الماتى وبلىسى مەن جۇڭگو حالىق رەسپۋبليكاسىنىڭ ەكونوميكالىق ارىپتەستىگى جاقسى ناتيجە كورسەتۋدە. 2023 جىلدىڭ قورىتىندىسى بويىنشا ەكى ەل اراسىنداعى تاۋار اينالىمى 1،1 ملرد اقش دوللارىن قۇرادى. بۇل تۋرالى الماتى وبلىسىنىڭ اكىمى مارات سۇلتانعازييەۆ، شىڭجاڭ-ۇيعىر اۆتونوميالىق اۋدانىنان كەلگەن دەلەگاسيامەن رەسمي كەزدەسۋىندە مالىمدەدى، - دەپ حابارلايدى Dalanews.kz.
ءوڭىر باسشىسى ءوز سوزىندە وبلىستا ەكونوميكالىق بايلانىستاردى جاڭعىرتۋ جانە نىعايتۋ باعىتىنداعى جۇرگىزىلىپ جاتقان جۇمىستاردىڭ بەلسەندى ەكەنىن اتاپ ءوتتى.
كوممەرسيالىق اينالىمدى ودان ءارى ارتتىرۋ ماقساتىندا «قالجات قۇرعاق پورتى» دەپ اتالاتىن حالىقارالىق سيفرلى كولىكتىك-لوگيستيكا حابىن ەنگىزۋ جوسپارلانۋدا. لوگيستيكا مەن ساۋدا سالاسىنداعى بيزنەستى دامىتۋعا ارنالعان، زاماناۋي الاڭ سالۋ جوباسىنا جەرگىلىكتى ينۆەستورلار دا قىزىعۋشىلىق تانىتىپ ۇلگەردى. بۇل جوبا قىتايدان جۇك تاسىمالداۋدى ۇلعايتىپ، كولىكتىك جانە اۋىستىرىپ تيەۋ قىزمەتىن اتقاراتىن ماڭىزدى الاڭ بولماق.
ءوز سوزىندە وبلىستىڭ ءبىرىنشى باسشىسى وڭىردەگى حالىقارالىق قاتىناستاردى دامىتۋداعى ەلەۋلى پروگرەستى اتاپ ءوتتى. ونىڭ ايتۋىنشا، تابىس ەكونوميكانىڭ ءتۇرلى سالالارىندا ينۆەستيسيالىق جوبالاردى ىسكە اسىرۋمەن بايلانىستى.
"بىرلەسكەن ينۆەستيسيالىق جوبالاردى ىسكە اسىرۋ ەكونوميكالىق وسۋگە عانا ەمەس، شەتەلدىك ارىپتەستەرمەن بايلانىستى نىعايتۋعا دا ىقپال ەتەدى. وسىنىڭ ارقاسىندا ءبىزدىڭ ءوڭىرىمىز ءارتۇرلى ەلدەردىڭ ينۆەستورلارى مەن كاسىپكەرلەرى ءۇشىن بارعان سايىن تارتىمدى بولا تۇسۋدە، بۇل جالپى وركەندەۋ مەن دامۋعا ىقپال ەتەدى"، - دەپ اتاپ ءوتتى مارات سۇلتانعازييەۆ.
شىڭجاڭ-ۇيعىر اۆتونومياسىنىڭ حالىق ۇكىمەتىنىڭ ءتوراعاسى ەركين تۋنيازۋ قازاقستان مەن ش ۇ ا ر اراسىنداعى ساۋدا، ونەركاسىپ، كولىك، لوگيستيكا، اۋىل شارۋاشىلىعى جانە تۋريزم سياقتى ءتۇرلى سالالارداعى تابىستى ىنتىماقتاستىققا ەرەكشە توقتالدى. ول سونداي-اق بىرلەسكەن ينۆەستيسيالىق جوبالاردى جۇزەگە اسىرۋدا الماتى وبلىسى مەن ش ۇ ا ر ىنتىماقتاستىعىنىڭ بولاشاعىنا سەنىم ءبىلدىردى.
«قازاقستاننىڭ نەگىزگى كولىك جولدارىنىڭ قيىلىسىندا ورنالاسقان الماتى وبلىسى، لوگيستيكا مەن ساۋدانىڭ قارقىندى دامۋىنا ىقپال ەتەتىن ستراتەگيالىق ورتالىق بولىپ تابىلادى. الماتى قالاسى مەن جۇڭگو شەكاراسىنىڭ جاقىن ورنالاسۋى بۇل ايماقتىڭ ماڭىزدى كولىك تورابى عانا ەمەس، سونىمەن قاتار جۇك جانە جولاۋشى تاسىمالىن ۇلعايتۋدىڭ قۋاتتى كاتاليزاتورى. بۇل وڭىرلەر اراسىنداعى ءتيىمدى بايلانىستى قامتاماسىز ەتىپ، ايماقتىق دەڭگەيدە دە، ۇلتتىق دەڭگەيدە دە ەكونوميكالىق دامۋعا سەپتىگىن تيگىزەدى»، - دەدى ەركين تۋنيازۋ.
سوڭىندا ەركين تۋنيازۋ ەكونوميكانىڭ ءتۇرلى سالالارىنداعى ەكىجاقتى ىنتىماقتاستىقتىڭ نىعايا تۇسەتىنىنە، سونداي-اق، بۇرىن قول جەتكىزىلگەن كەلىسىمدەردىڭ جۇزەگە اساتىنىنا سەنىم ءبىلدىردى.
