الماتىدا 23 اقپاندا ولگا ءابدىعاپپاروۆاعا قاتىستى سوت ۇكىمى جاريالاندى، دەپ حابارلايدى Dala News.
الماتى قالالىق سوتىنىڭ باسپا ءسوز قىزمەتىنىڭ مالىمەتىنشە، قىلمىستىق ءىس مەدەۋ اۋداندىق №2 سوتىندا قارالعان. سوت شەشىمىمەن ولگا ءابدىعاپپاروۆا ق ر قىلمىستىق كودەكسىنىڭ 195-بابى بويىنشا – الداۋ نەمەسە سەنىمدى تەرىس پايدالانۋ ارقىلى مۇلىكتىك زالال كەلتىرۋ دەرەگىمەن كىنالى دەپ تانىلىپ، 2،5 جىلعا باس بوستاندىعىن شەكتەۋ جازاسىنا كەسىلدى. ۇكىم ازىرگە زاڭدى كۇشىنە ەنگەن جوق.
ەسكە سالا كەتەيىك، ولگا ءابدىعاپپاروۆانىڭ ۇستالعانى تۋرالى الماتى قالالىق پوليسياسى 2025 جىلدىڭ اقپانىندا حابارلاعان. تەرگەۋگە 2016–2018 جىلدارى جاسالعان شارتتاردىڭ ورىندالۋىن تالاپ ەتكەن تۇرعىن ءۇي كەشەنىندەگى ۇلەسكەرلەردىڭ ۇجىمدىق ارىزى سەبەپ بولعان.
ال ونىڭ جۇبايى، كاسىپكەر الماس ءابدىعاپپاروۆ 2022 جىلعى 5 شىلدەدە 1 ملن دوللار ۇرلاۋ ءىسى بويىنشا كىنالى دەپ تانىلىپ، 7 جىلعا باس بوستاندىعىنان ايىرىلعان. ول 2021 جىلدىڭ شىلدەسىندە قاماۋعا الىنعان بولاتىن. قىلمىستىق ءىس «AV Construction» ج ش س ديرەكتورىنىڭ ارىزى نەگىزىندە قوزعالىپ، ەليتالىق ۆيللا ساۋداسىنا قاتىستى بولعان. 2023 جىلدىڭ 11 ساۋىرىندە جوعارعى سوت ۇكىمدى وزگەرىسسىز قالدىردى. 2026 جىلدىڭ قاڭتارىندا ونىڭ قونىس كولونياسىنا اۋىستىرىلعانى بەلگىلى بولدى.
