سوت الماتى مەتروسىن سالۋ كەزىندەگى اقشا جىمقىرۋداعى ايىپتالۋشىلارعا تاعايىندالعان باس بوستاندىعىنان ايىرۋ جازاسىن جانە قارجىلىق ءوندىرىپ الۋدى كۇشىندە قالدىردى، دەپ حابارلايدى Dalanews.kz.

الماتى قالالىق سوتىنىڭ قىلمىستىق ىستەر جونىندەگى سوت القاسى 22 شىلدەدە مەتروپوليتەننىڭ ءبىرىنشى جەلىسىنىڭ ەكىنشى كەزەگىن سالۋ كەزىندە اسا ءىرى كولەمدە ۇرلىق جاسالدى دەگەن ىسكە بايلانىستى سوتتالعاندار مەن ولاردىڭ ادۆوكاتتارىنىڭ اپەللياسيالىق شاعىمدارىن قارادى. اڭگىمە «سارىارقا» جانە بۇرىن «دوستىق» اتالعان، ءقازىر «باۋىرجان مومىش ۇلى» ستانسيالارىن سالۋ جايلى بولدى.

مەملەكەتكە كەلتىرىلگەن شىعىن 5 ملرد تەڭگەدەن استام دەپ باعالاندى. ايىپتالۋشىلار ونى بىرلەسىپ وتەۋگە مىندەتتەلدى، سونداي-اق ولاردىڭ مۇلكىنە تىيىم سالىندى.

قۇنى 62 ملرد تەڭگەلىك ستانسيالاردى سالۋ تەندەرىن 2015 جىلى «الماتىمەتروكۇرىلىس» ۇتىپ العان. جۇمىس تەك 2022 جىلى اياقتالدى.

«مەتروپوليتەن» جانە «الماتىمەتروكۇرىلىس» كومپانيالارىنىڭ بۇرىنعى باسشىلارىنا 8 جىل باس بوستاندىعىنان ايىرۋ جازاسى تاعايىندالدى. وزگە فيگۋرانتتار 2 جىل 9 ايدان 8 جىلعا دەيىن تۇرمە جازاسى تاعايىندالدى.

ادۆوكاتتار ۇكىمدى جويۋدى جانە جاڭا ساراپتامالار تاعايىنداۋدى تالاپ ەتتى. ءبىراق اپەللياسيالىق سوت قولدا بار دالەلدەردى جەتكىلىكتى دەپ تانىدى.

مۇلىك پەن قارجىعا سالىنعان تىيىم مەملەكەتكە كەلتىرىلگەن شىعىن وتەلگەنگە دەيىن ساقتالادى. ال كەپىلدىك قاراجاتتىڭ ءبىر بولىگى قايتارىلدى.