– بيىل ءبىز مەملەكەت باسشىسىنىڭ «حالىق بىرلىگى جانە جۇيەلى رەفورمالار – ەل وركەندەۋىنىڭ بەرىك نەگىزى» جولداۋىنىڭ اياسىندا پاندەميادان كەيىن ەكونوميكانىڭ ءوسۋىن قالپىنا كەلتىرۋ، ينۆەستيسيا تارتۋ جانە حالىقتىڭ تابىسىن ارتتىرۋ جۇمىستارىن جالعاستىرىپ كەلەمىز، – دەپ اتاپ ءوتتى اماندىق باتالوۆ.
ونىڭ ايتۋىنشا، 10 ايدىڭ ىشىندە قۋاتى 1،2 ملن توننا، ينۆەستيسيا كولەمى 47 ملرد. تەڭگە بولاتىن «الاسەم» سەمەنت زاۋىتى ىسكە قوسىلعان. سونداي-اق، الكوگولسىز سۋسىندار شىعاراتىن «Pure Pack» زاۋىتى جۇمىسقا كىرىستى (قۋاتى 100 ملن ليتر). جىل سوڭىنا دەيىن جەمىس-كوكونىس ونىمدەرىن وندىرەتىن جانە تەرەڭ مۇزداتاتىن «Frosco» كاسىپورنىن (7،2 مىڭ توننا)، قۇرىلىس ماتەريالدارىن وندىرەتىن «اليۋگال» (جىلىنا 6 مىڭ توننا) جانە «ازيا تەمىر لتد» (10 مىڭ توننا) زاۋىتتارىن ىسكە قوسۋ جوسپارلانۋدا.
قازىرگى كەزدە وبلىستا «كوكا-كولا»، «RG BRANDS»، «حاملە»، «فيليپ مورريس»، «دجەي تي اي»، «فۋد ماستەر»، «Danone»، «ادال»، «كناۋف-گيپس»، «الاسەم»، «ەففەس» سياقتى ءىرى برەندتىك كاسىپورىندار جۇمىس ىستەپ تۇر. ترانسۇلتتىق كومپانيالاردىڭ رەسپۋبليكا بويىنشا 19 جوباسىنىڭ ىشىندە جالپى ينۆەستيسيا سوماسى 290 ملرد.تەڭگەنى قۇرايتىن 9 جوبا وبلىستا ىسكە اسىرىلۋدا. ولاردىڭ ىشىندە ءتورت جوبا – «ماريەۆەن فۋد»، «لۋكويل»، «Willo»، «فۋد ميللس» جۇزەگە استى. بۇلاردىڭ بارلىعى جوعارى تەحنولوگيالىق جانە ەكسپورتقا باعدارلانعان.
– جىل سوڭىنا قاراي ونەركاسىپ ءونىمىنىڭ كولەمى 1 ترلن. 300 ملرد. تەڭگەدەن اسادى، شيكىزاتتىق ەمەس ەكسپورت 6 پايىز وسىممەن 392 ملن اقش دوللارىنا جەتەدى. بۇل ەلباسىنىڭ تاپسىرماسىنا سايكەس قابىلدانعان يندۋستريالىق-يننوۆاسيالىق دامۋ باعدارلاماسىنىڭ ارقاسىندا مۇمكىن بولدى، – دەدى وبلىس باسشىسى اماندىق باتالوۆ.
