الماتى وبلىسىنداعى بورالداي اۋىلىندا جاڭا قونىس يەلەرىنە كىلت تاپسىرۋ ءراسىمى ءوتتى،- دەپ حابارلايدى Dalanews.kz.
"2023-2029 جىلدارعا ارنالعان تۇرعىن ۇي-كوممۋنالدىق ينفراقۇرىلىمدى دامىتۋ" مەملەكەتتىك باعدارلاماسى اياسىندا الەۋمەتتىك وسال ساناتتاعى 22 وتباسى باسپاناعا يە بولدى. جىل سوڭىنا دەيىن اۋداندا تاعى 200 جالدامالى پاتەر بەرىلەدى دەپ جوسپارلانۋدا.
ىلە اۋدانىنىڭ اكىمى قايىرجان جاقسىمبەتوۆتىڭ ايتۋىنشا، حالىقتى تۇرعىن ۇيمەن قامتاماسىز ەتۋ – باستى الەۋمەتتىك مىندەتتەردىڭ ءبىرى.
"ءبىز ءار وتباسى، اسىرەسە الەۋمەتتىك وسال ساناتتاعى ازاماتتار ءۇشىن جەكە باسپانانىڭ ماڭىزدىلىعىن جاقسى تۇسىنەمىز. الداعى جىلدارى بۇل باعىتتاعى جۇمىستى جالعاستىرىپ، مۇمكىندىگىنشە كەزەكتەگى ازاماتتاردىڭ ارمانداعان پاتەرىنە قول جەتكىزۋىنە جاعداي جاسايمىز"، - دەدى اۋدان اكىمى.
ىلە اۋدانىندا قانداي ۇيلەر سالىنىپ جاتىر؟
ءقازىر وتەگەن باتىر كەنتىندە 72 پاتەرلىك ءۇش تۇرعىن ءۇيدىڭ قۇرىلىسى اياقتالۋعا جاقىن. بۇل پاتەرلەر "وتباسى بانك" ارقىلى كەزەكتە تۇرعان ازاماتتارعا ۇلەستىرىلەدى.
"تۇرعىن ۇي-كوممۋنالدىق ينفراقۇرىلىمدى دامىتۋ" مەملەكەتتىك باعدارلاماسى قولجەتىمدى باسپانا ماسەلەسىن شەشۋگە جانە مىڭداعان قازاقستاندىقتىڭ ءومىر ءسۇرۋ ساپاسىن جاقسارتۋعا باعىتتالعان.
