بۇگىن تاڭەرتەڭ پەرۆومايسك يندۋستريالدى ايماعىنداعى ءورت باستالدى، دەپ حابارلايدى Dalanews.kz الماتى وبلىسىنىڭ توتەنشە جاعدايلار دەپارتامەنتىنە سىلتەپ.
بۇگىن تاڭەرتەڭ الماتىلىقتار قالانىڭ سولتۇستىك بولىگىندە قالىڭ قارا ءتۇتىندى بايقادى. وسى تۇستا الماتى وبلىسى ىلە اۋدانىندا ورنالاسقان پەرۆومايسك يندۋستريالدى ايماعىنداعى پوليەتيلەن قويماسى ورتەنىپ جاتقانى بەلگىلى بولدى.
وبلىستىق توتەنشە جاعدايلار قىزمەتىنىڭ مالىمەتىنشە، ءورت تۋرالى حابار تاڭعى ساعات جەتىلەر شاماسىندا تۇسكەن. بولجام بويىنشا بولمەدەگى قىسقا تۇيىقتالۋ سەبەپ بولعان.
قۇتقارۋشىلار وقيعا ورنىنا 20 مينۋت ىشىندە جەتكەن. وسى ۋاقىتقا دەيىن ءورت 3،6 مىڭ مەتر اۋماقتا بۇكىل عيماراتتى شارپىعان.
“ءورت تاڭعى ساعات 9:12-دە وقشاۋلاندى. ءورتتىڭ جاقىن ماڭداعى قويماعا تارالۋىنا جول بەرىلمەدى. قۇرباندار مەن زارداپ شەككەندەر جوق. ءورتتىڭ تارالۋ ءقاۋپى جوق. ءورتتى ءسوندىرۋ جالعاسۋدا”، - دەدى توتەنشە جاعدايلار دەپارتامەنتى.
ءورتتى سوندىرۋگە 9 قىزمەتكەر مەن 18 تەحنيكا جۇمىلدىرىلدى.
