جاڭا قونىس يەلەرىن قۋانىشتارىمەن قۇتتىقتاعان وبلىس اكىمى:
– سىزدەردى جاڭا پاتەرگە يە بولۋلارىڭىزبەن شىن جۇرەكتەن قۇتتىقتايمىن. مەن تۇسكە دەيىن اۋدان اكىمىنىڭ وتكەن جىلدى قورىتىندىلاپ، بيىلعى جىلعا جاڭا مىندەتتەر بەلگىلەگەن ەسەپتى جيىنىنا قاتىستىم. كوپتەگەن ماسەلەلەر «نۇرلى جەر»، «نۇرلى جول»، «باقىتتى وتباسى»، «اۋىل – ەل بەسىگى» باعدارلامالارىنىڭ اياسىندا شەشىلىپ جاتىر. ەلباسىنىڭ سىندارلى ساياساتى مەن وسى سارا جولدى پرەزيدەنتىمىز قاسىم-جومارت كەمەل ۇلى توقايەۆتىڭ لايىقتى جالعاستىرۋىنىڭ ارقاسىندا كوپ بالالى جانە از قامتىلعان وتباسىلارعا ەرەكشە كوڭىل ءبولىنىپ كەلەدى.
ءبىز ءوز تاراپىمىزدان تۇرعىنداردى تۇرعىن ۇيمەن قامتۋعا باستى نازار اۋدارامىز. مەن وبلىستاعى ءتيىستى سالا باسشىلارىنا بيۋدجەتتىك تۇرعىن ۇيلەر سالۋ مەن «قارلىعاش» تۇرعىن ءۇي كەشەنىندەگى سياقتى زاماناۋي جانە ساپالى كوممەرسيالىق تۇرعىن ۇيلەردى ساتىپ الۋ كولەمىن جىل سايىن ارتتىرۋ تۋرالى تاپسىرما بەردىم.
تالدىقورعان قالاسىنىڭ ماڭىندا دا كوز تارتاتىن كوتتەدجدى قالاشىق بوي كوتەردى. مۇنداي جاڭا شاعىن اۋدانداردا تۇرعىندارعا قولايلى بولۋى ءۇشىن بالاباقشالار، مەكتەپتەر، اۋرۋحانا مەن ساۋدا ۇيلەرى سياقتى قاجەتتى نىسانداردى بىردەن جوسپارلايمىز.
سونىڭ بارلىعى دا حالىقتىڭ يگىلىگى ءۇشىن. سىزدەردى قونىس تويلارىڭىزبەن تاعى ءبىر مارتە قۇتتىقتايمىن، شاڭىراقتارىڭىزعا شاتتىق، بەرەكە مەن باقىت تىلەيمىن، – دەگەن ا. باتالوۆ جاڭا پاتەر كىلتتەرىن تابىستاپ، ءار وتباسىنا جاڭا تەلەديدار سىيعا تارتتى.
قونىس يەلەرى اتىنان ءسوز العان كوپ بالالى انا مارينا ۋبايدۋلا قىزى:
- مەن وسىدان 4 جىل بۇرىن تۇرعىن ءۇي كەزەگىنە تۇردىم. وسىنداي قۋانىشتى كۇنگە تەز جەتەمىن دەپ ويلاماپپىن. ەڭ الدىمەن بىزگە قامقورلىق كورسەتكەن پرەزيدەنتكە العىسىمىز زور. بارلىق قولداۋىنا ريزامىز. قامقورلىق جاساپ، كوڭىل ءبولۋ - ءبىز ءۇشىن ەڭ ۇلكەن سىي، - دەدى ول.
