ەرتەڭ، 9 جەلتوقسان كۇنى، الماتى قالاسى الاتاۋ اۋدانىنداعى №210 مەكتەپ-ليسەيدە «جاس سارباز» اسكەري-پاتريوتتىق سىنىبى جانە ۇلتتىق ۇلان باتىرلارى اتىنداعى «ەرلىك سىنىبىنىڭ» سالتاناتتى اشىلۋى وتەدى. شارا قازاقستان رەسپۋبليكاسىنىڭ تاۋەلسىزدىگى كۇنى مەرەكەسىنە وراي ۇيىمداستىرىلىپ وتىر، دەپ حابارلايدى Dalanews.kz.

ءىس-شارا ق ر ۇلتتىق ۇلانىنىڭ قولداۋىمەن، ونىڭ ىشىندە 7552 جانە 5571 اسكەري بولىمدەرىنىڭ ۇيىمداستىرۋىمەن وتەدى. جوبانىڭ باستى ماقساتى – جاس ۇرپاقتى وتانعا دەگەن سۇيىسپەنشىلىككە، باتىلدىق پەن جاۋاپكەرشىلىككە تاربيەلەۋ، سونداي-اق سالاۋاتتى ءومىر سالتىن ناسيحاتتاپ، وقۋشىلارعا اسكەري باعىتتا كاسىبي باعدار بەرۋ.

سالتاناتتى اشىلۋ باعدارلاماسىندا:
– قازاقستان رەسپۋبليكاسىنىڭ مەملەكەتتىك تۋىن سالتاناتتى تۇردە ەنگىزۋ؛
– 5571 اسكەري ءبولىمىنىڭ اسكەري وركەسترىنىڭ مەملەكەتتىك گيمندى ورىنداۋى؛
– قۇتتىقتاۋ سوزدەر؛
– «جاس سارباز» قاتارىنا قابىلداناتىن وقۋشىلاردىڭ انت بەرۋ ءراسىمى (انتتى العاشقى اسكەري دايىندىق ءپانىنىڭ ءمۇعالىمى، زاپاستاعى پولكوۆنيك نيازتاي بولات ۇلى الكەشيەۆ قابىلدايدى)؛
– وقۋشىلاردىڭ اسكەري-پاتريوتتىق ونەر كورسەتۋى؛
– اسكەري وركەستردىڭ ورىنداۋى؛
– ۇلتتىق ۇلان باتىرلارى اتىنداعى «ەرلىك سىنىبىنىڭ» رەسمي اشىلۋى كوزدەلگەن.

ءىس-شارا 9 جەلتوقسان، ساعات 10:00-دە وتەدى.

وتەتىن ورنى: الماتى قالاسى، دارحان ىقشام اۋدانى، حاليفا التاي كوشەسى 4ء-ۇي، №210 مەكتەپ-ليسەيدىڭ حولى.