسى كورىنەدى.
سونىمەن قاتار، ونى قولما-قول اقشا تىگىپ كارتا ويناۋدىڭ جانە سوت ىسىنەن دە وزگە ماسەلەلەردى "ءساتتى شەشۋدىڭ" شەبەرى دەسەدى" دەپ جازىپتى Nege.kz.
