الماتى وبلىسىندا «AMANAT» پارتياسىنىڭ «اۋىل اماناتى» باعدارلاماسى اۋىل كاسىپكەرلەرىنە ۇلكەن مۇمكىندىك بەرىپ جاتىر،– دەپ حابارلايدى Dalanews.kz «AMANAT» پارتياسى الماتى وبلىستىق فيليالىنىڭ باسپا ءسوز قىزمەتىنە سىلتەمە جاساپ.
سوڭعى ەكى جىلدا وڭىردە 1300-دەن استام تۇرعىن جەڭىلدەتىلگەن نەسيە الىپ، ءوز ءىسىن جولعا قويعان. سولاردىڭ ءبىرى – ەڭبەكشىقازاق اۋدانى، بالتاباي اۋىلىنىڭ تۇرعىنى تالعات قاناپيا ۇلى. ول كيىز ءۇي ءوندىرىسىن تابىستى كاسىپكە اينالدىرعان.
كاسىپكەر بۇل ءىستى بەس جىل بۇرىن باستاعانىمەن، ءوندىرىس اۋقىمىن كەڭەيتۋگە قارجىسى جەتكىلىكسىز بولعان. وسى رەتتە ول «AMANAT» پارتياسىنىڭ الماتى وبلىستىق فيليالىنا بارىپ، باعدارلاما اياسىندا كەڭەس الدى. پارتيا وكىلدەرى وعان قۇجاتتاردى راسىمدەۋگە كومەكتەسىپ، نەسيە الۋدىڭ بارلىق ءتارتىبىن ءتۇسىندىردى. ناتيجەسىندە كاسىپكەر 3 ملن تەڭگە كولەمىندە جەڭىلدەتىلگەن نەسيە الىپ، زاماناۋي جابدىقتار ساتىپ الىپ، كاسىبىن كەڭەيتتى.
«باعدارلاما تۋرالى ەستىگەن ساتتە بىردەن كاسىپتى كەڭەيتۋ جوسپارى پايدا بولدى. بۇگىندە ونىمىمىزگە سۇرانىس جوعارى. اسىرەسە فەرمەرلەر مەن تۋريستىك نىسانداردان تاپسىرىس كوپ تۇسەدى. بۇل – وتباسىلىق بيزنەسىمىز، جاقىندارىمنىڭ بارلىعى وسى ىسكە اتسالىسىپ وتىر. كيىز ءۇي – ۇلتتىق قۇندىلىق. ونى زاماناۋي ۇلگىدە جاساپ، نارىققا بەيىمدەۋ – ءبىزدىڭ باستى مىندەتىمىز. باعدارلاما ارقىلى نەسيە الۋ وتە ءتيىمدى، پايىزدىق مولشەرلەمەسى تومەن. سوندىقتان اۋىل تۇرعىندارى ءۇشىن كاسىپ باستاۋعا ۇلكەن مۇمكىندىك بەرەدى»، – دەيدى كاسىپكەر.
بۇگىندە تالعات قاناپيا ۇلىنىڭ شەبەرحاناسى جىلىنا 300-گە جۋىق كيىز ءۇي ءوندىرىپ، ساتادى. ءونىم ساپاسىنىڭ جوعارى بولۋى جانە ۇلتتىق ناقىشتاعى زاماناۋي ديزاين كاسىپتىڭ قارقىندى دامۋىنا ىقپال ەتۋدە. كاسىپكەردىڭ ايتۋىنشا، كيىز ۇيلەرگە سۇرانىس نەگىزىنەن فەرمەرلەر، مالشىلار جانە تۋريستىك كەشەندەر تاراپىنان جوعارى.
«كيىز ءۇيدى ءارتۇرلى ماقساتتا پايدالانۋعا بولادى. جازدا ساياجايعا قويسا، قىستا قوسىمشا باسپانا رەتىندە قولدانۋعا مۇمكىندىك بار. سوڭعى جىلدارى ەكوتۋريزمنىڭ دامۋىمەن قاتار، دەمالىس ورىندارىندا كيىز ۇيلەرگە سۇرانىس ارتتى. كيىز ءۇيدىڭ ەرەكشەلىگى – جازدا سالقىن، قىستا جىلى. بۇل – اتا-بابامىزدان قالعان قۇندى مۇرا. ءبىزدىڭ اۋىلىمىزدا دا بۇل كاسىپپەن اينالىساتىن بىرنەشە كاسىپكەر بار. ولاردىڭ باسىم بولىگى «اۋىل اماناتى» باعدارلاماسىنىڭ قولداۋىمەن كاسىبىن كەڭەيتىپ، ءوندىرىس قۋاتىن ارتتىردى»، – دەيدى كاسىپكەر.
كيىز ءۇي وندىرىسىندە ۇلتتىق ناقىش پەن زاماناۋي تەحنولوگيالار ۇيلەستىرىلگەن. وتاندىق نارىقتان بولەك، شەبەرحانا ونىمدەرىنە شەتەلدىك تۋريستىك بازالار تاراپىنان دا سۇرانىس بار.
ايتا كەتۋ كەرەك، بيىل الماتى وبلىسىندا «اۋىل اماناتى» باعدارلاماسى اياسىندا 1،7 ملرد تەڭگەگە 186 جوبا قارجىلاندىرىلدى. باعدارلاما ارقىلى تەك كيىز ءۇي ءوندىرىسى عانا ەمەس، ازىق-تۇلىك وڭدەۋ، جىلىجاي شارۋاشىلىعى، مال شارۋاشىلىعى جانە قىزمەت كورسەتۋ سالالارى بويىنشا دا جاڭا جوبالار ىسكە اسىرىلىپ جاتىر.
