الماتىدا ستۋدەنت جاستارعا قولايلى جاعداي جاساۋ ماقساتىندا جەكە ينۆەستيسيالار ەسەبىنەن سالىنعان جاڭا جاتاقحانا پايدالانۋعا بەرىلدى، دەپ حابارلايدى Dalanews.kz
جاڭا نىسان 120 ستۋدەنتكە ارنالعان جانە زاماناۋي تالاپتارعا تولىقتاي ساي كەلەدى. بۇل جاتاقحانادا قازاق ۇلتتىق قىزدار پەداگوگيگالىق ۋنيۆەرسيتەتىنىڭ ستۋدەنتتەرى تۇرادى.
جاتاقحانا اۋماعىندا ستۋدەنتتەردىڭ جايلى ءومىر ءسۇرۋى ءۇشىن بارلىق جاعداي قاراستىرىلعان: جارىق ءارى كەڭ بولمەلەر، اس ءۇي، وقۋ جانە دەمالىس ورىندارى دا بار. سونىمەن قاتار، كونفەرەنس زال wi-fi جەلىسىمەن جابدىقتالعان، بۇل ءبىلىم الۋشىلارعا ءتۇرلى ءىس-شارالار ۇيىمداستىرۋعا جانە ونلاين ءبىلىم الۋىنا مۇمكىندىك بەرەدى.
«بۇگىن ءبىز ءۇشىن وتە قۋانىشيى كۇن، سەبەبى جاڭا جاتاقحاناعا كوشىپ جاتىرمىز. مىندا ساباقتى وقۋعا، ءىس-شارا وتكىزۋگە تولىق جاعداي جاسالعان. جاتاقحانانىڭ ورنالاسقان جەرى دە ىڭعايلى. ايالداما، اسحانا، دۇكەن ءبارى جاقىن جەردە ورنالساقان»، - دەدى ستۋدەنتتەردىڭ ءبىرى.
بۇگىنگى تاڭدا الماتى قالاسىندا 127 ستۋدەنتتىك جاتاقحانا جۇمىس ىستەيدى. بۇل جاتاقحانالاردا 40،3 مىڭنان استام ستۋدەنت تۇرىپ جاتىر. الماتى قالاسى جاستار ساياساتى باسقارماسىنىڭ مالىمەتىنشە، 2024 جىلى 4304 توسەك-ورىنعا ارنالعان 16 جاڭا نىسان پايدالانۋعا بەرىلگەن. ال 2025 جىلدىڭ سوڭىنا دەيىن تاعى 6000 توسەك-ورىن قوسىلادى دەپ جوسپارلانۋدا.
ەسكە سالا كەتەيىك، الماتى قالاسىندا ستۋدەنتتەردى جاتاقحانامەن قامتۋ ماقساتىندا جوبالىق كەڭسە جۇمىس ىستەيدى. بۇل كەڭسە جاتاقحانا قۇرىلىسىن ءتيىمدى ۇيلەستىرۋمەن قاتار، مەملەكەتتىك باعدارلامالاردى جۇزەگە اسىرۋعا جانە جاستارعا ارنالعان تۇرعىن ءۇي ينفراقۇرىلىمىن دامىتۋعا ۇلەس قوسىپ كەلەدى.
