وسىناۋ قۋانىشتى ءساتتى ۇزاق كۇتكەن جاستاردىڭ كەزەكتى لەگى باستاپقى جارناسى نەبارى 10 پايىزدى جيناپ، «وتباسى بانكىنەن» 5 پايىزدىق مولشەرلەمەمەن (جتسم 5،2% باستاپ) زاەم الۋ ارقىلى باسپانالى بولدى.
ولاردىڭ دەنى ەكىنشى نارىقتاعى ءۇيدى تاڭداعان. وتباسى بانك باسشىلىعى قاتارىندا دارىگەرلەر، مۇعالىمدەر، بالاباقشا تاربيەشىلەرى، سۋرەتشىلەر، سپورتشىلار، قۇتقارۋشىلار، ءورت سوندىرۋشىلەر، جۋرناليستەر جانە الەۋمەتتىك سالا قىزمەتكەرلەرى بار. ءۇيلى بولعان جاس ماماندارعا قۇتتىقتاۋ گراموتالارى تابىس ەتىلدى.
الماتىداعى «وتباسى بانك» فيليالىنىڭ ديرەكتورى داناگۇل ءتۇسىپوۆانىڭ ايتۋىنشا، «الماتى جاستارى» باعدارلاماسى ىسكە قوسىلعان 2017 جىلى ءجۇز ادام عانا زاەم السا، كەيىنگى جىلدارى اۋقىمى كەڭەيىپ، بيىلدىڭ وزىندە 1100 ازامات ءوز باسپاناسىنا يە بولماق.
– بيىل باعدارلاماعا 20 ملرد تەڭگە ءبولىندى. ونىڭ 17 ملرد اكىمشىلىك، 3 ملرد «وتباسى بانك» تاراپىنان بەرىلدى. بۇرىن بايقاۋعا قاتىسۋشىلارعا الماتى قالاسىندا تىركەۋدە تۇرۋ مىندەتتەلسە، ءقازىر بۇل تالاپ الىنىپ تاستالىنعان. جاستاردىڭ قالاداعى مەكەمەدە جۇمىس ىستەگەنىنە كەم دەگەندە 6 اي بولسا بولعانى. سونداي-اق، قاتىسۋشىلاردىڭ جاسى 35-تەن (قوسا العاندا) اسپاۋى ءتيىس، – دەدى داناگۇل ءتۇسىپوۆا.
بيىل باسپانالى بولاتىن 1100 جاس ماماننىڭ ءبىرى – شولپان يسلام بەس جىلدان بەرى عىلىم سالاسىندا جۇمىس ىستەيدى. ول «الماتى جاستارى» باعدارلاماسىنا قاتارىنان بىرنەشە جىل قاتىسقان.
– ساتبايەۆ ۋنيۆەرسيتەتىنىڭ وقىتۋشىسى جانە عىلىمي قىزمەتكەرىمىن. وسىعان دەيىن ءۇي جالداپ كەلدىم. جۇمىس ءوتىلىم جەتكىلىكسىز بولدى. بيىل باسپانا بۇيىرعانىنا قۋانىشتىمىن. سەبەبى، بۇل باعدارلاما ءبىز سياقتى جاس وتباسى ءۇشىن وتە ءتيىمدى. 5 پايىزبەن بەرىلەدى. اي سايىنعى تولەماقىسى از شىعادى، – دەيدى ءۇيلى بولعان شولپان يسلام.
سونداي-اق، «وتباسى بانك» فيليالىنىڭ ديرەكتورى داناگۇل ءتۇسىپوۆا قازاقستاندىقتاردىڭ باسپانا ساتىپ الۋىنا جەرگىلىكتى بيلىك قانا ەمەس، جەكە كومپانيالار، زاۋىتتار، كاسىپورىندار، مەديسينالىق ورتالىقتار دا كومەكتەسە الاتىنىن قاپەرگە سالىپ، بانك ونىمدەرىن تانىستىرا كەتتى.
– 2019 جىلى ىسكە قوسىلىپ، سۇرانىسقا يە بولعان «كورپوراتيۆتىك» ءونىم اياسىندا كومپانيالار ءوز قىزمەتكەرلەرىن نەسيەلەندىرۋ ءۇشىن اقشا بولەدى. وسى جوبا اياسىندا ءقازىردىڭ وزىندە 600 قازاقستاندىق وتباسى باسپانا ماسەلەسىن شەشىپ ۇلگەردى. قىزمەتكەرلەردىڭ تۇرعىن ءۇي جاعدايىن جاقسارتۋعا جۇمسالعان جالپى سوماسى 10 ملرد تەڭگەدەن استى، – دەپ اتاپ ءوتتى ءتۇسىپوۆا.
