وبلىستا 760 جالپى ورتا ءبىلىم بەرەتىن مەكتەپ بار. جاڭا وقۋ جىلىندا وقۋشى سانى وتكەن جىلمەن سالىستىرعاندا 16،6 مىڭ بالاعا ءوسىپ 426 مىڭنان اسىپ وتىر.
بيىلعى جىلى العاش رەت ءبىلىم ۇياسىنىڭ تابالدىرىعىن 44 مىڭنان استام بالا اتتاماق.
ەپيدەميولوگيالىق جاعدايعا بايلانىستى ءبىلىم مەكەمەلەرى وقۋشىلاردى ءتورت باعىتتا وقىتاتىن بولادى.
ءبىرىنشى باعىت بويىنشا 299 653 وقۋشى ينتەرنەت جەلىسى ارقىلى وقۋمەن قامتىلاتىن بولادى.
ەكىنشى، 84 471 وقۋشى ياعني ءبىلىم الۋشىلاردىڭ 20 پايىزى رەسپۋبليكالىق تەلەارنالار «ال-فارابي»، «ەلارنا» جانە وبلىستىق «جەتىسۋ» تەلەارناسى ارقىلى ءبىلىمىن جەتىلدىرەدى.
ءۇشىنشى، شالعايداعى ەلدى مەكەندەردەگى 138 مەكتەپتە سانيتارلىق تالاپتارعا سايكەس، ەكى اۋىسىمدا 15 بالادان 7721 وقۋشى شتاتتىق رەجيمدە وقيتىن بولادى.
ءتورتىنشى، باستاۋىش سىنىپ وقۋشىلارى، اتا-انالاردىڭ ءوتىنىشى نەگىزىندە بولجاممەن 5214 كەزەكشى سىنىپتاردا 34 792 بالا ءبىلىم الاتىن بولادى. بۇل وقۋشىلاردىڭ 8 پايىزىن قۇرايدى.
ءوڭىر باسشىسى بريفينگ بارىسىندا وبلىس بويىنشا وقۋشىلاردىڭ كومپيۋتەرلىك تەحنيكامەن قامتاماسىز ەتىلگەنىن تىلگە تيەك ەتتى. ونىڭ ايتۋىنشا، ءبىلىم الۋشىلاردىڭ 61 پايىزى تەحنيكامەن قامتاماسىزداندىرىلعان. سونداي-اق مەكتەپتەردەگى 23 678 كومپيۋتەر بالالارعا ۋاقىتشا پايدالانۋعا بەرىلمەك.
الداعى ۋاقىتتا مەملەكەتتىك - جەكەمەنشىك ارىپتەستىك اياسىندا 20 مىڭ كومپيۋتەر ساتىپ الىنادى دەپ كۇتىلۋدە.
مەكتەپ جاسىنداعى بوبەكتەردىڭ باسىم بولىگى ينتەرنەت جەلىسىنە قوسىلعان. ولاردىڭ كورسەتكىشى 88 پايىزعا جەتىپ جىعىلادى.
«مەسەناتتار تاراپىنان كومەكتەر كورسەتىلۋدە، ماسەلەن «جاس ارحيتەكتورلار مەن قۇرىلىسشىلار» قوعامدىق قورى وبلىستىڭ از قامتىلعان وتباسىلاردىڭ بالالارى ءۇشىن 150 كومپيۋتەر قۇرالدارىن تەگىن بەرۋى جوسپارلانۋدا»،-دەيدى اماندىق باتالوۆ.
ايتا كەتەرلىگى، «قازاقتەلەكوم» اق ارقىلى 98 مەكتەپتە ينتەرنەت جىلدامدىعىن 4 مبيت-تەن 8 مبيت-كە دەيىن ۇلعايتۋ كۇتىلۋدە.
سونداي-اق، ينتەرنەت جەلىسىنە قوسىلۋ ءۇشىن وقۋشىلارعا 43 مىڭ روۋتەرلار ساتىپ الۋ جوسپارلانۋدا.
سانداردى سويلەتەتىن بولساق، الماتى وبلىسى بويىنشا ءبىلىم سالاسىنا 314،2 ملرد. تەڭگە قارجى قارساتىرىلعان. جالپى وبلىستا اتالعان سالاعا بيۋدجەت قاراجاتىنىڭ 65% ءبولىنىپ وتىرادى.
انار سابىروۆا، الماتى وبىلسى.