قاراساي اۋدانىنا ساپارى بارىسىندا اماندىق باتالوۆ ەڭ الدىمەن بيىلعى جىلدىڭ 8 قاڭتارى كۇنگى گاز جارىلىسى ورىن العان بەس قاباتتى ۇيگە بارىپ، ونداعى جۇرگىزىلىپ جاتقان جوندەۋ جۇمىستارىنىڭ بارىسىن كورگەنىن اتاپ ءوتۋ كەرەك. وقيعا كەزىندە ءۇيدىڭ بىرنەشە پاتەرى بۇلىنگەن ەدى. وسى جەردە وبلىس اكىمى كوپ قاباتتى ءۇي تۇرعىندارىمەن كەزدەستى. قايتىس بولعان ەكى ادامنىڭ جاقىندارى مەن تۋىستارىنا كوڭىل ايتىپ، تۇرعىندارعا پاتەرلەردى قالپىنا كەلتىرۋ جۇمىستارى بۇدان ءارى قالاي جۇرگىزىلەتىنى تۋرالى ءتۇسىندىرىپ بەردى.
– جوبالىق-سمەتالىق قۇجاتتارىن جاساۋعا قارجى ءبولىندى، سىزدەردە جىلۋ بولەك، تاماق دايىندايتىن گاز بولەك بولادى. ول ءۇشىن بلوك-مودۋلدى قازاندىق ورناتىلادى. بۇل قاۋىپسىزدىك ءۇشىن، ءارى ساپالى بولۋ ءۇشىن كەرەك. سونىمەن قاتار اۋلا اۋماقتارىن كوركەيتۋگە دە قارجى ءبولىپ وتىرمىز، - دەدى ا. باتالوۆ.
ج.دالابايەۆقا تۇرعىنداردان جاساقتالعان باستاماشىل توپتى تالعار اۋدانىنداعى «بوزتورعاي»، «مەليوراتور» تۇرعىن اۋداندارىندا سالىنعان بلوك-مودۋلدى قازاندىقتاردىڭ ۇلگىسىمەن تانىستىرىپ، كورسەتۋدى تاپسىردى. «قانداي جۇمىستى دا قۇرىلىس نورمالارى مەن ەرەجەلەرىنىڭ بارلىق تالاپتارىن ساقتاي وتىرىپ، تەحنيكالىق ەسەپتەۋلەردى ەسكەرە وتىرىپ ساپالى جۇرگىزۋ كەرەك. بۇل – ەڭ باستى تالاپ، جانە ول گازعا قاتىستى بولسا، تالاپ ءتىپتى كۇشتى بولۋى ءتيىس»، – دەدى ا.باتالوۆ.
ساپارىنىڭ سوڭىندا وبلىس اكىمى قاسكەلەڭ توپتىق سۋ بۇرعىشىنا بارىپ، ونداعى جۇمىستارمەن تانىستى. 3 كەزەڭمەن جۇزەگە اسىرىلاتىن جوبانىڭ جالپى قۇنى 9،4 ملرد. تەڭگە. قازىرگى كەزدە 1-كەزەڭى اياقتالعان، ول بيىلعى جىلدىڭ ناۋرىز ايىندا ىسكە قوسىلادى. سونىڭ ناتيجەسىندە قاسكەلەڭ قالاسىنداعى 60 مىڭعا جۋىق تۇرعىن ورتالىقتاندىرىلعان سۋ جۇيەسىنە قوسىلادى. 2022 جىلى ءىى كەزەڭىن ىسكە قوسۋ جوسپارلانعان. سول كەزدە قايرات، شالقار، جاندوسوۆ، شامالعان، تاسقىن، قۇمارال، ەڭبەكشى، ۇشتەرەك، ساۋىنشى، ايتەي، كوكتوبە اۋىلدارىنداعى 45 مىڭنان استام ادام قامتىلسا، 2023 جىلعا جوسپارلانعان ءىىى كەزەڭدە 12 ەلدى مەكەن قامتىلادى. سۋ تاراتقىشتىڭ وندىرىستىك قۋاتى تاۋلىگىنە 4150 تەكشە مەتر تازا سۋ تاراتۋعا جەتەدى.
الماتى وبلىسى اكىمىنىڭ باسپا ءسوز قىزمەتى
