ەلىمىزدىڭ ءبىرقاتار ايماقتارى سەكىلدى الماتى وبلىسىندا دا جازدىڭ اپتاپ ىستىعى سۋمەن قامتۋ ماسەلەسىن قيىنداتىپ وتىر. حالىق سانىنىڭ ارتۋى، ەسكىرگەن جەلىلەر جانە ۇتىمسىز تۇتىنۋ قۇندى رەسۋرس تاپشىلىعىن تۋدىراتىن فاكتورلار وڭىردە كەزدەسەدى. دەسەك تە، وبلىس باسشىلىعى تۇرعىنداردى تىرشىلىك نارىمەن قامتاماسىز ەتۋ ماقساتىندا كەشەندى شارالاردى جۇزەگە اسىرۋدا، – دەپ حابارلايدى Dalanews.kz الماتى وبلىسى اكىمىنىڭ باسپا ءسوز قىزمەتىنە سىلتەمە جاساپ.
بۇگىندە وڭىردەگى ەلدى مەكەندەردى 100 پايىز ورتالىقتاندىرىلعان سۋمەن قامتاماسىز ەتۋ باستى مىندەتتەردىڭ ءبىرى بولىپ تابىلادى. اعىمداعى جىلى سۋمەن جابدىقتاۋ جۇيەلەرىن قايتا جاڭعىرتۋ جانە سالۋ بويىنشا 48 جوبانى جانە كارىز جەلىسى بويىنشا 18 جوبانى جۇزەگە اسىرۋعا بيۋدجەتتەن 27،9 ملرد تەڭگە بولىنگەن.
اۋقىمدى جۇمىستار جاڭا اۋماقتاردى ورتالىقتاندىرىلعان سۋمەن جابدىقتاۋعا جانە قولدانىستاعى ابونەنتتەرگە قىزمەت كورسەتۋ ساپاسىن ارتتىرۋعا مۇمكىندىك بەرەدى.
اعىمداعى جوبالارمەن قاتار، ۇزاق مەرزىمدى جوسپارلار ازىرلەنۋدە. ءقازىردىڭ وزىندە سۋمەن جابدىقتاۋ جانە سۋ بۇرۋ جۇيەلەرىن سالۋ جانە قايتا جاڭارتۋ بويىنشا 72 جوبالىق-سمەتالىق قۇجاتتاما ازىرلەنۋدە، «ءار ەلدى مەكەندە تازا اۋىز سۋ» ۇلتتىق جوباسىنا ەرەكشە كوڭىل ءبولىنىپ وتىر. ونىڭ اياسىندا 2024-2025 جىلدارى وبلىستاعى 81 ەلدى مەكەندە جەلىلەردى قايتا جاڭعىرتۋ، سونداي-اق 6 اۋىلدا جاڭا قۇرىلىس جۇرگىزۋ جوسپارلانۋدا.
سۋ رەسۋرستارىن باسقارۋدى وڭتايلاندىرۋ ءۇشىن ءبىرىڭعاي وپەراتور – «الاتاۋ پابليك ۋتيليتەس» كوممۋنالدىق شارۋاشىلىق ج ش س قۇرىلدى. بۇل بىزگە اكتيۆتەردى شوعىرلاندىرۋعا، قارجىلاندىرۋدى ورتالىقتاندىرۋعا، تاريفتەردى تومەندەتۋگە جانە كورسەتىلەتىن قىزمەتتەردىڭ ساپاسىن ارتتىرۋعا مۇمكىندىك بەرەدى.
كوممۋنالدىق شارۋاشىلىق مەكەمەسى سۋ ىسىرابىمەن بولدىرماۋمەن كۇرەسەدى. بۇل ءۇشىن جەكە جەلىلەردى سانيتارلىق نورمالارعا سايكەستەندىرۋ، سونداي-اق ولاردىڭ يەلەرىنىڭ جاۋاپكەرشىلىگىن ارتتىرۋ جوسپارلانۋدا. حالىق اراسىندا سۋدى ۇتىمدى تۇتىنۋ مادەنيەتىن قالىپتاستىرۋعا باعىتتالعان اقپاراتتىق ناۋقان جۇرگىزىلۋدە.
