مەملەكەتتىك ءتىلدىڭ قولدانىس اياسىن كەڭەيتۋ، اباي شىعارماشىلىعىن ناسيحاتتاۋ ارقىلى قازاق مادەنيەتىنە، ءتىلى مەن ادەبيەتىنە دەگەن ۇلت جاستارىنىڭ ىقىلاسىن ارتتىرۋ ماقساتىندا وتكىزىلگەن شاراعا 17 مەن 29 جاس ارالىعىنداعى 17 ۇمىتكەر قاتىسىپ، ب ا ق سىنادى.
بايقاۋدى ۇيىمداستىرۋشىلاردىڭ سوزىنشە، وسكەلەڭ ۇرپاقتى اباي قۇنانباي ۇلىنىڭ مۇرالارىنا قىزىقتىرۋ، پوەزياعا باۋلۋ كەزەك كۇتتىرمەيتىن ماسەلە. جالپى ادەبيەتكە دەگەن قۇشتارلىقتى بۇگىننەن باستاپ قالىپتاستىرۋ كەرەك. مۇنى وبلىستىڭ ءار اۋدانىنان كەلگەن ۇمىتكەرلەر دە جەتە تۇسىنسە كەرەك، ولار بويىنداعى بارلىق ونەرىن ورتاعا سالىپ، قازىلارعا وزدەرىنىڭ وسال ەمەس ەكەندىگىن دالەلدەۋگە تىرىستى.
قازىلار القاسى دەمەكشى، بايقاۋعا قاتىسۋشىلارعا ءى. جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتى فيلولوگيا عىلىمدارىنىڭ كانديداتى، دوسەنت سايلاۋ قوجاعۇلوۆ، تالدىقورعان قالالىق ءبىلىم ءبولىمى ادىستەمەلىك كابينەتىنىڭ ادىسكەرى ءماريا ءسادۋاقاسوۆا، الماتى وبلىسىنىڭ تىلدەردى دامىتۋ جونىندەگى باسقارماسىنىڭ باسشىسى ايدار باشبايەۆ تورەلىك ەتتى.
بايقاۋدى اشقان باسقارما باسشىسى ايدار كاربوز ۇلى : «اباي الەمى ءبىزدى جەتى تۇنە اداستىرماس تەمىرقازىق ىسپەتتى. سوعان قاراپ، تىرلىگىمىزدىڭ دۇرىس-بۇرىسىن ساراپاتي الامىز. ءوز حالقىن «وسسىن-وركەندەسىن» دەيتىن ءار ازامات اۋەلى ابايدى وقىسىن، ابايعا قۇلاق اسسىن» دەگەن ەلباسى نۇرسۇلتان ءابىش ۇلى نازاربايەۆتىڭ ءسوزىن جان-جۇرەگىمەن تۇيسىنگەن ازاماتتار قاتارى جىل سايىن اباي وقۋلارىنا قاتىسقان سانالى ۇرپاقپەن تولىعىپ كەلەدى. داستۇرگە اينالعان «اباي وقۋلارى» بيىل دا ءوز جالعاسىن تاۋىپ وتىر. بىلەككە ەمەس، بىلىمگە سەنەتىن عاسىردا قوعامنىڭ ىرگەتاسىنا بەرىك كىرپىش بولىپ قالانار وزدەرىڭىزدەي ازاماتتار ۇلى اباي ارمانداعان بيىكتەن كورىنەرىنە بەك سەنىمدىمىن. وزدەرىڭىزگە تەك ساتتىلىك تىلەيمىن» دەدى.
ەكى كەزەڭنەن تۇرعان بايقاۋ وتە تارتىستى ءوتتى دەۋگە بولادى. «سەن تۇر مەن ايتايىن» دەگەن قاتىسۋشىلار اراسىنان ۇزدىكتى انىقتاۋ وڭاي بولمادى. دەگەنمەن، قازىلار القاسىنىڭ ءتوراعاسى سايلاۋ قاجىبەك ۇلى بايقاۋ بولعاننان كەيىن جەڭىمپازدىڭ بولاتىنىن تىلگە تيەك ەتىپ، باعى جانعانداردىڭ ءاتى-جونىن انىقتادى.
سونىمەن، «اباي وقۋلارى» وبلىستىق بايقاۋىنىڭ باس جۇلدەسىن قاراتال اۋدانىنان كەلگەن سالتانات بايبوسىنوۆا ەنشىلەپ، رەسپۋبليكالىق اباي وقۋلارىنا قاتىسۋعا جولداما الدى. ال ءبىرىنشى ورىنعا پانفيلوۆ اۋدانىنان قاتىسقان ەرقانات زاكەنوۆ لايىق دەپ تابىلدى. ەكىنشى ورىن ەكى قاتىسۋشىعا بۇيىردى. ناقتىراق ايتساق، سالتانات وتەباي (قاراساي اۋدانى) مەن سۇلتان جاقىپبەكوۆ ( اقسۋ اۋدانى) يەلەندى.ءۇشىنشى ورىن ءۇش ادامعا تيەسىلى بولدى: ءمولدىر جۇمابايەۆا ( ەڭبەكشىقازاق اۋدانى)، مەرۋەرت اۋباكىروۆا (سارقان اۋدانى) جانە كەنشىلەر قالاسىنان كەلگەن مەدەت تۋتەيەۆ الدى. ىنتالاندىرۋ سىيلىعى اقىندار مەن باتىرلار ەلى جامبىل اۋدانىنان كەلگەن گۇلمارال تەمىرالى مەن ايدانا مۇساعۇلوۆاعا (كەربۇلاق اۋدانى) بەرىلدى. بارلىق جەڭىمپازعا باسقارمانىڭ ارنايى ديپلومى مەن اقشالاي سىيلىعى تابىس ەتىلدى.
