الماتى وبلىسىندا پوليسيا ون ءتورتىنشى ەسىرتكى زەرتحاناسىن جويدى، – دەپ حابارلايدى Dalanews.kz Polisia.kz-كە سىلتەپ.
“قاراسورا – 2024” جەدەل-پروفيلاكتيكالىق ءىس-شارا بارىسىندا ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى بەساعاش اۋىلىنىڭ ماڭىندا پسيحوتروپتىق زاتتاردى زاڭسىز ءوندىردى دەگەن كۇدىكتىنى ۇستادى. پوليسيا توقتاتقان كولىكتى تەكسەرۋ بارىسىندا جولاۋشىلار ورىندىعىندا 22 جاستاعى ەر ادام بولعان.
جەكە ءتىنتۋ بارىسىندا ودان ەرەكشە ءيىسى، ۇنتاق زاتى بار قارا پوليەتيلەن پاكەت تابىلىپ، تاركىلەندى.
– ودان ءارى جەدەل ءىس-شارالار بارىسىندا پوليسيا قىزمەتكەرلەرى كۇدىكتىگە تيەسىلى جالعا الىنعان گاراجعا ءتىنتۋ جۇرگىزدى. تەكسەرۋ كەزىندە 11 پلاستيكالىق بوتەلكە تاركىلەندى، ول ۇستالعان ادامنىڭ ايتۋى بويىنشا سۇيىق كۇيدەگى مەفەدرون ەكەن. سونىمەن قاتار ءارتۇرلى كونتەينەرلەردە، سونىڭ ىشىندە توڭازىتقىشتا ساقتالعان پرەكۋرسورلار مەن ۇنتاق زاتتار بار ەكى كانيستر تابىلدى. ساراپتاما ناتيجەلەرى بويىنشا الىنعان زات جالپى سالماعى 1،7 كەلىدەن استام “الفا-PVP” پسيحوتروپتىق زاتى ەكەنى راستالدى، – دەدى الماتى وبلىسى پد ەققكب باستىعى ارداق قايساروۆ.
پسيحوتروپتىق زاتتاردى زاڭسىز دايىنداۋ فاكتىسى بويىنشا قىلمىستىق ءىس قوزعالدى. كۇدىكتى قاماۋعا الىندى.
تەرگەۋ جالعاسىپ جاتىر.
