سپيكەر قازان ايىندا مەگاپوليستە قالا تۇرعىندارىنا كوشەتتەردى ۇلەستىرۋ بويىنشا «جاسىل قالا» اكسياسى باستالعانىن اتاپ ءوتتى.
– بارلىق تىلەك بىلدىرۋشىلەر كوپپاتەرلى ۇيلەردىڭ اۋلالارىن جانە باسقا دا جالپى پايدالانۋ ورىندارىن كوگالداندىرا الادى. جاسىل ەكونوميكا باسقارماسى وتىرعىزۋ ءۇشىن جاپىراقتى اعاشتاردىڭ كوشەتتەرىن تەگىن تاراتادى. وسى كۇزدە 1500-گە جۋىق اعاش كوشەتتەرى تاراتىلدى، – دەدى سەرىك قۇسايىنوۆ.
اكسيانىڭ شارتتارى بويىنشا وعان قاتىسۋشىلار ەكى جىل بويى وتىرعىزىلعان اعاشتاردى كۇتۋ تۋرالى كەپىلدىك مىندەتتەمەگە قول قويىپ، جوسپارلانعان وتىرعىزۋ ورنىن، كوشەتتەر سانىن جانە ولاردىڭ تۇقىمدىق قۇرامىن كورسەتۋى ءتيىس. كوشەتتەردى تاراتۋ اۋدان اكىمدىكتەرى ارقىلى جۇزەگە اسىرىلادى. وتىرعىزعاننان كەيىن فوتوەسەپ جىبەرۋ كەرەك.
15 قاراشاداعى جاعداي بويىنشا 33 193 كوشەت، ونىڭ ىشىندە 22 931 اعاش جانە 10 262 اعاش بۇتالارى وتىرعىزىلدى.
الماتى اكىمىنىڭ ورىنباسارى 2025 جىلعا دەيىنگى دەندرولوگيالىق جوسپاردىڭ ازىرلەنگەنىن ەسكە سالدى. جەرگىلىكتى ورگانداردىڭ جوسپارىندا مەگاپوليستىڭ ءبىر تۇرعىنىنا كەمىندە 10 م2 جالپى پايدالانۋ ورىندارىن جاسىل ەكپەلەرمەن قامتاماسىز ەتۋ كودەلگەن. قازىرگى كەزدە بۇل كورسەتكىش شامامەن 7 م2 قۇرايدى.
ول قالادا وتىرعىزىلعان اعاشتاردىڭ اسسورتيمەنتى كليمات پەن توپىراق قۇرامىنا بايلانىستى عىلىمي قاۋىمداستىقپەن، لاندشافت ساراپشىلارىمەن بىرگە تاڭدالاتىنىن اتاپ ءوتتى. سونداي-اق، اكىمدىكتىڭ ماقساتى قالانىڭ ءاربىر اۋدانىن بىركەلكى كوگالداندىرۋمەن قامتاماسىز ەتۋ. الماتىدا جاسىل جەلەكتەردى سۋارۋ ءۇشىن جاڭا سكۆاجينالار سالىندى، ارىق جەلىسى تۇگەندەلدى، سۋارۋ جۇمىستارى كۇشەيتىلدى.
زيانكەستەرگە جانە زەڭگى اۋرۋلارىنا قارسى ءتورت رەت بيولوگيالىق وڭدەۋ جولىمەن اعاشتاردى ساۋىقتىرۋ جانە ەمدەۋ بويىنشا پروفيلاكتيكالىق جۇمىس قاتار جۇرگىزىلەدى.
2021 جىلدىڭ كوكتەمگى ماۋسىمىندا Jasyl Almaty باعدارلاماسى اياسىندا وتەمدىك مىندەتتەمەلەر ەسەبىنەن 64 مىڭنان استام اعاش وتىرعىزىلدى، ونىڭ ىشىندە تۇرعىنداردىڭ قاتىسۋىمەن اۋلا ىشىندەگى اۋماقتارعا اعاش وتىرعىزىلدى.
