الماتى وبلىسىندا 25 شىلدەدە جوعالىپ كەتكەن اسكەري تىكۇشاقتىڭ ءىشىنارا سىنىقتارى مەن ءبىر ادامنىڭ ءمايىتى تابىلدى،- دەپ حابارلايدى Dalanews.kz ق ر قورعانىس مينيسترلىگىنىڭ باسپا ءسوز قىزمەتىنە سىلتەمە جاساپ.
مينيسترلىكتىڭ مالىمەتىنشە، وقيعا ورىن العان العاشقى ساعاتتاردان باستاپ تاۋلىك بويى ىزدەستىرۋ-قۇتقارۋ جۇمىستارى جۇرگىزىلگەن. وپەراسياعا قورعانىس مينيسترلىگى، توتەنشە جاعدايلار مينيسترلىگى، ىشكى ىستەر مينيسترلىگى جانە باسقا دا ۆەدومستۆولاردىڭ كۇشتەرى جۇمىلدىرىلدى.
«قازاقستان عارىش ساپارى» اق قولداۋىمەن سپۋتنيكتىك دەرەكتەر جانە ماتەماتيكالىق ەسەپتەۋلەر ارقىلى تىكۇشاقتىڭ ىقتيمال ورنالاسقان ايماعى انىقتالعان. ارنايى تەحنيكا مەن ىزدەۋ توپتارى دەرەۋ سول اۋدانعا جونەلتىلدى.
"سۋ استىندا جۇرگىزىلگەن جۇمىستار كەزىندە شامامەن 14 مەتر تەرەڭدىكتەن تىكۇشاقتىڭ ءىشىنارا بولشەكتەرى جانە ءبىر ادامنىڭ ءمايىتى تابىلدى. قازىرگى ۋاقىتتا سايكەستەندىرۋ پروسەدۋراسى جۇرگىزىلىپ جاتىر"، - دەلىنگەن حابارلامادا.
ىزدەۋ جۇمىستارى سۋ استىنداعى كورىنۋدىڭ ناشارلىعى مەن لايلى تۇنبالارعا بايلانىستى قيىندىق تۋعىزعان. سوعان قاراماستان، جۇمىلدىرىلعان كۇشتەر وپەراسيانى مۇمكىندىگىنشە تەز اياقتاۋ ءۇشىن ۇيلەسىمدى جۇمىس ىستەۋدە.
ەسكە سالايىق، اۋە قورعانىس كۇشتەرىنىڭ EC-145 تىكۇشاعى بورتىندا ءۇش اسكەري قىزمەتشىمەن بىرگە 25 شىلدەدە لۋگوۆوە ەلدى مەكەنىنەن جوسپارلى ۇشىپ شىققاننان كەيىن بايلانىسقا شىقپاي قالعان. كەيىن سوربۇلاق سۋ قويماسى ماڭىندا عارىشتان تۇسىرىلگەن سۋرەتتە مايلى داق بايقالىپ، سول جەردە اۋە كەمەسىنىڭ سىنىقتارى تابىلعان ەدى.
