«رايىمبەك باتىر» ستانسياسىندا مەتروپوليتەننىڭ زاماناۋي قاۋىپسىزدىك ستاندارتتارىنا سايكەس كەلەتىن جاڭا ۋاقىتشا قورشاۋلار ورناتىلدى، – دەپ حابارلايدى Dalanews.kz الماتى قالاسى اكىمىنىڭ باسپا ءسوز قىزمەتىنە سىلتەمە جاساپ.
ولار ەكى نەگىزگى قىزمەت اتقارادى – جولاۋشىلار ءۇشىن قورعانىس قۇرالى بولىپ تابىلادى جانە جارنامالىق پلاكاتتاردى ىلۋگە پايدالانىلادى.
قازىرگى ۋاقىتتا بۇل قورشاۋلاردىڭ جەل جۇكتەمەسىنە توزىمدىلىگى تەكسەرىلىپ جاتىر. بارلىق قاجەتتى سىناقتاردان وتكەننەن كەيىن وسىنداي قورشاۋلار مەترونىڭ باسقا ستانسيالارىندا دا ورناتىلاتىن بولادى.
سونىمەن قاتار، مەتروپوليتەن وكىلدەرى بۇرىن ورناتىلعان تەمىر قورشاۋلاردىڭ دا تەكسەرىلىپ جاتقانىن، قاجەت بولعان جاعدايدا ولاردىڭ الىناتىنىن اتاپ ءوتتى.
– الماتى مەتروپوليتەنى جولاۋشىلاردىڭ جايلىلىعى ءۇشىن ينفراقۇرىلىمدى جەتىلدىرۋگە ءاردايىم ۇمتىلادى. بۇل شەشىم اۆتوماتتاندىرىلعان پلاتفورمالىق ەسىكتەر (screen doors) ورناتىلعانعا دەيىنگى ۋاقىتشا شارا بولىپ تابىلادى. بارلىق جۇمىستار كاسىپورىننىڭ ءوز قاراجاتى ەسەبىنەن، بيۋدجەت قاراجاتىن تارتپاي جۇرگىزىلۋدە، – دەپ حابارلادى مەتروپوليتەننىڭ باسپا ءسوز قىزمەتى.
