كەزدەسۋ ق ر پرەمەر-مينيسترىنىڭ ورىنباسارى ەرالى توعجانوۆتىڭ، الماتى اكىمى باقىتجان ساعىنتايەۆتىڭ، ۇلىبريتانيانىڭ حالىقارالىق ساۋدا ءمينيسترى رانيل دجاياۆاردەننىڭ، ۇلىبريتانيانىڭ قازاقستانداعى ەلشىسى كەتي ءليچتىڭ قاتىسۋىمەن ءوتتى. تالقىلاۋعا ق ر مادەنيەت جانە سپورت ءمينيسترى اقتوتى رايىمقۇلوۆا، ق ر ءبىلىم جانە عىلىم ءبىرىنشى ۆيسە-مينيسترى ش. كارينوۆا، ورتالىق ازيا بويىنشا British Council، DMU لەستەر، EdPeritus UK Ltd جانە الماتى كرەاتيۆتى يندۋستريا كەڭەسىنىڭ وكىلدەرى قاتىستى.
دوڭگەلەك ۇستەلگە قاتىسۋشىلارعا ارناعان سوزىندە ق ر پرەمەر-مينيسترىنىڭ ورىنباسارى ەرالى توعجانوۆ كرەاتيۆتى يندۋستريالار جاڭا تەحنولوگيالاردىڭ، سالالاردىڭ نەگىزگى كوزى جانە ەكونوميكالىق ءوسۋدىڭ درايۆەرى رەتىندە ىقپال ەتەتىنىن اتاپ ءوتتى.
– ەلىمىزدىڭ يندۋستريا سالاسى ءبىرىنشى كەزەكتە تالانتتى جاستار ءۇشىن جاڭا جوعارى تابىستى جۇمىس ورىندارىن قۇرۋدى، ولار ءۇشىن مۇلدەم جاڭا «الەۋمەتتىك ليفتىلەردى» قالىپتاستىرادى، – دەپ اتاپ ءوتتى ەرالى توعجانوۆ.
قازاقستاندا سوڭعى 10 جىلدا كرەاتيۆتى يندۋستريا سالاسىنداعى ينۆەستيسيالار كولەمى 4 ەسەگە دەيىن ۇلعايعان. بۇل سالادا ەلىمىزدىڭ بارلىق جۇمىسپەن قامتىلعان حالقىنىڭ 3،5%-ى نەمەسە 310 مىڭ قازاقستاندىق جۇمىس ىستەيدى. بۇگىنگى تاڭدا كرەاتيۆتى يندۋستريالاردىڭ قازاقستان ەكونوميكاسىنا ۇلەسى 2،7%-دى قۇرايدى.
– پروگرەسسيۆتى الەمدىك پراكتيكا نەگىزىندە وسى سالانىڭ الەۋەتىن دامىتۋ ماقساتىندا ۇكىمەت ساراپشىلار قاۋىمداستىعىمەن بىرلەسىپ، كرەاتيۆتى يندۋستريالاردى دامىتۋدىڭ 2021-2025 جىلدارعا ارنالعان تۇجىرىمداماسىن ازىرلەۋدە. كرەاتيۆتى يندۋستريانى دامىتۋ بويىنشا مەملەكەتتىڭ ءبىرىڭعاي كوزقاراسى قالىپتاسادى جانە ونى دامىتۋ بويىنشا جاڭا تاسىلدەر ايقىندالادى، - دەدى ەرالى توعجانوۆ دوڭگەلەك ۇستەلگە قاتىسۋشىلاردى وسى قۇجاتتى ازىرلەۋگە قاتىسۋعا شاقىردى.
الماتى اكىمى باقىتجان ساعىنتايەۆ كرەاتيۆتى يندۋستريالار «الماتى – 2050» ۇزاق مەرزىمدى دامۋ ستراتەگياسىنىڭ باسىم باعىتتارىنىڭ ءبىرى ەكەنىن اتاپ ءوتتى.
– ءبىزدىڭ قالامىزدا تالانتتار، جاستار كوپ، زياتكەرلىك الەۋەت جوعارى. الماتىدا 37 جوعارى وقۋ ورنى بار، ولاردا 182 مىڭ ستۋدەنت وقيدى. بۇل رەتتە QS World University Ranking 2020 نۇسقاسى بويىنشا التى جوعارى وقۋ ورنى الەمنىڭ 1000 ۇزدىك ۋنيۆەرسيتەتتەرىنىڭ قاتارىنا كىرەدى. سوندىقتان اT جانە كرەاتيۆتى يندۋستريامەن بايلانىستى ءدال وسى سالالار سۇرانىسقا يە ءارى ءبىز ءقازىردىڭ وزىندە قامتاماسىز ەتىپ وتىرعان قولداۋدى قاجەت ەتەدى، – دەدى باقىتجان ساعىنتايەۆ.
