الماتىدا ءال-فارابي داڭعىلىنىڭ ءبولۋ جولاعى بويىنا 300-گە جۋىق جاڭا اعاش وتىرعىزىلدى – قالاداعى باستى ماگيسترالدىڭ ءبىرىن 292 ءىرى شەگىرشىن مەن شاعان اعاشى ساندەندىردى. بۇل تۋرالى ەكولوگيا جانە قورشاعان ورتا باسقارماسى ءمالىم ەتتى، – دەپ حابارلايدى Dalanews.kz
اعاشتاردىڭ بيىكتىگى – كەمىندە التى مەتر. ولار جەرگىلىكتى ءتالىمباقتاردا وسىرىلگەن جانە مەگاپوليستىڭ كليماتتىق جاعدايىنا بەيىمدەلگەن. مامانداردىڭ ايتۋىنشا، بۇل اعاش تۇرلەرى كەزدەيسوق تاڭدالماعان: شەگىرشىن مەن شاعان اۋانىڭ لاستانۋىنا، تەمپەراتۋرانىڭ اۋىتقۋىنا ءتوزىمدى ءارى اۋانى ءتيىمدى تازارتا الادى.
«بۇل اعاشتار جول بويىندا جايلى جاسىل ايماق قالىپتاستىرىپ قانا قويماي، كولىك قوزعالىسىنان بولاتىن لاستانۋ دەڭگەيىن تومەندەتۋگە كومەكتەسەدى. دۇرىس كۇتىم جاسالسا، تەز بەيىمدەلىپ، قالانىڭ لاندشافتتىق ماڭىزدى بولىگىنە اينالادى»، – دەدى «بوتانيكا جانە فيتوينترودۋكسيا ينستيتۋتى» رمك باس ديرەكتورى گۇلنار سيتپايەۆا.
تۇراقتى سۋارۋ، جاز ماۋسىمدا مينەرالدى تىڭايتقىشتار ەنگىزۋ جانە كۇزگى-قىسقى كەزەڭدە مامانداردىڭ ۇسىنىستارىنا سايكەس ارنايى كۇتىم جاساۋ سىندى اعاشتىڭ تەز تامىرلانۋى ءۇشىن كەشەندى كۇتىم شارالارى جوسپارلانعان.
الماتىدا كوگالداندىرۋ جۇمىستارى «تازا قازاقستان» رەسپۋبليكالىق باعدارلاماسى جانە «الماتى – ءبىزدىڭ ورتاق ءۇيىمىز» قالالىق باستاماسى اياسىندا بەلسەندى جۇرگىزىلۋدە. بيىل ناۋرىز ايىندا ساين، رىسقۇلوۆ، ساتبايەۆ كوشەلەرىندە، كوكجيەك شاعىن اۋدانىندا، گۇلدەر ساياباعىندا جانە باسقا دا قوعامدىق ورىنداردا 2 000-عا جۋىق ءىرى كوشەت وتىرعىزۋ جوسپارلانعان. قازىرگى تاڭدا 600-دەن استام اعاش ەگىلدى.
