مەملەكەتتىك قىزمەت ۇلتتىڭ ايناسى. قوعامنىڭ بەت-بەدەرىن تۇزەر الاڭدا ءدال وسى ورتامەن تىكەلەي بايلانىستى. كەمەل كەلەشەكتىڭ ىرگە تاسىن قالاۋداعى ورنى ەرەكشە ورگاننىڭ جۇمىسى وڭتايلانعان.  بۇل تۋرالى اشىق ديالوگتىق كەزدەسۋدە ايقىندالدى.

الماتى وبلىسىنىڭ اۋماعىندا 780 مەملەكەتتىك ورگان قىزمەت اتقارۋدا. وبلىستىڭ مەملەكەتتىك قىزمەتشىلەرىنىڭ شتاتتىق سانى 7760 بىرلىكتى قۇرايدى. وتكەن جىلدىڭ قورىتىندىسى بويىنشا وبلىس كولەمىندە ىشكى كونكۋرستاردىڭ قورىتىندىسى بويىنشا جالپى 323 مەملەكەتتىك قىزمەتشى تاعايىندالدى.

قازاقستان رەسپۋبليكاسى مەملەكەتتىك قىزمەت ىستەرى اگەنتتىگىنىڭ الماتى وبلىسى بويىنشا دەپارتامەنتىنىڭ باسشىسى  ءلاززات بەيسەقۇلوۆانىڭ ايتۋىنشا، اۋىلداعى مەملەكەتتىك قىزمەتتىڭ تارتىمدىلىعىن ارتتىرۋ، بىلىكتى كادرلاردى تارتۋ ماقساتىندا اۋىلدىق ەلدى مەكەندەردە تۇرىپ جۇمىس ىستەيتىن مەملەكەتتىك قىزمەتشىلەرگە «ديپلوممەن اۋىلعا» جوباسى اياسىندا 100 اەك مولشەرىندە كوتەرمە جاردەماقى تولەۋ جانە 1500 اەك مولشەرىندە تۇرعىن ۇيگە بيۋدجەتتىك كرەديت بەرۋ تۇرىندە قولداۋ كورسەتىلەدى.

"دەپارتامەنت تۇراقتى نەگىزدە الەۋمەتتىك جەلىلەرگە، اقپاراتتىق جانە جاڭالىقتار پورتالدارىنا وبلىستىڭ مەملەكەتتىك قىزمەتشىلەرىنە قاتىستى جاعىمسىز جاريالانىمدارعا مونيتورينگ جۇرگىزەدى، سول ارقىلى بۇقارالىق اقپارات قۇرالدارى ارقىلى قوعاممەن كەرى بايلانىس ورناتادى. مونيتورينگ قورىتىندىسى بويىنشا، وبلىستىڭ مەملەكەتتىك ورگاندارىنىڭ قىزمەتكەرلەرىنە قاتىستى 2020 جىلى تەرىس سيپاتتاعى 37 ماتەريال انىقتالدى، ونىڭ 16-سى راستالدى، قورىتىندىسى بويىنشا بارلىعى تارتىپتىك جاۋاپكەرشىلىككە تارتىلدى"، - دەدى ءلاززات بەيسەقۇلوۆا.

سونىمەن قاتار، باسشى ءقازىر مەملەكەتتىك قىزمەتشىلەرگە رۇقسات ەتىلگەن سىيلىقتىڭ شەگى زاڭمەن الىنىپ تاستالعانىن اتاپ ءوتتى. مەملەكەتتىك قىزمەتشىگە جانە ونىڭ وتباسى مۇشەلەرىنە كەلىپ تۇسكەن بارلىق سىيلىقتار، ءتىپتى ولار بىلمەي كەلىپ تۇسكەن سىيلىقتاردى قوسا العاندا، كۇنتىزبەلىك جەتى كۇن ىشىندە مەملەكەتكە بەرىلۋگە ءتيىس.

«وزدەرىڭىز بىلەسىزدەر، مەملەكەتتىك قىزمەتشىلەرگە مەملەكەتتىك فۋنكسيالاردى ورىنداۋعا بايلانىستى سىيلىقتار الۋعا زاڭنامادا تىيىم سالىنعان. سونىمەن قاتار، ازاماتتىق كودەكستە قۇنى 10 اەك-تەن اساتىن سىيلىقتار بەرۋگە رۇقسات ەتىلمەگەن»،-دەيدى دەپارتامەنت باسشىسى.

بۇگىندە پرەزيدەنت تاپسىرماسىن ىسكە اسىرۋ اياسىندا مەملەكەتتىك قىزمەتتەردى ەلەكتروندىق فورماتقا كوشىرۋ بويىنشا بەلسەندى جۇمىستار جۇرگىزىلۋدە. ماسەلەن، الماتى وبلىسىندا قىزمەت كورسەتۋشىلەرمەن 386 مەملەكەتتىك قىزمەت ءتۇرى كورسەتىلەدى، ونىڭ ىشىندە ەلەكتروندىق قىزمەتتەردىڭ ۇلەسى شامامەن 87% - دى قۇرايدى.

اتالعان دەپارتامەنت، بۇدان وزگە "Egov جارشىسى"، "سەرۆيستىك اكىمدىك" اكىمدىك سىندى ءىرى جوبالاردى جۇزەگە اسىرعان. ايت كەتەيىك، اتالعان باستاما رەسپۋبليكا بويىنشا العاش رەت قولعا الىنعان بولاتىن. سونداي-اق، مەملەكەتتىك قىزمەتتىڭ الەۋەتىن ارتتىرۋ ءۇشىن 2018 جىلى جەتىسۋ ۋنيۆەرسيتەتىمەن ەكى جاقتى مەموراندۋمعا قول قويىلعان ەدى. ناتيجەسىندە «جەتىسۋ» مەملەكەتتىك قىزمەت مەكتەبى جۇمىس جاساپ كەلەدى.

ورىن الىپ جاتقان وڭ وزگەرىستەرگە قاراماستان، كىزمەتتەرگە سۇرانىستىڭ جىل سايىن ارتۋىمەن ولاردى كورسەتۋ ساپاسىنا ءتيىستى باقىلاۋدى قامتاماسىز ەتۋدىڭ وزەكتىلىگى ساقتالۋدا.

وكىنىشكە وراي، 2020 جىلى دەپارتامەنتپەن مەملەكەتتىك قىزمەت كورسەتۋ سالاسىندا 48 تەكسەرۋ ءىس-شاراسى جۇرگىزىلىپ، 55 قىزمەتكەر تارتىپتىك جاۋاپكەرشىلىككە تارتىلعان.