توپىراعىنان جارالعان.
ارمىسىڭ، قايران جەتىسۋ،
الىپتار شىققان اۋىلدان، – دەپ دومبىراسىن كۇمبىرلەتكەن ايتىس ونەرىنىڭ جۇيرىكتەرى جەتىسۋ تورىندە ق ر مادەنيەت مينيسترلىگىنىڭ قولداۋىمەن رەسپۋبليكالىق جوبا «ۇلى دالا ءان مەن جىرى، اقىندىقتىڭ جەتى قىرى» اتتى كونسەرت بەردى.
ۇلتتىق ونەردى دارىپتەۋ، ايتىستى اڭساعان كورەرمەندەرگە رۋحاني ازىق بەرۋ ماقساتىندا ۇيىمداستىرىلعان كونسەرتتىڭ شىمىلدىعىن اينۇر تۇرسىنبايەۆا اشتى.
بالعىنبەك بالاڭ كەلىپ تۇر،
نامىستى قولدان بەرمەگەن.
جانداربەك جارىق جۇلدىز عوي،
ماڭدايدا باعى سونبەگەن.
ساراداي قىزىڭ كەلىپ تۇر،
ەل-جۇرتىن جىرمەن تەربەگەن.
اي مەنەن نۇردان جارالعان،
اققۋىڭ ەدىم مەن دەگەن،
تورتەۋ بوپ جۇرسە، ءتورت اقىن،
ءتورت قۇبىلاسى تەڭ دەگەن.
ماڭدايعا بىتكەن ب ا ق شىعار،
بىزدە دە ارمان جوق شىعار
كوكتەمنىڭ كۇنى قاۋىشقان،
سىزدەردەي تەكتى ەلمەنەن ، – دەپ جىرىنان شاشۋ شاشتى.
اينۇر تۇرسىنبايەۆا مەن سارا توقتامىسوۆا كونسەرتتىك كورىنىسپەن، ياعني سىڭسۋ انىمەن قىز ۇزاتسا، «ەلوردادا جۇرسەمداعى جەتىسۋ، سەنسىڭ مەنىڭ جۇرەكتەگى استانام»، – دەپ شىققان جانداربەك بۇلعاقوۆ پەن بالعىنبەك يماشيەۆ بەتاشار جاساپ، كورەرمەندەرگە سالەم سالعىزدى.
الاتاۋدىڭ بوكتەرىندە، جەتىسۋدىڭ قاق تورىندە دۇنيەگە كەلگەن قوس ازاماتتىڭ كونسەرت بەرۋى ومىرگە كەلگەن كۇندەرىمەن تۇسپا-تۇس كەلىپ وتىر. رەسپۋبليكانىڭ تۇكپىر-تۇكپىرىن ارالاماس بۇرىن تۋعان جەرىنەن، ۇلكەندەرىنەن باتا الۋدى، كونسەرتىمىزدى تالدىقورعان قالاسىنان باستاۋدى ءجون سانادىق، – دەدى ب.يماشيەۆ.
يگى شارادان تۇسەتىن قارجىنى اقىندار قايىرىمدىلىققا جۇمساۋدى ۇيعارعان.
«مەيىرىم تانىتپاعان مەيىرىمگە بولەنبەيدى دەگەندەي، وسى كەشتەن تۇسكەن قاراجاتقا باسپانا ساتىپ الدىق. وسى قونىستى بەس بالاسىمەن تىرشىلىك تارشىلىعىن تاتىپ جۇرگەن ەركىن تاڭىربەرگەنوۆ اتتى ازاماتتىڭ وتباسىنا تابىس ەتكەلى وتىرمىز»، – دەگەن ب.يماشيەۆ كىلتتى سالتاناتتى تۇردە ءۇي يەلەرىنە تابىس ەتتى.
«وسى قۋانىش كوكتەن تۇسكەن نۇرداي اسەر ەتتى. كەشتىڭ قوناعى بولىڭىز دەپ بيلەت بەرگەن. ءۇيلى بولامىن دەپ ءۇش ۇيىقتاسام تۇسىمە كىرمەپتى. ەلىم، جەرىم دەگەن قازاقتىڭ اقىندارىنا العىسىم شەكسىز»، – دەپ قۋانىشىن جەتكىزدى جاڭا ءۇيدىڭ يەسى.
شارا سوڭىندا الماتى وبلىسى اكىمىنىڭ ورىنباسارى اقان ابدۋالييەۆ تالدىقورعان تۇرعىندارىنا كونسەرتتىك باعدارلاما تارتۋ ەتكەن ءتورت ايتىسكەرگە ايماق باسشىسى اماندىق باتالوۆتىڭ العىس حاتىن تابىس ەتتى.
سونداي-اق بەلگىلى ايتىسكەر بالعىنبەك يماشيەۆقا الماتى وبلىسىنىڭ قۇرمەتتى ازاماتى اتاعى بەرىلدى.
ايتا كەتۋ كەرەك، رەسپۋبليكالىق تۋر 22 قالانى قامتيتىن بولادى. ال 1 مامىر كۇنى الماتى قالاسىنداعى «AlmatyArena» مۇزايدىندا ايتىسكەر اقىن بالعىنبەك يماش ونەر جولىنىڭ 25 جىلدىعىنا ارنالعان مەرەكەلىك كونسەرتىن وتكىزەدى.
بالجان جۇمانبەكوۆا، الماتى وبلىسى