ناقتىراق ايتا كەتسەك، «كورپوراتيۆتىك» ءونىم – بۇل ەلىمىزدىڭ بارلىق ايماعىنداعى جەكەلەگەن كومپانيالاردىڭ كەز كەلگەن جاعدايلارى مەن شارتتارىنا بەيىمدەلۋگە مۇمكىندىك بەرەتىن امبەباپ قۇرال.
ءار كاسىپورىن ءوز قىزمەتكەرلەرىنە تۇرعىن ءۇي ساتىپ الۋ ءۇشىن قارجىلاندىرۋ شارتتارىنىڭ وزىندىك نۇسقاسىن قۇراي الادى. مىسالى، بانك كومپانيادان پايىزبەن قاراجات الا الادى نەمەسە كومپانيا ول اقشانى قىزمەتكەرلەرىنە زاەم بەرۋ ءۇشىن باستاپقى جارنا رەتىندە دەپوزيتكە سالا الادى.
ءتىپتى، بۇل قارجىعا بانكتەن وبليگاسيالار ساتىپ الا الادى. ياعني، جۇمىس بەرۋشى ۇيىمنىڭ قارجىلاندىرۋ تاسىلدەرىنىڭ كوپتەگەن جولى بار. ولاردى پايدالانا وتىرىپ، بانك كاسىپورىن قىزمەتكەرلەرىنە جەڭىلدەتىلگەن پايىزبەن نەسيە بەرۋ ءۇشىن، بوس قاراجاتىن ۋاقىتشا بانككە بەرۋ ارقىلى ءوز ماماندارىنا كومەكتەسەدى.
بۇل رەتتە كومپانيا قىزمەتكەرلەرى العاشقى جانە ەكىنشى نارىقتان تۇرعىن ءۇي ساتىپ الۋ ءۇشىن 5% (جتسم 5،2%-دان باستاپ) مولشەرلەمەسى بويىنشا، كەيىننەن ول 3،5%-عا (جتسم 3،6%-دان باستاپ) دەيىن تومەندەيتىن يپوتەكا راسىمدەي الادى. ياعني، ارتىق تولەمسىز، مەرزىمىنەن بۇرىن وتەۋ مۇمكىندىگىمەن نەسيە الا الادى. زاەم 19 جىلعا دەيىنگى مەرزىمگە قۇنى 50 ملن تەڭگەگە دەيىن بەرىلەدى.
ال «كورپوراتيۆتىك» ءونىمنىڭ تاعى ءبىر ارتىقشىلىعى – باستاپقى جارنانىڭ مولشەرى. ول وتباسى بانك پەن كومپانيا اراسىنداعى ىنتىماقتاستىق شارتتارىنا بايلانىستى تۇرعىن ءۇي قۇنىنىڭ 0% -10% بولۋى مۇمكىن. دەمەك، «كورپوراتيۆتىك» ءونىمدى پايدالانا وتىرىپ، كومپانيالار كاسىبي كادرلار پۋلىن قالىپتاستىرىپ، ولارعا الەۋمەتتىك جاعدايىن دۇرىستاۋعا جاعداي جاسايدى.
سونداي-اق، وتباسى بانك قىزمەتكەرلەرى «ارمانعا جول» سەرىكتەستىك باعدارلاماسى تۋرالى دا كەڭىرەك ماعلۇمات بەردى. بۇل قۇرال كاسىپورىن قىزمەتكەرلەرىنە جالاقىسىنان وتباسى بانكىندەگى دەپوزيتكە اقشانى اۆتوماتتى تۇردە اۋدارۋ ارقىلى باسپاناعا قاراجات جيناۋعا كومەكتەسەدى. وسى مىندەتتى وزىنە العان مەكەمە ەسەپشىسى ءاربىر اۋدارىم ءۇشىن 1 مىڭ تەڭگە تابىس تابۋىنا بولادى.
بيزنەستى دامىتۋ باسقارماسىنىڭ جوبا مەنەدجەرى گۇلدەراي يمانقۇلوۆا جالپىعا ورتاق باسپانا الۋ شارتتارىن اتاپ ءوتتى. ماماننىڭ ايتۋىنشا، ول ءۇشىن ءۇش تالاپ ورىندالۋى كەرەك. «ءبىرىنشى، دەپوزيتكە كەمى ءۇش جىل تولۋ قاجەت، ەكىنشى – باسپانا قۇنىنىڭ 50 پايىزىن جيناۋ كەرەك، ءۇشىنشى – باعالاۋ كورسەتكىشى ەڭ از دەگەندە 16 بولۋ كەرەك. وسى تالاپتار ورىنداسا، تابىستى راستاماي-اق باسپانانى 3،5-5 پايىز (جتسم 3،6% باستاپ) اراسىندا الادى»، – دەگەندى ەسكەرتە كەتتى.
