قونايەۆ پەن الماتى قالالارىنداعى ستانسيالاردان باتىس قازاقستان وبلىسىنا سۋ تاسقىنىمەن كۇرەسۋ ءۇشىن ارنايى جانە ينجەنەرلىك تەحنيكالار جونەلتىلۋدە، – دەپ حابارلايدى Dalanews.kz الماتى وبلىسى اكىمىنىڭ باسپا ءسوز قىزمەتىنە سىلتەمە جاساپ.

الماتى وبلىسىنان جينالعان تەحنيكالار قۇرامىندا، كاماز، ساموسۆال، تراكتور، سۋ تاسىعىش جانە موتورلى قايىقتار بار. تەحنيكانى جونەلتۋگە دايىندىق جۇمىستارىنا 300-گە جۋىق ادام جۇمىلدىرىلدى، ونىڭ ىشىندە توتەنشە جاعدايلار دەپارتامەنتى، «قازاقستان تەمىر جولى» اق وكىلدەرى، 32363 اسكەري ءبولىمىنىڭ 55 اسكەري قىزمەتكەرى جانە قونايەۆ قالاسىنىڭ اكىمدىگى قاجەتتى ماتەريالداردى قامتاماسىز ەتىپ، جابدىقتاردى پلاتفورماعا تيەدى.

«ماريەۆەن فۋد تيان-شان» سەرىكتەستىگى مەن جەكە كاسىپكەر ارساماقوۆ سۋ باسقان وڭىرلەرگە بارا جاتقان جۇرگىزۋشىلەردى ازىق-تۇلىكپەن قامتاماسىز ەتتى.

– الماتى وبلىسى اكىمدىگىنىڭ باستاماسىمەن بۇگىندە سۋ تاسقىنىمەن كۇرەسۋ ءۇشىن باتىس قازاقستانعا قونايەۆ جانە الماتى قالالارىنداعى ستانسيالاردان 150 بىرلىك ارنايى تەحنيكا جونەلتىلۋدە. 

كەشە 60 تەحنيكا جانە ىشىندە 4 قايىق تيەلگەن 47 پلاتفورما جولعا شىقتى. سونىمەن قاتار 65 تەحنيكا پلاتفورمالارعا تيەلىپ جونەلتۋدى كۇتىپ تۇر. ءار پويىز دايىن بولعان بويدا جونەلتىلىپ وتىرادى.

ءار تەحنيكاعا ءبىر-بىر جۇرگىزۋشى تاعايىندالىپ، ولار دا  پويىزدىڭ باسىنداعى جولاۋشىلار ۆاگونىنا ورنالاسقان. بۇل شاراعا وبلىس كاسىپكەرلەرى، كوممۋنالدىق قىزمەتتەر مەن وبلىستىق باسقارمالار، سونىمەن قاتار شارۋا قوجالىقتارى قاتىسۋدا. حالقىمىزدى تابيعاتتان كەلگەن توسىن جاعدايدان قايتكەندە امان الىپ شىعامىز، ءبىزدىڭ كۇشىمىز بىرلىكتە، – دەدى وبلىس اكىمىنىڭ ورىنباسارى الماس باتانوۆ.

ايتا كەتەيىك، ايدىڭ باسىندا وبلىستىق توتەنشە جاعدايلار دەپارتامەنتى اتىراۋ قالاسىنا 33 جەكە قۇرام مەن 13 تەحنيكا اتتاندىردى، ولار كۇنى بۇگىنگە دەيىن بار.  اباي اۋدانىنا 6 قۇتقارۋشى مەن 2 بىرلىك تەحنيكا جىبەرىلدى.  ال بۇگىن 4 قۇتقارۋشى مەن 2 قايىق جونەلتىلەدى.

جونەلتىلگەن تەحنيكا شامامەن ءۇش كۇن جول ءجۇرىپ جانە ۋچاسكەگە جەتكەن سوڭ  بارلىق قاجەتتى جۇمىستاردى باستايدى.