مەملەكەت باسشىسىنىڭ تاپسىرماسىنا سايكەس كولىك لەگىن وتكىزۋ قابىلەتىن ۇلعايتۋ، ينفراقۇرىلىمدى جاقسارتىپ، حالىققا قولايلى جاعداي جاساۋ ماقساتىندا بۇگىن الماتى – بىشكەك اۆتوجولىنىڭ «التىن وردا» بازارى ماڭىنداعى 16-19 شاقىرىمىنداعى جول ۋچاسكەسى پايدالانۋعا بەرىلدى. جولدىڭ اشىلۋ سالتاناتىنا يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ پەن الماتى وبلىسىنىڭ اكىمى قانات بوزىمبايەۆ قاتىستى، – دەپ حابارلايدى Dalanews.kz الماتى وبلىسى اكىمىنىڭ باسپا ءسوز قىزمەتىنە سىلتەمە جاساپ.

شارادا قۇتتىقتاۋ ءسوز سويلەگەن الماتى وبلىسىنىڭ اكىمى قانات بوزىمبايەۆ وڭىردە «نۇرلى جول» باعدارلاماسى جانە الماتى اگلومەراسياسى اياسىندا جول ينفراقۇرىلىمىن جاقسارتۋ باعىتىندا اتقارىلعان ىستەرگەتوقتالىپ ءوتتى.

- مەملەكەت باسشىسى قاسىم-جومارت توقايەۆتىڭ الماتى اگلومەراسياسىن دامىتۋداعى تاپسىرمالارىنىڭ ءبىرى - ترانسپورتتىق مودەل قۇرۋ جانە كولىك ينفراقۇرىلىمىن جاقسارتۋ. وسى مىندەتتەرگە سايكەس بۇگىن ەستاكادا ارقىلى كولىك قوزعالىسى اشىلىپ وتىر. بۇل ءوز كەزەگىندە مەگاپوليستەن شىعاتىن كولىك جولىن بارىنشا بوساتۋعا مۇمكىندىك بەرەدى. جوبا شەڭبەرىندە جولدىڭ ءجۇرۋ بولىگىنە 8-10 قوزعالىس جولاعىنا دەيىن كەڭەيتۋ جۇرگىزىلدى. بۇرىلۋ ەستاكادالارى جانە ۇزىندىعى 600 مەتر بولاتىن نەگىزگى ماگيسترالدىق ەستاكادا سالىندى. سونداي-اق، ءۇش جەرۇستى جاياۋ جۇرگىنشى وتكەلى بوي كوتەردى. سونىمەن قاتار تۇرعىنداردىڭ «التىن وردا» ساۋدا ورتالىعىنا قاتىناۋ جولىن جەڭىلدەتىپ، شاعىن كاسىپكەرلىكتى دامىتۋعا سەپتىگىن تيگىزەدى، - دەدى قانات بوزىمبايەۆ.

جول ازىرگە اسفالتتىڭ سوڭعى توسەمىنسىز ىسكە قوسىلدى. ول تەحنولوگيالىق تالاپتارعا سايكەس اۋا رايى جىلىعان كوكتەم كەزىندە توسەلەدى. جالپى ۋچاسكەنىڭ ۇزىندىعى – 3،86 شاقىرىم. جول قۇرىلىسى بارىسىندا مەردىگەر مەكەمە «سينە ميداس ستروي» كومپانياسىنىڭ 224 مامانى مەن 55 بىرلىك تەحنيكا جۇمىس ىستەدى.