جۇرگىزىلگەن تالداۋعا سايكەس، الماتى قالاسىنىڭ كرەاتيۆتى سەكتورىندا 17،8 مىڭ كاسىپورىن جۇمىس ىستەيدى. بۇل بارلىق كاسىپورىنداردىڭ 8،8%-ىن قۇرايدى. 2025 جىلعا قاراي بۇل كورسەتكىشتى 31،4 مىڭعا دەيىن (10،2%) ارتتىرۋ جوسپارلانۋدا. مۇندا شامامەن 44،9 مىڭ ادام جۇمىس ىستەيدى.
2020 جىلى قالانىڭ كرەاتيۆتى يندۋستريالارى كاسىپورىندارىنان تۇسكەن سالىق كولەمى 37،7 ملرد تەڭگەنى، ال كورسەتىلگەن قىزمەتتەر كولەمى – 402،8 ملرد تەڭگەنى قۇرادى. دەمەك، الماتىدا كرەاتيۆتى ەكونوميكانى دامىتۋ ءۇشىن قاجەتتى رەسۋرستار بار.
الەمدىك تاجىريبەگە سايكەس كرەاتيۆتى ەكونوميكانى دامىتۋ ءۇشىن كرەاتيۆتى كاسىپورىنداردىڭ، ۋنيۆەرسيتەتتەر مەن قالانىڭ سينەرگياسى قامتاماسىز ەتىلەدى. دامۋ ستراتەگياسى 10 باعىتقا – كينو جانە انيماسيا، ادەبيەت، ءسان، جاڭا مەديا جانە سيفرلىق مادەنيەتتەر، تەاتر، وپەرا جانە بالەت، كيبەرسپورت جانە گەيمديەۆولوپمەنت، ساۋلەت جانە ديزاين، مۋزىكا، قازىرگى زامانعى ونەر، ويىن-ساۋىق يندۋسترياسىنا نەگىزدەلگەن.
ىسكە اسىرۋ ءۇشىن قارجىلىق جانە قارجىلىق ەمەس قولداۋ تەتىكتەرى قولدانىلادى. بۇگىندە جالپى سوماسى 513 ملن تەڭگەگە 9 جوبا قارجىلاندىرىلدى. Almaty Finance جانە «الماتى مقو» جەلىسى بويىنشا اعىمداعى جانە كەلەسى جىلدىڭ قورىتىندىسى بويىنشا كرەاتيۆتى كاسىپكەرلەردى قولداۋعا 630 ملن تەڭگەگە دەيىن قارجى ءبولۋ جوسپارلانۋدا.
الماتى – «مۋزىكا» شىعارماشىلىق باعىتى بويىنشا يۋنەسكو-نىڭ كرەاتيۆتى قالالار جەلىسىنە كىرەتىن ورتالىق ازياداعى جالعىز قالا. 2022 جىلى زەرتحانا رەزيدەنتتەرى – مۋزىكانتتار اراسىندا زاماناۋي مۋزىكا مەن كوللابوراسيا اراسىندا Open Music Lab مۋزىكالىق زەرتحاناسىن ىسكە قوسۋ جوسپارلانۋدا.
قالادا كرەاتيۆتى يندۋستريالار سالاسىنداعى العاشقى تابىستى ينفراقۇرىلىمدىق جوبا – Alatau كرەاتيۆتى حابى ءقازىردىڭ وزىندە جۇمىس ىستەيدى ءارى كۇن سايىن 700-گە جۋىق ادام اينالىسادى. مۇندا كوۆوركينگ-كەڭىستىك، بالالارعا ارنالعان 25 تەگىن شىعارماشىلىق ۇيىرمە، شەبەرلىك سىنىپتارىنا ارنالعان الاڭ، مەدياتەكا، ArtBi ءبىلىم بەرۋ-كورمە ورتالىعى بار. وسىنداي ورتالىقتار قالانىڭ بارلىق اۋداندارىندا قۇرىلۋدا.
كەيىنىرەك قالانىڭ ءار اۋدانىندا كرەاتيۆتى حابتار جەلىسى قۇرىلاتىن بولادى.
دوڭگەلەك ۇستەلگە قاتىسۋشىلار ءوزارا پىكىر الماستى، سونداي-اق الماتى اكىمى باقىتجان ساعىنتايەۆتىڭ كرەاتيۆتى يندۋستريالاردى دامىتۋ بويىنشا جۇرگىزىلىپ جاتقان جۇمىستاردى ساراپتامالىق جانە تالدامالىق سۇيەمەلدەۋ جونىندەگى باستاماسىن قولدادى.
