الماتى زووباعىندا ارىستانعا تاس اتقان تۇرعىن جازالاندى، دەپ حابارلايدى Dalanews.kz.
الەۋمەتتىك جەلىلەرگە جۇرگىزىلگەن مونيتورينگ بارىسىندا الماتى زووباعى اۋماعىندا قوعامدىق ءتارتىپتىڭ بۇزىلۋىنا قاتىستى بەينەماتەريال انىقتالدى.
اتالعان بەينەجازبادا جاس جىگىتتىڭ ارىستان قامالعان ۆولەرگە قاراي تاسقا ۇقساس زاتتى لاقتىرعانىن بايقاۋعا بولادى. وسى ارەكەتى ارقىلى ول قوعامدىق ءتارتىپتى جانە قوعامدىق ورىندا ءوزىن ۇستاۋ قاعيدالارىن ورەسكەل بۇزعان.
جۇرگىزىلگەن جەدەل ءىس-شارالار ناتيجەسىندە قۇقىق بۇزۋشىنىڭ جەكە باسى انىقتالىپ، ول ءمان-جايدى انىقتاۋ ءۇشىن پوليسيا بولىمىنە جەتكىزىلدى.
وسى دەرەك بويىنشا وعان قاتىستى ۇساق بۇزاقىلىق فاكتىسىمەن اكىمشىلىك ءىس قوزعالدى.
ءىستى الماتى قالاسىنىڭ مامانداندىرىلعان اۋدانارالىق اكىمشىلىك سوتى قاراپ، ازاماتتى كىنالى دەپ تانىلىپ، جاۋاپقا تارتىلدى.
