الماتىنىڭ المالى اۋدانىندا 1951 جىلى سالىنعان ەسكى وقۋشىلار ءۇيىنىڭ ورنىنا جاڭا «شابىت» بالالاردى دامىتۋ ورتالىعى اشىلدى. جاڭا ورتالىق 2 500-دەن استام وقۋشىنىڭ ءبىلىم الىپ، شىعارماشىلىق قابىلەتىن دامىتۋعا مۇمكىندىك بەرەدى، – دەپ حابارلايدى Dalanews.kz
قالا اكىمى ەربولات دوسايەۆ جاڭا ورتالىققا بارىپ، وسكەلەڭ ۇرپاقتىڭ جان-جاقتى دامۋىنا جاسالعان جاعدايمەن تانىستى.
ورتالىق جامبىل جانە بايزاقوۆ كوشەلەرىنىڭ قيىلىسىندا ورنالاسقان. بۇرىن بۇل جەردە №2 وقۋشىلار ءۇيى بولعان، الايدا عيمارات ەسكىرىپ، زاماناۋي ستاندارتقا ساي كەلمەي قالعان.
2024 جىلى شىلدە ايىندا قالا اكىمدىگىنىڭ باستاماسىمەن جانە ينۆەستوردىڭ قولداۋىمەن ەسكى عيماراتتى بۇزىپ، جاڭا ورتالىق سالۋ تۋرالى شەشىم قابىلداندى. سونىڭ ناتيجەسىندە جالپى اۋماعى 1 415 شارشى مەتردەن 3 414 شارشى مەترگە دەيىن ۇلعايدى، ال جوبالىق قۋاتى 1 200 بالادان 2 500 بالاعا دەيىن ارتتى.
جاڭا ورتالىق زاماناۋي ءبىلىم بەرۋ تەحنولوگيالارىمەن جابدىقتالعان: ينتەراكتيۆتى پانەلدەر، مونوبلوكتار، نوۋتبۋكتەر، سونداي-اق، تەحنيكالىق، مۋزىكالىق، كوركەمدىك جانە سپورتتىق باعىتتارعا ارنالعان ارنايى قۇرال-جابدىقتار ورناتىلعان.
اكىمنىڭ ساپارى بارىسىندا وعان مادەني ءىس-شارالارعا ارنالعان امفيتەاتر، 25 مەترلىك جولاعى بار ءجۇزۋ باسسەينى، ارت-ستۋديا، حورەوگرافيا زالى، روبوتوتەحنيكا كابينەتى، تىگىن شەبەرحاناسى جانە مۋزىكالىق سىنىپتار كورسەتىلدى.
روبوتوتەحنيكا كابينەتىندە وقۋشىلار جوباسىن ۇسىندى.
«روبوت قۇراستىرعاندى جاقسى كورەمىن، بۇل بىزگە باعدارلامالاۋدى ۇيرەنۋگە جانە ءتۇرلى ماسەلەنى شەشۋگە كومەكتەسەدى. ينجەنەر بولۋدى ارماندايمىن، ال ورتالىقتاعى ساباقتار پايدالى داعدىلارعا ۇيرەتەدى»، – دەدى 7-سىنىپ وقۋشىسى ماناس ومىرعالييەۆ.
ورتالىقتا قاۋىپسىزدىكتى قامتاماسىز ەتۋ ءۇشىن بەينەباقىلاۋ جۇيەلەرى، بەت-الپەتتى تانۋ ارقىلى كىرەتىن تۋرنيكەتتەر، ورتكە جانە توتەنشە جاعدايعا ارنالعان دابىل جۇيەلەرى ورناتىلعان.
ورتالىق ديرەكتورى باقىتگۇل لەكەروۆا مەكەمەنىڭ باستى ماقتانىشى باسسەين ەكەنىن اتاپ ءوتتى.
«بۇرىن №2 وقۋشىلار ۇيىندە سپورتتىق-ساۋىقتىرۋ باعىتى ءۇشىن جاعداي جاسالماعان ەدى. ەندى بالالاردىڭ جۇزۋمەن اينالىسۋعا مۇمكىندىگى بار – دۋش كابينالارى مەن جايلى شەشىنەتىن بولمەلەر قاراستىرىلعان. جاڭا عيمارات بالالاردىڭ دارىنىن اشۋعا جانە وزدەرىن شىعارماشىلىق تۇرعىدا كورسەتۋگە ۇلكەن مۇمكىندىك بەرەدى»، – دەدى ول.
ورتالىق اۋماعىندا فۋتبول جانە باسكەتبول الاڭدارى، بالالارعا ارنالعان ويىن ايماعى سالىندى، سونداي-اق، تۋيا مەن بۇتالار وتىرعىزىلدى.
«شابىت» بالالاردى دامىتۋ ورتالىعى مەكتەپ جاسىنداعى بالالارعا ارنالعان. مۇندا ولار عىلىمي-تەحنيكالىق، الەۋمەتتىك-پەداگوگيكالىق، گۋمانيتارلىق، كوركەم-ەستەتيكالىق، مۋزىكالىق-اسپاپتىق جانە سپورتتىق-ساۋىقتىرۋ سىندى باعىتتار بويىنشا ءبىلىم الا الادى.
